ʼƗKITƗARIKA 10
¿Kehepaɨ tetehetimaiwé keʼanetɨ yeiyari Yuútsi minaake?
1. ¿Xeime xeikɨ́a Yuútsi yeiyari ʼaixɨ tixeiya?
«Xepɨkawaʼenieka profetatsixi memɨteʼita.» (MATEO 7:15)
Yutɨɨriyama Ketsuútsi pɨwarutaʼɨɨkitɨa xeime yeiyari xeikɨ́a, mɨkɨ yuri yeiyari pɨhɨɨkɨ. Puutayɨ́ kenaame huyé hepaɨ ʼane tuukaari kaxɨɨwemetsíe yaʼaxé, metá puutayɨ́ tsimeyupaɨmetɨ xeikɨ́a teuteri mepikaxeiyakekai (Mateo 7:14). Yuútsi yuNiukitsíe yatarahɨawe kemɨtinaake mayexeiyarieka. Keane memeyexeiya yametekahutɨ meyɨɨnɨtɨ́ yeiyari Yuútsi minaake mepuweiya. Nakaterɨwa Juan 4:23, 24; * 14:6, * metá Efesios 4:4, 5. *
2. ¿Ketsuútsi keʼutayɨ́ hiipatɨ waniu kemeteyurienikekai?
«Meputiyuane kenaame Yuútsi meʼakumate, kememɨteyurietsíe pɨtiyuhekɨ́a mekaʼinakeʼerie.» (TITO 1:16)
Ketsuútsi puutayɨ́ hiipatɨ waniu yeiyari warutaʼɨɨkitɨa mepɨkwiemanikekai. Mɨkɨ meputiyuane kenaame yuri meteʼerie metá Ketsuútsi meʼuweiya, yemeʼutiyuatɨ teuteri mepɨtewaʼitaiya. Tseepá xɨka mɨkɨ yameyɨaka pɨyɨwe mɨretimaaní keane yeiyari yuri mɨhɨɨkɨ, mɨkɨ yeiyaritsíe memɨteʼayexeiya yemepɨtekahú Ketsuútsi mɨtiuʼɨɨkitaxɨ hepaɨ. Nakaterɨwa Mateo 7:13-23. *
3. ¿Keane yeiyari muyuri mepuweiya?
Temɨtehetimaanikɨ kememɨteʼuhú tiʼauxuwime tetenixeiyákuni:
-
Bibliatsíe yuri mepɨteʼerie kenaame Yuútsi Niukíeya hɨɨkɨ. Teuteri waʼɨɨkitɨarika mekwaʼenié matsi pɨɨtá ʼɨɨkitɨarika Bibliatsíe mieme mepɨʼenié (Mateo 15:7-9). Tsiere tá memɨtekɨʼɨɨkita hepaɨ mepɨtekahú. Nakaterɨwa Juan 17:17 * metá 2 Timoteo 3:16, 17. *
-
Jehová xeikɨ́a mepayexeiya metá kemɨtitewá mepikɨʼɨɨkita. Ketsuútsi pɨtiʼɨɨkitaxɨ Paapaya kemɨtitewá metimaatiwakɨ, teuteri pɨtiwarutaxaatɨa Jehovátsie timieme metá pɨtiwarutaʼɨɨkitɨa memɨtewaukakɨ nenewierikatsíe kemɨtitewá mɨtaʼitiyanikɨ (Mateo 6:9). ¿Keane mepeikuxaata Yuútsi kemɨtitewá ʼekɨ pemekatsíe? Nakaterɨwa Juan 17:26 * metá Romanos 10:13, 14. *
-
Mepɨkuxaata kenaame Yuútsi tinɨʼatɨ ʼayaní. Ketsuútsi peyenɨʼarie Kwieépa niuki ʼaixɨ ʼanɨyɨtɨkaime mɨtaxaatakekaikɨ Yuútsi ʼIitsɨɨkame mayeitɨa heetsíe mieme, mɨkɨ ʼiitsɨɨkame xeikɨ́a ʼaixɨ pɨtikuyuriexɨani teuteri kememɨtehauyehɨwá. Mumierietsíe pɨtiutiʼatɨa mɨpaɨ tiwakɨhɨawetɨ (Lucas 4:43; 8:1; 23:42, 43). Yutɨɨriyama pɨtiwarutahɨawixɨ metekuxaatatɨ mepakɨɨnekekai Yuútsi ʼIitsɨɨkame mayeitɨa heetsíe mieme. Xɨka xewitɨ ʼahatsɨa ʼutaʼame metá ʼatiutaxaatɨani Yuútsi ʼIitsɨɨkame mayeitɨa heetsíe mieme, ¿keʼaneme yeiyari ʼuweiyatɨ haɨyɨaneni petikuʼeriwa? Nakaterɨwa Mateo 24:14. *
-
ʼEena kwieépa teuteri haxa memɨteyurié hepaɨ mekwateyurié. Ketsuútsi tɨɨriyamama mekwawaranuyewawa metá mekwawakwitɨwe ʼiitsɨɨkate teuteri (Juan 17:16; 18:36). Teuteri haxa meteyɨkɨhɨawe metá haxa memɨteyurié mekawaʼɨke. Nakaterɨwa Santiago 4:4. *
-
Naitɨ teuteri mepɨwaxeiya kenaame yuri meyunakeʼerie. Yuútsi Niukíeya tiwakɨʼɨɨkitɨwa yunaime teuteri ʼaixɨ memɨtewaxeiyani tseepá kewa mememiemetexi. Yeiyari yuri mekaʼuweiya naimekɨ mepɨtepareewie kuyaxatsíe, kepai tá yuri memuweiya mɨpaɨ mekwatekuyuruwa (Miqueas 4:1-3). Matsi pɨɨtá yuʼiwama mepɨwapareewie tixaɨtɨ mekatewakwewirietɨ naimetsíe kememɨtehauyɨwawe. Nakaterɨwa Juan 13:34, 35 * metá 1 Juan 4:20. *
4. ¿Peretimaiwé keane yeiyari yuri mɨhɨɨkɨ?
¿Keane yamepɨtekakɨká Biblia kemɨtikɨʼɨɨkita, xeime Yuútsi xeikɨ́a meʼayexeiyatɨ? ¿Keane mepikɨʼɨɨkita kemɨtitewá metá kenaame xeikɨ́a Yuútsi ʼIitsɨɨkame mayeitɨa ʼaixɨ tikuyurieni teuteri kememɨtehauyehɨwá? ¿Keʼaneme yeiyaritsíe xeikɨ́a yeme mepɨyunakeʼerie metá kuyaxatsíe mepɨkatepareewie? ¿ʼEkɨ kepetikuʼeriwa? Nakaterɨwa 1 Juan 3:10-12. *
^ párr. 1 Juan 4:23,24: Kanayaʼamɨkɨ tuukaari, metá hiikɨ kanihɨɨkɨtɨni, yurikɨ taYeu memayexeiyanitsíe meʼeyexeiyatɨ menakɨɨnikuni tɨrɨkariya mɨkayuhekɨakɨ metá yurikɨ, taYeu mɨpaɨ meteʼuʼiyaarime mɨwawaunekɨ memeyexeiyanikɨ. Yuútsi tewi pɨhɨɨkɨ kayuhekɨatɨ, keane tá memeyexeiya mepeyexeiyani tɨrɨkariya mɨkayuhekɨakɨ metá yurikɨ».
^ párr. 1 Juan 14:6: Ketsuútsi tinitahɨawé: «Ne huyé nepɨhɨɨkɨ metá mɨtiyuri metá tuukaari. Xewitɨ nePaapa hetsɨa mɨyaʼaní pɨkayɨwe nekɨmana xeikɨ́a.
