Bibliatsíe yuhutatɨ mepaxaxaatsiwa memɨtepareewie xeɨritsikatsíe: «teʼɨɨwiyamete metá wapareewimamete» (Filipenses 1:1). Mɨkɨ taʼiwama waɨkawa xeɨritsikatetsíe mepɨxuawe. ¿Kehepaɨ mepɨtepareewie ʼuukitsi memɨyumaate wapareewiwamete?

ʼUukitsi memɨyumaate mepɨwapareewie. Mɨkɨ ʼuukitsi tsiere waɨkawa Yuútsi Niukíeya mepakumaaté, pepɨyɨwe pemɨtiwatixaatɨani tseepá tita metá ʼaixɨ mepɨteʼuʼuximayata, hiipatɨ mepɨteemari nutsɨ mepɨyumate rí. Mepɨtepareewie tita xeɨritsikatsíe mɨreuyewetsé naitɨ ʼaixɨ mɨtiyemienikɨ, tseepá ʼetsiwa mɨtihɨɨkɨ yatɨtɨ waɨkawa mepɨtepareewie. Mɨkɨ pɨtikuyuruwa ʼuukitsi memɨyumaate matsi waɨká memɨteʼɨɨkitani metá memɨwarutaʼiwatani taʼiwama wakíe.

Kememɨteyurié waɨkawa pɨreuyewetsé. Hiipatɨ ʼaixɨ mepɨtewakuyayatsa metá keane xeɨritsika memutaʼaxe ʼaixɨ ʼiyaari mepɨwaranunanake. Hiipatɨ tá kwikari metá videos mepuukamana, xapate mepɨwatahuritɨwa, tumini xeɨritsikatsíe mepɨʼɨɨwiya metá yamepɨtewakɨhɨawe taʼiwama hakewa niuki memexaatayu. Yaxeikɨ́a tsiere mepɨtepareewie kí temɨwayutixexeɨriwa ʼaixɨ mukuʼitɨariwatsíe metá mepɨwapareewie taʼiwama memɨʼukirawetsixi, ʼuukitsi memɨyumaate mewaʼenietɨ. Tseepá ketiʼaneneeme ʼuximayatsika memɨteʼɨɨhɨritɨarie, xɨka ʼaixɨ ʼiyaari meteʼayeʼatɨwani ʼaixɨ metexeiyarietɨ mepakɨɨné (1 Timoteo 3:13).

Mepɨtekuhekɨata Yuútsi mɨtipiniteyatsíe xewitɨ kemɨtipareewieka. ʼUukitsi memɨyumaate wapareewiwamete mepanuyewawiwa Yuútsi Niukieya maine hepaɨ memɨtekahukɨ. Waxaatsika temɨkuʼeniwatsíe pɨtatsihekawaɨritɨatɨyeika; tewakuxexeiyatsíe Yuútsi Niukíeya mekuxaatame waɨkawa tepeyukatemawietɨkɨka metá naimetsíe memɨtepareewiekɨ pɨtikuyuruwa temɨyɨnɨká teyutemamawietɨ (Efesios 4:16). ʼArike tá mɨkɨ tsiere ʼuukitsi memɨyumaate mepakɨniwawe.

• ¿Kemeteʼuʼiyaari ʼuukitsi memɨyumaate wapareewiwamete?

• ¿Kehepaɨ metekupareewiwa ʼuukitsi memɨyumaate wapareewiwamete, xeɨritsika ʼaixɨ mɨtiyemienikɨ?