ʼƗKITƗARIKA 9
¿Kemeyɨatɨ nuiwarite meyutemamaawietɨ mepakɨɨniwawe?
1. ¿Títayari ʼaixɨ tiʼane keane memayukawɨwɨtɨwa memɨteʼayeʼatɨwani ʼiitsɨɨkatari kememɨtewawá hepaɨ?
Jehová pɨraʼeriwa nuiwarite memɨyutemamaawieka, mɨkɨ mɨhɨɨkɨkɨ Yuútsi yutemaawie (1 Timoteo 1:11). Meri teuteri waruneetɨatsíe pɨwarakawɨtɨa. Memayukawɨwɨtɨwatsíe pɨwakupareewiwa yuniwema ʼaixɨ metewaweriyakɨ, ʼaixɨ meteyumaikakɨ metá nuiwaritsíe miemetexi meyutemamaawietɨ mepakɨɨné. Ketsuútsi memuweiya, ʼiitsɨɨkate teuteri nɨʼarikate memexeiya memayukawɨwɨtɨwa heetsíe mieme mepeuʼenieka. Nakaterɨwa Lucas 2:1, * 4, 5. *
Yuútsi kaʼinaake keane memayukawɨtɨa memuyukuʼeʼeiriwani, pɨreuyehɨwá yuhamatɨa xeikɨ́a memukahiipiteni ʼukí yuʼɨya matɨa metá ʼuká yukɨna matɨa (Hebreos 13:4). Jehová pɨtixaneʼerie memɨyukuʼeʼeiriwani (Malaquías 2:16). Yuútsi rixɨ́a pɨtipitɨ́a, xewitɨ mɨkuʼeirieni yukɨna nutsɨ yuʼɨya, tarieka tá xeime mɨtiwitɨni xɨka ʼɨyaaya yakatixaɨ kɨnaaya xeime matɨa ʼukahuní. Nakaterɨwa Mateo 19:3-6, * 9. *
2. ¿Kemeteyurieka memayukawɨtɨa memɨyutemamaawiekakɨ?
Jehová pɨwarutiwewi ʼukí metá ʼuká memɨyupareewiekakɨ meyɨnɨtɨ́ (Génesis 2:18). Keane mɨneɨke yunuiwari muʼuya pɨhɨɨkɨ, ʼayumieme pɨtiwakupinirieka nuiwarieya tita memɨteheuyehɨwá metá pɨtiwaʼɨɨkitɨa yunuiwari Yuútsi heetsíe timieme. Tsiere tá meri yuʼɨyatsíe putiʼeriwani minakeʼeriekɨ yuheetsíe xeikɨ́a kwaʼutiʼerieka. Memayuwitɨkɨ mepɨyunakeʼerieka metá ʼaixɨ ʼanemekɨ mepɨyuxeiyani. Mekaʼayaʼatɨkakɨ, tsiere mepɨtehetimaamateni kememɨteheuyuyehɨwiriwani memɨyutemamaawiekakɨ. Nakaterɨwa Efesios 4:31, 32; * 5:22-25, * 33, * metá 1 Pedro 3:7. *
3. ¿Xɨka ʼaixɨ ʼiyaari mekatiteni memayukawɨtɨa, tiyɨwe memɨyukuʼeirieni?
Xɨka memayukawɨtɨa waheetsíe ʼaixɨ tiʼanetɨ katiyaʼaní, meyunakeʼerietɨ mekwatekuhayeikawani (1 Corintios 13:4, 5). Yuútsi Niukieyatsíe paine xɨka haxa ʼanemetsíe meʼuyahuni mekwaʼuyukuʼeʼeiriwani. Nakaterɨwa 1 Corintios 7:10-13. *
4. ¿Yuútsi tá ketikuʼeeriwa waniwemakɨ?
