¿Petiwaxeiya kememɨteʼayukatemamawie ʼeena? Yameteyuhekɨ́a meyuxeɨrietɨ waɨká temuyukuxexeɨriwatsíe. Meri paitɨ hepaɨ Yuútsi memayexeiyakai, mepɨteʼunɨʼarie haika mexɨa mepuyukuxexeɨriwanikekai xei wiitaritsíe, tame tsiere tepeyukatemawietɨkɨka temuyukuxexeɨriwatsíe teyuwaɨkawatɨ (Deuteronomio 16:16). Xei wiitari manukayeikatsíe haika mexɨa tepuyukuxexeɨriwa: Huta xeɨritsika xei tuukaari reutetereetɨ metá xeime xeɨritsika haika tuukaari reutetereeme. ¿Kehepaɨ mɨkɨ tatikupareewiwa?

Mɨpaɨ matsi taʼiwama tepɨwanakeʼerie. Israelitatsixi waɨkawa mepeyukatemawietɨkɨkakai, Jehová memɨtinɨawakaikɨ «meyuwaɨkawatɨ memuyukuxexeɨriwakaitsíe», yaxeɨkɨ́a tsiere tame waɨkawa tepeyukatemawietɨkɨka, taʼiwama wahaamatɨa temuyukuxexeɨriwakɨ (Salmo 26:12; 111:1). Mɨkɨ pɨtikuyuruwa hiipame xeɨritsikatetsíe nutsɨ paisestsíe miemetexi temɨwaretimamatekeni. Tuuka mayeikatsíe teyunaitɨ tepɨteʼutikwaʼa, taʼiwama wahaamatɨa tepɨteʼutixaxaata (Hechos 2:42). Mana pɨtikuhekɨkɨare «meyunaime taʼiwama» ketemɨtewareunakeʼerie naime kwieepatsíe. (1 Pedro 2:17).

Mɨtatsikupareewiwakɨ Yuútsi Niukíeya ʼaixɨ temɨtehetiʼenietɨkɨkani. Israelitatsixi «niukite mepetiʼenietɨkɨkakai» kepauka memɨteʼutiʼɨɨkitɨariwakaitsíe metá pɨwakupareewiwakai (Nehemías 8:8, 12). Tame tsiere waɨkawa pɨtatsikupareewiwa tita temɨtehetimamaateke teyuwaɨkawatɨ temuyukuxexeɨriwatsíe. Mana niuki mutixaxaatsiwa Bibliatsíe panayehapaniwa. Xaatsikate yeme ʼaixɨ ʼanɨyɨtɨkaimekɨ metá tita mɨranayeneikakɨ, tepɨteʼutiʼɨɨkitɨariwa temɨteʼayeʼatɨwanikɨ tita Yuútsi mɨtinakeʼerie. Tsiere pɨtatsikɨwaɨritɨwa temɨtehetimamaatetsíe hiipatɨ kememɨteʼanuyekɨ́ Yuútsi meʼayexeiyatɨ hiikɨ metá meri paitɨ. Xeɨritsika haika tuukaari mɨreuteteretsíe, mepanayeneika teuteri meri paitɨ hepaɨ meteʼukemaritɨ, matsi yeme Yuútsi Niukíeya ʼaixɨ temɨtehetiʼenietɨkɨnekɨ metá waɨkawa pɨtatikuʼɨɨkitɨwa. Naime xeɨritsikatetsíe muyutiwewiwa hiipatɨ mepukaʼɨɨwá, mɨpaɨ mepɨtekuhekɨkɨata Yuútsi hetsɨa rí mepɨyuyetua.

• ¿Títakɨ waɨkawa teteʼayukatemawietɨkɨka temuyukuxexeɨriwatsíe?

• ¿Kemetiupareewiwe xɨka xeime xeɨritsika waɨkawa temuyukuxexeɨriwatsíe peheuyaní?