Betel panɨyɨne hebreokɨ, «Yuútsi Kiiya» (Génesis 28:17, 19, nota). Yeme pɨrekema mɨpaɨ mɨtiuyuterɨwani Yuútsi kiiya meutiʼutɨká naime kwieepatsíe, mana paitɨ pɨtiyutaʼɨɨwiya metá pɨtipareewiya Yuútsi Niukíeya mɨyukuxaatanikɨ. Yuútsi Kiekarieyatsíe Memanuyehaitɨtɨa mepɨtepareewie mɨtiwayenɨʼariwatsíe Nueva York (Estados Unidos), muwa paitɨ mepɨteʼanuyexexeiya kemɨtiyɨatɨne sucursal meutiʼutɨká waɨkawa paisestsíe. Muwa taʼiwama memɨtepareewie mepɨteʼuterɨwarɨwa nuiwari Betel. Xei nuiwari hepaɨ muwa mepayetéi, mepɨteʼutikwaʼa, mepɨtepareewie metá yunaitɨ Yuútsi Niukíeya meputiterɨwa (Salmo 133:1).

Muwa naime yutɨrɨkariya mepɨyetuayá metepareewietɨ. ʼUukari metá ʼuukitsi metsetseɨyetɨ Yuútsi mɨtipiniteyatsíe muwa mepɨtepareewie, naime yutuukaari mepɨyetuayá meteʼayeʼatɨwatɨ tita Yuútsi mɨtínaake, mɨkuxaxaatsiwanikɨ Yuútsi ʼIitsɨɨkame mayeitɨa (Mateo 6:33). Nixewitɨ pɨkatipitɨarie, xeikɨ́a mepexeiya kewa memayeteni metá ʼikwai tsiere ʼetsiwa mepɨpareewiya memɨteyunanairiekakɨ tita memɨteheuyehɨwá. ʼUximayatsika yuxexuitɨ mepexeiyatɨká: hiipatɨ oficina mepɨtepareewie nutsɨ ʼikwai metewewietɨ; hiipatɨ tá xapate mɨwewiyatsíe, hiipatɨ kiitá mepuyeʼitiwa, hiipatɨ tá mepɨtepareewie mɨtiutiʼekwarɨwatsíe metá hiipatɨ kí mepɨʼɨɨwiya ʼaixɨ mɨʼaneneenikɨ.

Kewa waɨkawa mɨraʼuximayatsie Yuútsi Niukíeya muyukuxaatanikɨ. Betel memɨtepareewie mepɨteheunakeʼerie, meyuwaɨkawame waheetsíe mɨyeʼaaxeni Biblia ʼɨkitɨarikaya tseepá kehepaɨ. ʼIkɨ xapa manayenetɨarie hepaɨ. Putaʼutɨarie Yuútsi Kiekarieyatsíe Memanuyehaitɨtɨa mɨtiunɨʼa hepaɨ metá meyuwaɨkawatɨ mepenɨʼairiyarie yuniukikɨ memitiʼutɨani naime kwieepatsíe, panayenetɨarie maquina kwinié rakumexɨatɨkaimetsíe waɨkawame paisestsíe metá peutanɨʼariexɨa 110,000 xeɨritsikatetsíe ʼanutihukame. Yɨɨkɨ tiʼanetɨ mɨranayeneikatsíe, Betel memɨtepareewie matsi waɨkawa mepɨtekupareewiwa waɨkawa mɨkuxaxaatsiwanikɨ: niuki mɨhehekwa ʼaixɨ manɨyɨtɨká (Marcos 13:10).

• ¿Keane Betel mepɨtepareewie metá kemetepareewiya?

• Betel kememɨteyurié ¿Tita matsi waɨkawa reuyewekametsíe metepareewie?