Xemɨnakeʼeriwa taʼiwama:

Yuútsi waɨkawa temeunakeʼeriekɨ metá teuteri pɨtikuyuruwa nɨʼarika temeuʼenieka maine: «Naitsarie xekenehú. Teyuʼɨkitɨwamete xekeniwarayeitɨa teuteri naitsarie memɨtama. Xewakaʼɨyatɨ» (Mat. 28:​19, 20; Mar. 12:​28-31). Yeme nakeʼeriya mɨyuri, waɨkawa pɨtikema. ʼIkɨ pɨyɨwe teuteri waʼiyaaritsíe paitɨ mɨyeʼaní keane «ʼaixɨ ʼiyaari memɨteheumaikɨ tuukaari mɨkaxɨwe memanukuʼaxekɨ» (Hech. 13:48).

Meripaitɨ waɨkawa tepɨyuwaɨritɨakai tehetimamateketɨ ketemɨtiyuani temɨtekatsutuanitsíe. Tsiere, xapate mɨwayatuirienikɨ teuteri. Mɨɨtá hiikɨ tepeuyehɨwá waɨká temɨteheutamaiwaweni temɨtekuxaatatsíe. Nakeʼeriya hiipame tepɨwakuhekɨatsitɨwa kepauka temɨtewakuxaxaatɨwa tita mɨtiwanaketsíe mɨkɨ. Teuteri meyunaitɨ yɨɨkɨ mepɨteuhú, ʼayumieme taame tepɨtekupatani temɨtekuxaatatsíe, matsi pɨɨtá tepɨtiʼeriwani tita memɨteheumaikutsíe metá tita tiwaʼiyaaritɨa. ¡ʼIkɨ xapa pɨtawewiya mɨkɨ temɨtaʼanukuʼaxekɨ!

ʼIkɨ xapa pexeiya 12 ʼɨkitɨarikate keane mɨkuhekɨkɨata 12 pareewiya, keane teyunaitɨ temeuyehɨwá nakeʼeriya temɨhekɨatakɨ, temɨteʼɨkitawenikɨ. ʼƗkitɨarikate mayehú panayehapanie Yuútsi Niukieyatsíe, kehepaɨ Ketsuútsi metá meripaitɨ Jehová meʼayexeiyatɨ memɨteʼuyuri Yuútsi Niukieya memɨkuxaatakaitsíe. Hiikɨtá tepɨkateheuyehɨwarí temiyemaitɨkaní ketemɨtetsutɨani, matsi pɨɨtá tepɨkuwawani kehepaɨ nakeʼeriya teuteri tetewaruhekɨatsitɨawe. Tseepá naitɨ mauyuyehɨwá ʼikɨ pareewiya keane mayehú ʼikɨ xapatsíe niuki temɨkuxaatatsíe, tepɨxeiya hiipatɨ waɨkawa pɨrayeʼaxé temɨkatsutsutɨwanitsíe xaatsika, tarieka temakununuwanitsíe tsiere teyuʼɨkitɨwamete temɨwareyeitɨwanitsíe.

Kepauka pemɨyutiʼɨkitɨani xeime ʼɨkitɨarika, neutiʼeriwani ʼekɨ kehepaɨ pemɨtiuyuriwe Yuútsi Niukieya pemɨwakuxaxaatɨwanikɨ teuteri ʼekɨ hakewa pemeka. Jehová ketemɨteheunakeʼeriekɨ metá teuteri tahepaɨtsita matsi waɨkawa pɨrayeʼaxé nakeʼeriya temɨwakuhekɨatsitɨwani xeikɨ́a tita temɨteʼuyemaate hawaikɨ. ʼAyumieme tinaimetsíe keneʼawaɨritɨaka ʼikɨ nakeʼeriya pemɨtatɨrɨkariyakɨ. ʼIkɨ pɨʼatsipareewieni pemɨtiʼɨkitanetsíe.

Jehová temayexeiyani xehaamatɨa waɨkawa pɨtemawierika (Sof. 3:9). ¡Jehová waɨkawa kexetiyetuirieka kexemɨteyuwaɨriyakɨ xeteʼuximayatɨ xeteʼɨkitatɨwetɨ nakeʼerima!