^ párr. 1 Efe 4:4,5: Xei waiyari pɨxuawe, metá xewitɨ Yuútsi tɨrɨkarieya, xeme xemutaʼinierie hepaɨ xeime ʼimikieri xeikɨ́a xemɨhaɨritɨarienikɨ; xewitɨ ʼUkiyari, xeime ʼɨkitɨarika xeikɨ́a yuri xemɨteʼeriekakɨ, xewitɨ ʼɨɨyari;
^ párr. 2 Mat 7:13-23: »Xeneutahakeni kitenie tsimayewatsíe; kwinié huyé matayewa mɨyaʼaxékɨ mɨreuyehɨiyanitsíe, metá meyuwaɨkawatɨ mɨkɨ ʼutɨa mepeutahake; mexi kitenie tsimayewa metá huyé tsimatayawa tuukaaritsíe mɨyaʼaxé, metá tsimeyupaɨmetɨ xeikɨ́a mepikaxexeiyá. »Xepɨkawaʼenieka profetatsixi memɨteʼiita xehetsɨa memɨyeʼaaxé muxatsi hepaɨ meʼanenetɨ, yɨtaɨta tá ʼɨrawetsixi kwinié memɨteheuhaakakwiku mepɨhɨɨkɨ. Xepɨwaretimaani kememɨteyurietsíe. Hatsuaku kaxié xuyatsíe pɨkakaʼinɨiwa nutsɨ xapa witsaxatsíe, ¿waʼatɨ? Yaxeikɨ́a, naitɨ ʼiteɨri ʼaixɨ mɨʼanetsíe ʼikwaxi ʼaixɨ ʼanenetɨ pɨkayaaxike, ʼiteɨri mɨpɨnitsíe tá ʼikwaxi ʼaixɨ ʼanenetɨ kwaʼukayaaxike; ʼiteɨri ʼaixɨ ʼanemetsíe ʼikwaxi pɨkaʼukayaaxiwe haxa ʼanenetɨ, ʼiteɨri pɨnimetsíe tá ʼikwaxi ʼaixɨ ʼaneetɨ pɨkaʼukayaaxiwe. Naitɨ ʼiteɨri ʼikwaxi ʼaixɨ tiʼaneneetɨ mɨkareukayaxike kanawitekiemɨkɨ metá kanitataiyariemɨkɨ. Mɨpaɨtsɨ́, kememɨteyuriekɨ mɨkɨ ʼuukitsi xepɨwaretimaaní. »Tseepá yunaitɨ menetekɨhɨawe: «ʼUkiyari, ʼUkiyari», hiipatɨ mepɨkahautahaxɨani mɨyuawitsíe makawe ʼiitsɨɨkameyatsíe, matsi pɨɨtá keane nePaapa mɨyuawitsíe makawe hauʼenietɨ yamɨtikamié. ʼAana meyuwaɨkawatɨ mepɨnetetahɨawé: «ʼUkiyari, ʼUkiyari, ¿kepemɨtitewakɨ ʼaixɨ tiʼaneneeme tekateʼutaxá, metá kepemɨtitewakɨ Diablo tɨɨriyamama tekatewarayaxɨri, metá kepemɨtitewakɨ tepɨteʼuhekɨataxɨ xewitɨ yamɨkatiyuriwe hepaɨ?». Metá netiniwaʼeiyamɨkɨ: ¡Hatsuaku nepɨkaxetsihetimá! Nehatsɨa xekwaʼahuni haxa teyuruwamete.
^ párr. 3 Jn 17:17: Newarutiʼiti tita mɨtiyurikɨ; ʼaniuki yuri pɨhɨɨkɨ.
^ párr. 3 2 Tim 3:16, 17: Naitɨ ʼutɨarika xapatsíe Yuútsi ʼineetɨaku yapɨreʼuxa, mɨtatikuʼɨɨkitɨwanikɨ, yamɨtatikɨhɨawenikɨ tita haxa mɨtiʼaane, tatikuʼɨɨkitɨwatɨ tita ʼaixɨ mɨtiʼaane, tita mɨtiheitserie mɨtatiʼɨɨkitɨakakɨ, ʼukí Yuutsitsíe mieme naime tita mɨreuyehɨwá mɨrexeiyanikɨ metá reutamaiwetɨ naime ʼaixɨ mɨtiyurienikɨ.