Jehová pɨtinakeʼerie tɨɨrí meyutemamaawieka. ʼAyumieme teemari tiwaʼɨɨkitɨa meyutemamaawietɨ memuʼuwaanikɨ. Tsiere pɨraʼeriwa meheuʼenanatɨ teemari metá ʼɨimarixi yupaapama waheetsíe memɨtehetimaamatekeni (Colosenses 3:20). Pɨraʼeriwa teemari memɨyutemamaawieka meʼeyexeiyatɨ meheiʼenietɨ metá Niweya tsiere meheuʼenietɨ. Nakaterɨwa Eclesiastés 11:9–12:1; * Mateo 19:13-15, * metá 21:15, 16. *
5. ¿Keane tɨɨrí memɨwareuxeiya kemeteʼuyuriwe waniwema memuyutemamaawiekakɨ?
Tɨɨrí memɨwareuxeiya mepɨteʼuximayaka memɨtewakupiniriekakɨ ʼikwai, hakewa memetiteni metá kemari (1 Timoteo 5:8). Mɨkɨ xeikɨ́a kwatihɨɨkɨ, tsiere pɨtiwaʼɨɨkitɨaka Yuútsi memɨnakeʼeriekakɨ metá heetsiena memɨtehetimaamateni (Efesios 6:4). Xɨka wapaapama Yuútsi menakeʼerieka, waniwema tsiere pɨwapareewieni wahepaɨ memɨtekakɨnekɨ. Yuútsi ʼɨkitɨarikaya pɨwarupareewiwe ʼaixɨ meteyukɨhɨawenikɨ metá ʼaixɨ meteʼukaʼiyaarinikɨ. Nakaterɨwa Deuteronomio 6:4-7 * metá Proverbios 22:6. *
Kepauka waniwema ʼaixɨ memɨtekuyuruwanitsíe, ʼaixɨ mepɨtewakɨhɨaweni. Heiwa mepeuyehɨwá mariʼitsitɨarika metá mɨwakuʼimaiyani haxa memɨkateyuriekakɨ (Proverbios 22:15). Mɨwakuʼimaiyanitsíe kwahauyewetsé kwinié tiwatateʼani metá kwinié mɨtiwatawayani. Nakaterɨwa Colosenses 3:21. *
Jehová Niukíeya memɨkuxaata waɨkawa xapate mepanayenenetɨwa, tɨɨrí metá wapaapama waheetsíe mieme. Mɨkɨ naitɨ xapate ʼɨkitɨarikate Bibliatsíe panayahapanie. Nakaterɨwa Salmo 19:7, * 11. *
^ párr. 1 Luc 2:1: César Augusto mɨʼiitsɨɨkametɨkaitsíe katiniunɨʼani memayukaʼutɨanikekaikɨ meyunaitɨ kwieépa memɨtamakai
^ párr. 1 Luc 2:4,5: Metá yaxeikɨ́a, José, Nazaret mɨrawiya Galilea kwieeyaritsíe yeyaaka kaneyaaní Judea, David kiekarieyatsíe rekutewakaku Belén, David nuiwarieya mɨhɨɨkɨtɨkaikɨ, 5 María matɨa ʼayukaʼutɨanike, memayuwitɨkɨkaikɨ, metá mɨkɨ pɨtiniweximekai rí.
^ párr. 2 Mat 19:3-6: Metá fariseotsixi hurawa meniyakɨɨné meʼiʼinɨatake metá metenitahɨawé: «¿Tiyɨwe ʼukí yuʼɨya mɨkuʼeirieni tseepá tixaɨtɨ karanierekaku?». Katiniuʼeiya, haitɨ: «¿Xekateʼakaterɨwawe matɨari paitɨ mɨwarunetɨa pɨwarutiwewi ʼukí metá ʼuká 5 metá niutayɨní: «ʼAyumieme ʼukí kanikuʼeiriemɨkɨ yupaapa metá yumaama metá yuʼɨya matɨa kanitayarɨmɨkɨ, metá meyuhutatɨ xewitɨ xeikɨ́a menayeikuni?» ʼAyumiemekɨ mepɨkayuhuta rí, mepɨyuxewí xeikɨ́a. ʼAyumieme, Yuútsi mɨwarakawɨtɨa, xewitɨ ʼukí pɨkawarakawenani».
^ párr. 2 Mat 19:9: Ne nepɨxerahɨawe xɨka xewitