Meyuwaɨkawatɨ teuteri mepɨteʼerie, kenaame Jehová Niukíeya temɨkuxaata kwinié tekateheutewi. Metá 2,700 wiitari panuyemie rí, Yuútsi yuri memayexeiyakai memɨteʼuterɨwarietsíe Yuutsitsíe «texaxaatamete» (Isaías 43:10-12). 1931 Kaʼayeʼawekaku mepɨtateʼuterɨwakai Bibliatsíe Teyuʼɨɨkitɨwamete. Kamɨtsɨ ¿Títakɨ teteʼuyuterɨwaxɨ Jehová Niukíeya temɨkuxaata?

Temɨtekuhekɨatakɨ keane taYuútsi mɨhɨɨkɨ. Bibliatsíe waɨkamexɨa payemié, Yuútsi kemɨtitewá, Jehová, ʼutɨarikate meripaitɨ mɨreukuʼuxakai hepaɨ. Waɨkawame Bibliatsíe mepiyepatarɨme, mepɨteʼikuʼutɨwa ʼUkiyari nutsɨ Yuútsi. Yuri Yuútsita, Jehová pɨyuhekɨataxɨ Moisés hɨxie metá pɨtitahɨawixɨ: «ʼIpaɨ nepɨtitewaka heyeme» (Éxodo 3:15). Mɨpaɨ metimatiwakɨ kakaɨyarixi watsata. Tame tepeuyutemamawie hepaɨna temɨteʼuyuterɨwakɨ.

Mɨtikuhekɨatakɨ ketemɨteyurié. Abel muyeikakaitsíe paitɨ, meyɨwaɨkawatɨ tsiere mepɨteʼuhekɨataxɨ Jehová heetsíe mepɨteʼeriekai. ʼAana paitɨ hiipatɨtá Noé, Abrahán, Sara, Moisés metá Davíd, tsiere mepaakɨ́ keane «meyɨwaɨka memɨteʼutaxaa» (Hebreos 11:4–12:1). Xewitɨ tewi hepaɨ, xeimetsíe mutaniuka xanetsiekaku, mɨpaɨ tame teputiniuka tita mɨtiyuri taYuútsi heetsíe.

Ketsuútsi temɨʼɨɨkekɨ. Biblia Ketsuútsi pɨtiuterɨwa «keane yuri mutaine metá mɨkatiʼiitawa» (Revelación [Apocalipsis] 3:14). Mɨkɨ putayɨ́ yuPaapa pɨkuxaa, metimatiwakɨ kemɨtitewá, metá peukuyeixɨakai «mɨtitaxaatakɨ tita mɨtiyuri» Yuútsi heetsíe (Juan 17:26; 18:37). ʼAyumieme yuri Yuútsi memayexeiya, Jehová mepɨkuxaatani metá hepaɨna mepɨteʼuyuterɨwani. Mɨpaɨ tepɨteyurié Jehová Niukíeya temɨkuxaata.

• Meripaitɨ tepɨteʼuyuterɨwaakai Bibliatsíe Teyuʼɨɨkitɨwamete ¿Títakɨ teteʼuyuterɨwaaxɨ Jehová Niukíeya temɨkuxaata?

• ¿Kepauka paitɨ warexeiya Jehová heetsiena metekuxaatame?

• ¿Keane matsi waɨkawa pɨtiutaxaa Jehová heetsíe?