^ párr. 3 Jn 17:26: Metá ne nepɨtiwarutaʼɨɨkitɨa kepemɨtitewá, metá nepiyaʼɨɨkitaximeni, hiipame memɨwanakeʼeriekakɨ ʼekɨ penetinakeʼerie hepaɨ, metá ne wahaamatɨa nemuyeikanikɨ».
^ párr. 3 Rom 10:13,14: Metá «keane Jehová mɨkuhɨawe nenewierikatsíe ʼikuhɨawetɨ kemɨtitewá mɨkɨ pɨtawikweitsitɨarieni». Metá, ¿kehepaɨ meteʼihɨawé nenewierikatsíe xɨka heetsiena yuri mekateʼerieka? ¿Kehepaɨ yuri meteʼerietɨ mepakɨɨné keane heetsíe memɨkaʼenawawe? ¿Kehepaɨ meteʼená xɨka xewitɨ katiwaraxaxaatɨwani?
^ párr. 3 Mat 24:14: Metá ʼikɨ niuki ʼaixɨ ʼaneneetɨ metá hehékwatɨ pɨkuxaatsieni kenaame Yuútsi titanɨʼani naime kwieepatsíe naitsarie mɨʼenierienikɨ; metá yetiyɨyu katineutiparimɨkɨ.
^ párr. 3 Sant 4:4: Xemuyuwitɨkɨ hiipame wahaamatɨa xemukahiipite, ¿xekateʼamaaté keane kwieetsíe memɨmiemetexi mɨwahamikuta karayuyeitɨwa Yuútsi makaheka? ʼAyumieme, keane mɨwareuhamikutamɨkɨ kwieetsíe memɨmiemetexi kanayuyeitɨwani Yuútsi makaheka.
^ párr. 3 Jn 13:34,35: Nepɨxetsiyetuirie xeime ʼaitɨarika hekwame: xepɨyunakeʼerieka; ne nemɨxetinakeʼerie hepaɨ, xeme tsiere yaxeikɨ́a xepɨteyunakeʼerieka. ʼIkɨtsíe yunaitɨ metenetimaikuni kenaame xeme xehɨɨkɨ netɨɨriyama, xɨka xeyunakeʼerieka».
^ párr. 3 1 Jn 4:20: Xɨka xewitɨ ʼutaineni: «Ne Yuútsi nepeunakeʼerie», xɨka tá yuʼiwá ʼakahekatɨ yehaineni, pɨtiʼitawa. Xɨka yuʼiwá kanakeʼerieka ʼixeiyatɨtɨtɨ, pɨkayɨwe Yuútsi nakeʼerietɨ mayaaní keane mɨkaxeiyawe.
^ párr. 4 1 Jn 3:10-12: Yuútsi niwemama metá Diablo niwemama yaxeikɨ́a mepɨkateyuhekɨkɨa ʼikɨkɨ: Keane naimetsíe tiheitserimekɨ mɨkarayaʼatɨwa Yuútsi heetsíe pɨkaʼayemieme, yaxeikɨ́a keane yuʼiwá mɨkanakeʼerie. Xeme ʼikɨ ʼɨkitɨarika xemuʼenikɨ matɨari paitɨ, tepɨyunakeʼerieka; Caín hepaɨ tepɨkaʼaneni, mɨkɨ Satanás heetsíe kanayeneni metá yumuuta kaniumiení ʼihekatɨ. ¿Títakɨ tá ʼihekatɨ timi? Haxa mɨtiyayurieximekaikɨ, muutaya tá heitseriemekɨ ʼaixɨ pɨtiyeyurieximekai.
