Jehová pɨtinakeʼerie nuiwarite meyunɨtɨ́ memeyexeiyani memayukawaɨritɨatɨkɨkanikɨ heetsiena, matɨari mɨtiɨnɨʼa hepaɨ (Deuteronomio 6:6, 7). ʼAyumieme, Jehová Niukíeya temɨkuxaata xei tuukaari tsemanatsíe tepanuyewawa, tanuiwari haamatɨa Yuutsitsíe temɨteʼuyutiʼɨɨkitɨwanikɨ, tseepá xeɨritsika temayeteni hepaɨ tekateʼukemaritɨ metá teteʼanuyewawatɨ tita tanuiwari mɨtiwarupareewiwe. Yaxeikɨ́a tsiere mepɨteʼuyuriewe keane memɨkaʼayukawɨtɨa, mɨpaɨ matsi waɨkawa mepɨteʼuyutiʼɨɨkitɨawe tseepá titatsíe memɨteheumaikuni.

Mɨkɨ pɨtatsipareewie matsi waɨkawa Jehová temetimanikɨ. «Hurawa xekeneyakɨni Yuútsi heetsɨa metá mɨkɨ xeheetsɨa hurawa pɨyeyaní» (Santiago 4:8). Kepauka Biblia temakaterɨwatsíe, matsi waɨkawa Jehová tepetimamaate kemɨtiukaʼiyaari metá kemɨtikamié. Xepɨteʼukatsutuawe Yuútsi Niukíeya xeʼakaterɨwatɨ, xeteʼuweiyatɨ keʼaneetɨ makaterɨwarieni xeɨritsikatsíe, Tatuukaari metá Taʼuximayatsika Yuutsitsíe. Yuútsi Niukieyatsíe xeyunaitɨ ʼetsiwa xepɨteʼakaterɨwawe; ʼariketa xepɨteʼutaxaatawe tita xemɨtehetimá.

Mɨkɨ pɨtatsipareewie tanuiwari matsi waɨkawa meyunɨká. Meyunaitɨ nuiwari matsi waɨkawa meyunɨtɨ́ mepakɨká, kepauka Yuútsi Niukíeya memuyutiʼɨɨkitɨwatsíe. Memuyukuxexeɨriwanitsíe mepɨyutemamawieka metá mepɨkayuʼiyaaritɨaka. Keane tɨɨrí memɨwarexeiya, ʼɨkitɨarika mepanayewauwé Atalayatsíe metá ¡Despertadtsíe! nutsɨ jw.org tsíe, mana waɨkawa mepɨteʼukaxeiyawe yuniwema waheetsíe. Tsiere mepɨteʼuxeiyawe titatsíe memɨteʼuyehú ʼetsikwera, ʼuxaʼa warié mɨpaɨ memɨteyurienikɨ. Nutsɨ JW Broadcasting mepɨxeiyawe metá mɨkɨtsíe mepɨteʼutixaatawe, yaxeikɨ́a kwikari meputinɨawawe xeɨritsikatsíe mieme, kwinatɨrieka metetahayewame mepɨteʼutikwaiwé.

Ketemɨteheutetere teteyuʼɨɨkitɨatɨ tanuiwarima wahaamatɨa, mɨkɨ pɨtikuyuruwa matsi waɨkawa Yuútsi Niukíeya temɨtemawieka, metá Jehová waɨkawa pɨtatsititɨrɨkariya (Salmo 1:1-3).

• ¿Títakɨ xei tuukaari teteʼanuyewawa tanuiwari wahaamatɨa, Yuútsi tsíe temɨteʼuyutiʼɨɨkitɨwanikɨ?

• ¿Kemeteyuriewawe tɨɨrí memɨwarexeiya ʼɨkitɨarika mɨwanakerekɨ?