Meyuwaɨkawatɨ teuteri meputekuhayeikawa tita yeiyarikate memɨteʼuweiyakai Yuutsitsíe ʼaixɨ memɨkateʼɨɨkitɨariekɨ metá nɨtɨarika memɨkaʼukaxexeiyakɨ. Kamɨtsɨ, ¿Títakɨ peretaʼaxeni Jehová Niukíeya memɨkuxaata memayutixexeɨriwatsíe? ¿Tita mana petikaxeiya?

Mana pepɨwatinɨní teuteri ʼaixɨ meteʼuʼiyaarime metá meteʼuyukanakeʼeriekame. Matɨari Ketsuútsi tɨɨriyamaama, meyɨnɨtɨ́ mepuyukuxexeɨriwakai xeɨritsikate mɨxuawekaitsíe, muwa Yuútsi mepayexeiyakai, Yuútsi Niukieyatsíe mepɨteyutiʼɨɨkitɨwakai metá mepɨyukuwaɨritɨwakai (Hebreos 10:24, 25). Yuʼiwama wahaamatɨa memuyukuxexeɨriwakaikɨ meyunakeʼerietɨ, yuhamikuma hepaɨ mepɨteyuxeiyakai (2 Tesalonicenses 1:3; 3 Juan 14). Tame tsiere mɨpaɨ tepɨtekahú metá wahepaɨ tepɨteyumaate.

Tepɨtehetimaamate Biblia mɨtikuʼɨɨkita hepaɨ temɨtekahuni. Matɨari memɨtekuyuruwakai hepaɨ, ʼuukitsi, ʼuukari metá tɨɨrí tepuyukuxexeɨriwa temɨwakuʼeniwanikɨ teʼɨɨkitamete, temɨtehetiʼenietɨkɨnekɨ ʼɨkitɨarikate Bibliatsíe mayehú, mɨpaɨ temɨtekahunikɨ tatuukaaritsíe (Deuteronomio 31:12; Nehemías 8:8). Yunaitɨ memuyukuxexeɨriwa mepɨyɨwawe yuniuki memɨyetuayani mɨtiutiʼiwauriwatsíe, tsiere kwikari meputinɨawawe, mɨpaɨ mepɨtekuhekɨata yuxexuitɨ titatsíe memɨteʼerie (Hebreos 10:23).

Waɨkawa pɨtatsiʼutitɨrɨkariya Yuútsi heetsíe temɨteʼeriekakɨ. Nɨʼariwame Pablo xeime xeɨritsika ʼipaɨ pɨtiuʼutuiri: «Nepɨxetsihauxeiyamɨkɨ [...] matsi pɨɨtá temayukawaɨritɨatɨkɨkanikɨ teyuxexuitɨ yuri ketemɨteʼeriekɨ, xeheetsíe miemekɨ metá neheetsíe miemekɨ» (Romanos 1:11, 12). Taʼiwama wahaamatɨa temɨteʼutixaxaatatsíe tepekawaɨretɨkɨka yuri temɨteʼerietsíe, mɨkɨ pɨtikuyuruwa temɨkatekuhayeikawani tita temɨteʼayexeiya.

Tematsiʼinié xeɨritsika makamietsíe, mɨpaɨ ʼaxaɨtá pepɨretimaní. Pɨtatsinakeré xɨka peheuyaní. Pepɨkareʼatuani metá tumini pepɨkahetawawiyarieni.

• ¿Ketiutiyɨne taxeɨritsikatetsíe?

• ¿Ketatikupareewiwa taxeɨritsikate?