ʼƗKITƗARIKA 8
¿Títakɨ ʼaixɨ tetehekemaritɨ tetehetaʼaxe xeɨritsikatsíe?
ʼIkɨ xapatsíe ʼɨkiyate pemɨtixeiya hepaɨ ¿Titayari Jehová temayexeiya witsi teteʼukemaritɨ xeɨritsika tetehetaʼaxe? ¿Títakɨ takemari waɨkawa teteʼɨɨwiya metá ʼaixɨ teteyuhekɨ́a?
Yuútsi temayexeiyakɨ. Pɨtiyuri, Yuútsi pɨkayɨkɨʼɨɨwiya ketemɨteyuhekɨatsíe (1 Samuel 16:7). Yatɨtɨ kepauka temuyukuxexeɨriwatsíe, tepeuyehɨwá Yuútsi ʼaixɨ mɨtatixeiyani yaxeikɨ́a tsiere taʼiwama. Xɨka xeime ʼiitsɨɨkame hɨxie teʼutaʼinierieni, xɨari tsiteteheukemaritɨ hɨxiena tepɨyeʼaxɨani, temɨtehamatekɨ keane mɨhɨɨkɨ. Mɨpaɨ tsiere tepɨtekuhekɨatá xeɨritsika temetaʼaxetsíe, Jehová taYuútsi «ʼIitsɨɨkame naime kwiepatsíe» mɨhɨɨkɨ muwa temayexeiyakɨ (Génesis 18:25).
Temɨtehekɨatakɨ tita temɨtehetimaamate. Bibliatsíe paine Ketsuútsi memuweiya wakemari «ʼaixɨ pɨtiyuhekɨaka metá yuheetsíe xeikɨ́a mepɨkaʼutiʼerieka» (1 Timoteo 2:9, 10). «ʼAixɨ mɨtiyuhekɨaka» pɨkaʼanuyɨne kemari kwinié rayeʼakame mɨranakatɨkɨní, tsaipɨnetɨkaime nutsɨ ʼanuyehekɨkɨakame. Tsiere, «yuheetsíe xeikɨ́a mɨkaʼutiʼerieka» pɨtikuyuruwa ʼaixɨ temɨteheuyukukemaritɨaka, hauʼerietɨ hawaikɨ. Metá waɨkawa pɨtixuawe kepemɨtiyukemaritɨawe, pekaratɨmaiyatɨ kemaine Yuútsi Niukíeya. ʼAixɨ reukukemaritɨ metá ʼaixɨ tiyuhekɨatɨ pɨtiuyuriwe «ʼaixɨ mɨtixeiyariekakɨ Yuútsi ʼɨkitɨarikaya, Tatsiwikweitsitɨwame», haxa mɨkatiumamatiwanikɨ matsi pɨɨtá ʼaixɨ mɨtiuxaxaatsiwanikɨ (Tito 2:10; 1 Pedro 2:12). Xɨka ʼaixɨ teteʼukemaritɨ tehetaʼaxeni xeɨritsika, mɨkɨ pɨtiuyuriwe ʼaixɨ mɨtiumatiwani Yuútsi kiekarieya.
Kahauyewetse kemari rayeʼatɨkaime nutsɨ tsiʼaneneeme pemɨranakatɨní, ʼaixɨ pemɨtiyuhekɨakakɨ. ʼAyumieme, mɨkɨ pɨkatikuyuruwani pemɨkahetaʼaxenikɨ kí temuwayutixexeɨriwatsíe.
-
¿Títakɨ ʼaixɨ tiʼaane, ʼaixɨ temɨteheukukemarini Yuútsi temayexeiyatsíe?
-
¿Kehepaɨ Yuútsi ʼɨkitɨarikaya pɨtatiupareewiwe temɨteʼanuyewaunitsíe ketemɨteyukemaritɨani?