ʼƗKITƗARIKA 01

¿Biblia kehepaɨ metiupareewiwe?

KETIANEMETSÍE NEMƗREUʼENIEMƗKƗ

Waɨkawa tatuukaritsíe teuyukuʼiwawiya, titakɨ teteukaʼeniwa, tetetakukuwe metá ketiyɨní ʼuxaʼá waarié. Tsiere tepeuyuhɨawe tuukari manuyekɨkatsíe ʼaixɨ tepɨteheuʼiwaku tanuiwarima memɨyutemamawiekakɨ. Waɨkawa teuteri meuteʼakumate kenaame mɨkɨ ʼiwaurikate Bibliatsíe ʼutiʼeiyarɨwa metá tsiere pɨtiwakuʼɨkitɨwa yutuukaritsíe kememɨteyehuuni. ¿ʼEkɨ xeime petimaate Biblia ʼipareewiweme?

1. ¿Keʼaneneme ʼiwaurikate Biblia pɨtiʼeiya?

ʼIwaurikate kwinié rayeʼatɨkaime pɨtiʼeiya ʼikɨ hepaɨ: ¿tuukari kehepaɨ tiuné?, ¿titayari ʼeena teteʼuʼuwa?, ¿títakɨ meteukaʼeniwa ʼaixɨ memɨteuʼiyaari?, ¿ketikuyɨne temɨtakukuwetsíe?, ¿títakɨ naitsarie waɨká kuyaxá tixuawe? metá ¿takwieé keranuyeyaní? Biblia pɨtarahɨawe mɨkɨ heetsíe timieme temɨtehetimaamatekeni, keanerí mɨpaɨ memɨteʼuyuri waɨká mepeuyutemamawie memɨteʼukaxeikɨ.

2. ¿Kehepaɨ tatikupareewiwa Biblia tatuukaritsíe temɨyutemamawiekakɨ?

Biblia ʼaixɨ pɨtatikuʼɨxaatsitɨwa. ʼIkɨ hepaɨ, nuiwarite pɨtiwakuʼɨxaatsitɨwa kehepaɨ memɨteyutemamawieka yutuukaritsíe. Tsiere tarahɨawe kehepaɨ waɨká temɨkateyuʼiyaaritɨaka metá ketemɨteyutemamawieka taʼuximayatsikatsíe. Pemɨtiyemaiximenitsíe peuretimaní kemaine Biblia ʼikɨtsíe metá hiipametsíe timieme. Pepɨretimaní kenaame naitɨ ʼutɨarika tatsɨrí Biblia kemaine hɨɨkɨ «ʼaixɨa mɨtiyurienenikɨ» (2 Timuteu [2 Timoteo] 3:16, 17).

ʼIkɨ xapa Biblia pɨkahɨɨkɨ. Matsi pɨɨtá, metsipareewieni heetsiena pemɨretimanikɨ. ʼAyumieme temetsiʼinié naime pemɨtiutiwawani Bibliatsíe ʼɨkitɨarikate mɨrayemié metá pemɨranuyexexeiyani tita pemɨretimamateke Bibliatsíe.

MATSI WAƗKÁ TINETIMAʼÍ

Teutehetimaní hiipame Biblia kemɨtiwaratipareewixime, ketemɨteʼuyuriwe terɨwarika mɨtatsinakenikɨ metá kemɨtatikupareewiwa xɨka xewitɨ tatsipareewieka temeitiʼenietɨkɨnekɨ.

3. Biblia pɨtatsiʼuwitɨxime

Biblia kɨxeme hepaɨ tahuyetá pɨtatsiuhekɨariwiyarɨme. Mɨkɨkɨ ʼaixɨ tiʼaneneme tepɨteʼanuyewauwé metá tepɨtehetimaiwé ʼuxaʼá waarié kemɨtiyɨní.

Xenakaterɨwa Nɨawari [Salmo] 119:105 metá xeteneutixaata ʼikɨtsíe:

¿Bibliatsíe ketikuʼeriwakai ʼikɨ salmo ʼutɨwame?
¿ʼEkɨtá kepetiyukuhɨawe Bibliatsíe?

4. Biblia pɨtatsikuʼeiya ketemɨteyukuʼiwawiya

Xewitɨ ʼuká pɨretimá kenaame Bibliatsíe ʼeiyarikate rayemié tita mɨtiʼiyaaritɨakai mɨixa wiitaari. VIDEO xeneuxeiya metá xeteneutixaata ʼikɨtsíe:

VIDEO: Pemɨtitakwewie peukatikuhayeikawani (1:48)

¿ʼIkɨ videotsíe ʼuká ketiyukuʼiwawiyakai?
¿Ketipareewi Bibliatsíe mɨtiuyutiʼɨkitɨatɨyatsíe?

Biblia paine tepɨyukuʼiwawiyani. Xenakaterɨwa Mateu [Mateo] 7:7 metá xeteneutixaata ʼikɨtsíe:

¿Titatsíe ʼekɨ pemɨreumaimɨkɨ Biblia metiutaʼeiyawe? Tsipá, ¿ketiʼanenemetsíe?

5. Bibliatsíe terɨwarika teʼitemawietɨ tepakɨɨniwe

Hiipatɨ pɨwanake memititerɨwani metá pɨwakupareewiwa. VIDEO xeneuxeiya metá xeteneutixaata ʼikɨtsíe:

VIDEO: Terɨwarika Bibliatsíe (2:05)

¿Hiipatɨ teemari kemeʼutiyuane terɨwarikatsíe?
¿Títakɨ terɨwarika Bibliatsíe yɨɨkɨ metexeiya?

Biblia pɨtatiyexatɨa tatiukanɨtɨatɨyeikame metá ʼuxaʼá waarié kemɨtiyurieni. Xenakaterɨwa Xumatari [Romanos] 15:4 metá xeteneutixaata ʼikɨtsíe:

¿Metiunakiwe matsi waɨká pemɨretimaní Biblia kemaine nɨtɨarikatsíe metá ʼuxaʼá waarié tita mɨtiʼatɨani?

6. Biblia tepetiʼenietɨyeiwé xɨka xewitɨ tatsiupareewieni

Tseepá hiipatɨ yuxaɨtá memititerɨwa tsiere pɨwakupareewiwa hiipatɨ mewapareewiekaku. Xenakaterɨwa Nɨʼariekate [Hechos] 8:26-31 metá xeteneutixaata ʼikɨtsíe:

¿Tita reuyewetsé Biblia ʼaixɨ temɨtehetiʼenietɨkɨkanikɨ? (Xeneuxeiya kemaine 30 metá 31).

Etíope kiekame pareewiya heuyehɨatɨ́ patɨ́a Bibliatsíe mɨretiʼenietɨyanikɨ. Temeuyeyɨatsíe, waɨká pɨwakupareewiwa Bibliatsíe memɨteyuʼɨkitɨaka hiipatɨ mewapareewiekaku.

HIIPATƗ KEMEMUTIYUANE: «Bibliatsíe netiyuʼɨkitɨatɨ tuukari nepeuyehɨpa».