Temɨtewataxaatɨanikɨ «niuki ʼaixɨ ʼaneneeme [...] naitɨ países, nuiwarite, naitɨ yɨɨkɨ memɨteʼuniuka metá kiekarite», xapate tepanayenenetɨwa 750 niuki yɨɨkɨ ʼaneneemekɨ ʼanutihukame (Revelación 14:6). ¿Kehepaɨ tepɨteʼayeʼatɨwa kwinié timɨiremetsíe? Taʼiwama wapareewiyakɨ naime kwieepatsíe, hiipatɨ meri mepitiʼutɨwa, ʼariketá waɨkawamekɨ niuki yɨɨkɨ ʼaneneemekɨ pakaʼutɨariwa, yunaitɨ memɨtepareewie Jehová Niukíeya memɨkuxaata mepɨhɨɨkɨ.

Ingleskɨ meri pɨtiʼutɨariwa. Yuútsi Kiekarieyatsíe Memanuyahaitɨtɨa mepɨʼɨɨwiya Xapate Muwaʼutɨarietsíe, mɨtiwayenɨʼariwatsíe paitɨ. Mɨkɨ pɨwaʼɨɨwiya keane Xapate Muwaʼutɨarietsíe memɨtepareewie, yaxeikɨ́a tsiere keane mɨkɨtsíe memɨtepareewie sucursal meutiʼutɨkatsíe. Meyuwaɨkawatɨ muwa memɨtepareewiekɨ, mɨkɨ pɨtikuyuruwa yɨɨkɨ ʼaneneemekɨ xapate mɨtiʼutɨariwani, mɨpaɨ meyuwaɨkawatɨ teuteri memekaterɨwanikɨ.

Keane yuníukikɨ memɨteʼutɨa, ʼutɨarika mepeyenɨʼaiyarɨwa. ʼUtɨarika ʼaixɨ ʼitɨarieme manayeneikatsíe, yunaitɨ computadoratsíe mepenɨʼaiyarɨwa yuniukikɨ memɨteʼutɨa nai kwieepatsíe, yuníukikɨ meʼekaʼutɨame, yumaitɨ́ mepitixexeiya,ʼaixɨ reukuʼutɨarietɨ manayenenikɨ. Keane yuníukikɨ memitiʼutɨwa, mepanuyewawa «yeme niuki ʼaixɨ ʼaneneeme», meyutiʼenierietɨyeikanikɨ inglés mɨreukuʼutɨarie hepaɨ (Eclesiastés 12:10).

Computadora pɨtikuyuruwatɨka yepauka manayeneikani. Computadora pɨkayɨwe tewi hepaɨ mɨtiʼuximayata. Metá hɨrixɨ́a pɨtatsikupareewiwa, mana temɨteʼutiwawanikɨ tita temɨkatehetiʼenietɨkɨka. Tsiere Jehová Niukíeya temɨkuxaata, tepuunetɨa titewakame, Sistema Electrónico de Edición Plurilingüe (MEPS, ingleskɨ mɨtiuyuʼutɨwa), mɨkɨtsíe waɨkawa niukite yɨɨkɨ ʼaneneetɨ pakaʼɨnarɨwa, ʼaixɨ pitiyuruwa metá penayenenetɨwa.

¿Títakɨ xapate teteʼanayenenetɨwa tseepá tsimeyupaɨmetɨ yuniukikɨ memekaterɨwaxɨ? Jehová mɨreuyehɨwakɨ «teuteri yɨɨkɨ meʼanenetɨ memɨtawikweitsitɨarieni metá mɨtiyuri ʼaixɨ memɨtehetimaamateni» (1 Timoteo 2:3, 4).

• ¿Kehepaɨ taxapate pɨtikuwewiwa?

• ¿Títakɨ waɨkawa niuki yɨɨkɨ ʼaneneemekɨ teteʼenayenenetɨwa?