¿Metikunanaake matsi waɨkawa Bibliatsíe pemɨrakumaiká? ¿Pereumaimɨkɨ xewitɨ ʼutɨarika kemaine nutsɨ xeime tewi Bibliatsíe haxaxaatsiwame nutsɨ pepeuwaumɨkɨ kewa yamɨreyɨ́? ¿Petiyukuʼiwawiya, xɨka Yuútsi Niukíeya metsiʼupareewiweni haxa pemɨranuyemienitsíe? Xɨka hɨ pehaineni, tematsiʼinié pemɨmiekɨ xapate waɨkawa muwaxuawe temuwayutixexeɨriwatsíe.

Xapate muwaxuawetsíe waɨkawa pɨrexeiya pemɨtitiwaunikɨ. Xɨari naime xapate ʼaniukikɨ peukahexeiya Jehová Niukíeya Memɨkuxaata memanayenenetɨwa; rixɨ́a temuwayutixexeɨriwatsíe waɨkawa xapate pexeiya hehekwame manayenexɨaké. Xɨari waɨkawa Biblia nexeiya yɨɨkɨ niuki ʼaneneemekɨ ʼutɨarietɨkaitɨ́, tita temɨteheumaiku tiwawame metá hiipatɨ xapate. Muwa ketineutiwawani xeɨritsika kayukatsutɨawekaku nutsɨ hautipareyu. Xɨka xeime computadora hexeiyani Watchtower Library ʼayemiekame, mɨkɨtsíe waɨkawa pepɨtiutiwauwé, kepaitsɨ waɨkawa xapate mana payehú.

Waɨkawa pɨwapareewie keane memɨteyuʼɨɨkitɨa xeɨritsikatsíe Tatuukaari metá Taʼuximayatsika Yuutsitsíe. Xɨka ʼekɨ mɨkɨ xeɨritsikatsíe peʼakaʼuxani, muwa pepɨtiutiwauwé ʼaxatsika pemɨtaxaatakɨ. Taʼiwa xeɨritsika mɨʼɨɨwiya Tatuukaari Yuútsi heetsíe pɨhɨɨkɨ muwa mɨtihɨ́, mɨkɨ pɨtikuyuruwa xapate hehekwatɨ manayenexɨaké muxuaweni metá ʼaixɨ mɨreuku piiká. Mɨkɨ nutsɨ keane metiutiʼɨɨkitɨwa metsiʼupareewiwe pemɨtikaxeiyakɨ tita pemɨreuwaumɨkɨ. Xeikɨ́a tinamaiká pɨkayɨwe xapate mehuruwani; tsiere pɨkayɨwe hauʼerietɨ mɨtikɨmaɨwani metá mana pemɨrayeʼutɨwani.

Biblia paine «Yuútsi kemɨtiyɨkɨhɨawe» temukaxeiyakɨ, peuyewetsé temikuwautɨweni «tumini ʼawietsiekame» temɨwautɨweni hepaɨ (Proverbios 2:1-5). Xapate muwaxuawe temuwayutixexeɨriwatsíe ʼaixɨ pɨʼane muwa pemɨtiutiwawani.

• ¿Tita tixuawe pemɨtitiwaunikɨ xapate muwaxuawe temuwayutixexeɨriwatsíe?

• ¿Keane metsiʼupareewiwe xapate muwaxuawetsíe pemɨreutawauwenikɨ?