Bibliatsíe pɨreukuʼuxakai rí Ketsuútsi mierieyu, tɨɨriyamaama watsata mepɨtixuawerekekai mɨtiyuri mekateʼɨɨkitatɨ, metá mepɨkwiemanikekai tita mɨtiyuri Yuútsi Niukieyatsíe (Hechos 20:29, 30). Yeme, mɨpaɨ pɨtiɨyɨ́: yuri memɨkateʼɨɨkitakai mepanɨtinɨitɨa mɨkatiyuri Ketsuútsi ʼɨkitɨarikaayakɨ, metá tita mɨtiyuri yɨɨkɨ meʼenukuyuruwatɨ mepakɨ́ (2 Timoteo 4:3, 4). Yamɨtiɨyɨkɨ, ¿Titakɨ teteʼutiyuawe, ʼɨkitɨarika Bibliatsíe ketemɨtehetiʼenietɨkɨka kenaame yeme tiyuri?

Payeʼa Jehová mɨtiyuri mɨtihekɨatakɨ. Yuútsi putayɨ́ kwinatɨrieka tuukaaritsíe «tita yeme mɨtiyuri waɨkawa [payanikekai]» (Daniel 12:4). 1870 tsíe, tsimeyɨpaɨmetɨ mɨtiyuri mepɨtewautɨwekai, mepɨtehetimá tita memɨteʼɨɨkitakai teyupanie Bibliatsíe pɨkahayemiekai. ʼAyumieme matsi waɨkawa mepɨteyewaɨtɨkɨ́ matɨaripaitɨ kemɨreukuʼuxaakai ʼutɨarikatetsíe, metá Jehová pɨwarupareewi mepɨteʼukaxei tita mɨtiyuri.

ʼUukitsi mekateʼitawatɨ yuʼamaitɨ Bibliatsíe mepɨteʼutiwau. Keane Bibliatsíe memɨteyuʼɨɨkitɨakai –meripaitɨ memɨteʼukatsutɨa– mepɨteʼuyuri, hiikɨ temɨteʼuhú hepaɨ: xeime ʼɨkitɨarika meri meʼukatsutsutɨwatɨ. Kepauka xeime ʼutɨarika mekahetiʼenietɨkɨkakaitsíe, hiipame meputiwawakai memeitiʼenietɨkɨnekɨ metá memeitiʼenietɨkɨkakaitsíe, hiipatɨ ʼutɨarikate kemaitɨkateikɨ mepekaʼutɨwakai. Mɨkɨ pɨtiuyuri Biblia yɨkɨmaana mɨyutaxaatakɨ, mepɨteʼuhekɨataxɨ tita mɨtiʼawietsekai, Yuútsi kemɨtitewatsíe, Yuútsi ʼIitsɨɨkame mayeitɨatsíe, tita Yuútsi mɨreuyehɨwá kwieepa metá teuteri waheetsíe, kememɨkɨyɨne keane memeutakwixɨa metá memanukuʼuitɨarienitsíe. Tita memɨteʼukaxéi, pɨwarutiwenaxɨ mɨkatiyuri memɨteʼuweiyakaitsíe (Juan 8:31, 32).

1879 tsíe, mepɨtehetimá tuukaari payeʼakai mɨtiyuri memɨtekuxaatakɨ. ʼAana tsiere xapa mepanayenetɨa hiikɨ temanayenenetɨwa: La Atalaya. Jehová ʼIitsɨɨkame manukake mɨkuxaata. Hiikɨ 240 países metá mɨtiuyehanetsíe mɨtiyuri tepɨtekuxaata metá 750 niukitetsíe tepanutihu rí. ¡Hatsuaku Yeme mɨtiyuri kwinié tewa pɨkayeʼawekai!

• ¿Ketiuyɨ́ mɨtiyurikɨ Ketsuútsi ʼumɨku?

• ¿Kehepaɨ tiuhekɨatsie tita mɨtiyuri Yuútsi Niukieyatsíe?