ʼƗKITƗARIKA 2
¿Keane Yuútsi pɨhɨɨkɨ?
1. ¿Títakɨ ʼaixɨ tiʼane Yuútsi temayexeiyani?
Yuútsi naime pɨtiutiwewi. Heyeme puyeika metá hatsuaku kakumawiré (Salmo 90:2). Yuútsi Niukieyatsíe mayemié niuki ʼaixɨ ʼaneneetɨ mɨkɨ pɨniukíeya (1 Timoteo 1:11). Tuukaari tatsipitɨakɨ, ʼaixɨ pɨʼane mɨkɨ xeikɨ́a temayexeiyani. Nakaterɨwa Revelación (Apocalipsis) 4:11. *
2. ¿Yuútsi ketiukaʼiyaari metá teteʼixeiyawawe?
Mɨkɨ kwayuhekɨ́a xewitɨ kwaʼixeiyawe mɨyuawitsíe muyeikakɨ, tahepaɨ kwaʼane mɨkɨ kwinié titɨrɨkaɨye metá kwinié timaaté (Juan 1:18; 4:24). Mɨtiutiwewitsíe tikuhekɨkɨata kemɨtiukaʼiyaari. Mɨtikwaiwa metá tuuturite temɨtekuxexeiyatsíe tepɨtehetimaamateke kenaame tatsinakeʼerie metá kwinié rakumaaté. Tsiere tita mɨyuawitsíe temɨtekuxexeiyá pɨtikuhekɨkɨare kenaame naime tikeema. Nakaterɨwa Romanos 1:20. *
Tsiere tá Yuútsi tepetimaiwé Niukíeya teterɨwatɨ. Maana tarahɨawe kemɨratiyuriexime teuteri wakɨmana, tita mɨtinaake metá tita mɨkatinaake, metá yɨɨkɨ mɨtiyɨatɨnenitsíe kemɨrakaʼerietɨyeika. Nakaterɨwa Salmo 103:7-10. *
3. ¿Yuútsi ketitewá?
Ketsuútsi puutayɨ́: «TaPaapa mɨyuawitsíe pemakawe, kepemɨtitewá yeme ʼaixɨ pɨtixeiyarieka» (Mateo 6:9). Yuútsi waɨkawamekɨ puterɨwarɨwa, tseepá xɨka yatiuterɨwarɨwani xeimekɨ xeikɨ́a pɨtewá. Meyuwaɨkawatɨ memɨxuawekɨ yɨɨkɨ meteʼuniutɨ, hiipatɨ yɨɨkɨ mepɨteʼiterɨwa. Teiwarikɨ mepɨteʼiterɨwa Jehová metá Yavé, wixarikakɨ tsiere pɨtiuterɨwarɨwa Jehová. Nakaterɨwa Salmo 83:18 *(82:19 hiipame Bibliatsíe).
Waɨkawame Bibliatsíe mepekayeitɨa kemɨtitewá, meyuwaɨkawatɨ mepɨteheikuʼutɨa Kakaɨyari metá Tiʼaitame. Tseepá hiipatɨ memekayeitɨa Yuútsi kemɨtitewá, meri Biblia mutaʼutɨarietsíe paxaxaatsiwakai 7,000 paɨmexa. Ketsuútsi teuteri mɨtiwaʼɨɨkitɨakaitsíe Yuutsitsíe timieme, pɨwarutaʼɨɨkitɨa Yuútsi kemɨtitewá. Nakaterɨwa Juan 17:26. *
4. ¿Yuútsi taheetsíe mieme reuyuʼiyaaritɨa?
