Yuútsi Niukieyatsíe mepaxaxaatsiwa Bernabé metá nɨʼariwame Pablo. Mɨkɨ tsiere mepɨhɨɨkɨtɨkai keane xeɨritsikate memanuʼiwatatɨkɨkakai. ¿Títakɨ yametekuyuruwakai? Yuʼiwama waheetsíe yeme memeuyuʼiyaritɨakaikɨ. Pablo putayɨ́ tawarié panuanikekai mɨreumaimɨkɨkaikɨ kememɨteheuʼeriekai ʼiwamama. Tseepá kwinié mɨretewakai mɨkɨ pɨwaruyewaɨritɨatɨyeikakai (Hechos 15:36). Mɨpaɨ tsiere meteheuʼerietɨ taʼiwama hiikɨ xeɨritsikate mepɨwaruyeʼiwatatɨkɨka.

Mepɨtatsiʼuyewaɨritɨatɨkɨka. Keane xeɨritsikate memanuʼiwatatɨkɨka 20 xeɨritsikatetsíe meputaʼaxe metá mana xei tsemana mepɨyuruwa, hutakɨa meputaʼaxe xei wiitaritsíe. Waɨkawa waheetsíe tepɨtehetimaiwawe. Mɨkɨ meyunaime mepɨwareumaiku metá tahaamatɨa Yuútsi Niukíeya mepeuʼɨɨkitaku, tsiere mepɨwareumaiku keane temɨtewaʼɨɨkitɨa. Metá ʼuukitsi memɨyumaate wahaamatɨa taʼiwama mepɨwaruyeʼiwatatɨkɨka wakié; tsiere xeɨritsikatsíe yuxatsikakɨ mepɨtatsikɨwaɨritɨwa (Hechos 15:35).

Meyunaime waheetsíe mepeuyuʼiyaaritɨa. Keane xeɨritsikate memanuʼiwatatɨkɨka yeme mepeuyuʼiyaaritɨa Yuútsi ʼaixɨ ʼaneemekɨ mayexeiyarieka xeɨritsikatetsíe. Puyukuxexeɨriwa ʼuukitsi memɨyumaate metá wapareewiwamete wahaamatɨa, memɨtexeiyakɨ xeɨritsika kemɨtimié metá mɨwataʼɨxatsitɨanikɨ ʼaixɨ matsi memɨtepareewiekakɨ. Mepɨwakupareewiwa keane memanuyehaitɨtɨa Yuútsi Niukíeya mekuxaatatɨ, ʼaixɨ memɨteʼuʼɨɨkitanikɨ metá matsi waɨkawa memɨtepareewiekakɨ, tsiere mepayukatemawietɨkɨka kepauka memɨwakuxexeiyatsíe keane metetsutɨatɨ tahaamatɨa memuyukuxexeɨriwa metá mekatekuhayeikawakɨ meteyuʼɨɨkitɨatɨ. Mɨkɨ taʼiwama naime yutuukaari mepɨyetuayá metá «mepɨtatsipareewie ʼaixɨ temɨteheuʼeriekakɨ» (2 Corintios 8:23). Tepɨwaʼɨɨkeni Yuútsi kememɨteʼayexeiyatsíe (Hebreos 13:7).

• ¿Títakɨ meteʼutaʼaaxe keane xeɨritsikate memanuʼiwatatɨkɨka?

• ¿Tita waheetsíe peretimaiwé memɨtatsiʼuyeʼiwatatɨkɨkatsíe?