ʼIkɨ ʼukí ʼeena mɨtiyuriene hepaɨ, mɨpaɨ tsiere Yuútsi pɨraʼeriwa ʼaixɨ temɨteheuʼerieka hiikɨ metá ʼuxaʼa waaríe
Xɨka Jehová tatsinakeʼerieka ¿títakɨ tá tipitɨ́a temɨteʼukaʼeniwani? Hiipatɨ mepɨtekuʼeeriwa kenaame tatsiʼinɨatamɨtɨ yetiyuriene. Mɨkɨ kwatiyuri. Nakaterɨwa Santiago 1:13. *
Jehová tatsipitɨ́a tatuukaaritsíe tita temɨteʼanuyewauní. Yeme ʼaixɨ kaniʼaneni temenayewauní temeyexeiyanikɨ (Josué 24:15). Meyuwaɨkawatɨ teuteri ʼaixɨ tiʼaneneeme mepɨkateʼanuyewawa haxa meteheuyuriekutɨ. ʼAyumieme hiipatɨ mepɨteʼukaʼeniwa, mɨkɨ Jehová kwaʼikunanaake. Nakaterɨwa Génesis 6:5, 6. *
Jehová tatsinakeʼeriekɨ pɨreuyehɨwá teyutemamaawietɨ temuʼuwani, ʼayumieme kwitɨwa pɨtikumaawiriyá tita haxa mɨtatiʼeritɨa. Mɨkɨ xeikɨ́a ramaaté títakɨ mɨtiʼeirie mɨtixuaweni tatiukaʼenitɨwa, ʼɨkitɨarika 8 tsíe pɨtaxaatsieni. Nakaterɨwa 2 Pedro 2:9 * metá 3:7, * 13. *
5. ¿Kehepaɨ tepɨyɨwawe Yuútsi ʼaurié hurawa temuʼuwanikɨ?
Jehová pikunanaake ʼauriena hurawa temuʼuwani nenewierikakɨ teʼikɨhɨawetɨ. Teyuxexuimekɨ peuyuʼiyaaritɨa (Salmo 65:2; 145:18). Tsiere mɨkɨ pɨtareuyehɨwiriwa metá pɨrakumaaté heetsiena mieme ketemɨtekuyuruwa, heiwa tseepá naimetsíe temɨkateʼayaʼatɨwa. Tseepá temɨkaʼayaʼatɨka hamikumaama tepakɨɨniwawe. Nakaterɨwa Salmo 103:12-14 * metá Santiago 4:8. *
Yuútsi xeikɨ́a yeme tepeunakeʼerieka tuukaari mɨtatsipitɨakɨ (Marcos 12:30). Kepauka temɨtehetimaamateketsíe heetsiena metá temikuʼeniwatsíe tepɨtekuhekɨatá kenaame teʼinakeʼerie. Mɨpaɨ teteyurietɨ yeme waɨkawa teʼinakeʼerietɨ tepakɨɨné. Nakaterɨwa 1 Timoteo 2:4 * metá 1 Juan 5:3. *
^ párr. 1 Rev 4:11: ʼEkɨ xeikɨ́a pepɨhɨɨkɨ Jehová, taYuútsi yeme ʼaheetsíe ʼaixɨ mɨtiuxaxaatsiwanikɨ, metá ʼaixɨ ʼaneemekɨ pemɨxeiyarieka kepemɨtitɨrɨkaɨyekɨ, naime piinite pemɨtiutiweewi ʼekɨ mɨpaɨ pemɨtiutanakeʼerikɨ naitɨ yapɨtiuyɨ́.
^ párr. 2 Rom 1:20: Tseepá Yuútsi kayuheekɨ́a kwieé muneetɨarietsíe paitɨ, kepauka teuteri memutiʼeriwa naime mɨtiuneetɨatsíe memɨtexeiya kemɨtiukaʼiyaari, tɨrɨkariya mɨkaxɨwe metá kenaame mɨkɨ yuri Yuútsi hɨɨkɨ, ʼayumieme mepɨkaʼutiyɨwe kenaame Yuutsitsíe yuri mekateʼerie;
^ párr. 3 Sal 103:7-10: Yuhuyé puxeiyatsitɨa Moisés metá Israel niwemama pɨwaruxeiyatsitɨa kemɨtiumié. Jehová mɨtiyupareewiwa tiuyukanenimayatatɨ metá keane yeme memɨteheuyehɨwá wapareewiwa, kwitɨwa kwaʼuyahaʼawé metá mɨtiuyukanakeʼeriekɨ pɨkatiyuʼeʼeiriwa. Tita haxa mutikuʼitɨariwa kwatiyexeiyatɨatɨyaní, heyeme haʼatɨ kwaʼayaní. Haxa temɨteʼuyuri hepaɨ kwatatsikuyuruwa metá pɨkatarakapitɨwa tita taheetsíe mɨtikunaanake temaxɨxɨwekɨ.
^ párr. 4 Sal 83:18: teuteri memɨteʼakumaikakɨ kenaame ʼekɨ xeikɨ́a Jehová petitewá metá xewitɨ pɨkaʼuyeika ʼaheimá ʼakawetɨ kwieepatsíe.
^ párr. 5 Jn 17:26: Metá ne nepɨtiwarutaʼɨɨkitɨa kepemɨtitewá, metá nepiyaʼɨɨkitaximeni, hiipame memɨwanakeʼeriekakɨ ʼekɨ penetinakeʼerie hepaɨ, metá ne wahaamatɨa nemuyeikanikɨ».
^ párr. 6 St 1:13: Xewitɨ ʼinɨatsietɨ pɨkahaineni: «Yuútsi kaneniʼinɨatani». Mɨkayɨwekɨ Yuútsi mɨkuʼinɨnɨatani haxa tiʼaneneemekɨ, mɨkɨ xeime pɨkakuʼinɨnɨatá.
^ párr. 7 Ge 6:5,6: Yatiuyɨku Jehová puunierixɨ ʼukí yeme ʼaixɨ kwatiyeyurieximekai kwieetsíe, metá haxa tiʼaneneemetsíe xeikɨ́a meʼutiʼeerietɨ meniuʼuwakaitɨni tuukaarikɨ. Metá Jehová niuyutiheiwerieni ʼuukitsi mɨwarutiwewiekaikɨ kwieépa, metá yeme ʼiyaarieyatsíe pɨreikwinixɨ.
^ párr. 8 2 Ped 2:9: ʼAyumieme, Jehová pɨramaate kehepaɨ mɨtiwawikweitsitɨani teuteri memeyexeiya memɨʼinɨatsiekatsíe. Metá pɨwaxeɨrié teuteri haxa memɨteʼuʼiyaari wareuyehɨaniké yutuukaari mɨʼatɨanitsíe,
^ párr. 8 2 Ped 3:7: Yaxeikɨ́a niuki ʼanemekɨ yuyuawi metá kwieé hiikɨ mɨtixuawe pɨʼuutsíe titaiyerieni tuukaari mayaʼaní Jehová mɨtayɨnitsíe keane ʼaixɨ mɨtiuyuri keane haxa mɨtiuyuri metá pɨwareuyehɨaní keane meʼeyexeiyatɨ mekaʼakɨ́.
^ párr. 8 2 Ped 3:13: Tepɨtekwewie yuyuawi hehekwame metá kwieé hekwame, mɨkɨ kemutayɨ́ kemɨtiyurienikekai tepɨtekwewie, metá ʼaixɨ mepɨteyeyurietɨkɨné heitseriemekɨ.
^ párr. 9 Sal 103:12-14: Tau manatineikatsíe metá manukayuyuipiketsíe hepaɨ, mɨpaɨ tewa pɨtiuhɨpa tita haxa temɨteʼuyuri. Xewitɨ yuniwema wareunenimayatatɨ hepaɨ, mɨpaɨ tsiere Jehová pɨtiwanenimayá keane ʼaixɨ meteʼixeiyatɨ memeyexeiya. Mɨkɨ pɨramaaté ketemɨteheukuwewiyatɨká, metá yapɨraʼeriwa kenaame kwieé tɨmɨanariyari tehɨɨkɨ.
^ párr. 9 Sant 4:8: Hurawa xekeneyakɨni Yuútsi hetsɨa metá mɨkɨ xehetsɨa hurawa pɨyeyaní. Xeneuyuʼitiexɨaka yumamatetsíe, xemɨʼixɨrikimatɨká, yuʼiyaari xeneutaʼiti, xeme xeʼiyaari manutahuhuta.
^ párr. 10 1 Ti 2:4: mɨkɨ pɨreuyehɨwá naitɨ teuteri yɨɨkɨ meʼanenetɨ memɨtawikweitsitɨarieni metá mɨtiyuri ʼaixɨ memɨtehetimaamateni.
^ párr. 10 1 Jn 5:3: Mɨpaɨ tepɨtehekɨatá kenaame Yuútsi tenakeʼerie: ʼaitɨarikateya teʼenietɨ; metá ʼaitɨarikateya pɨkaʼahehete,
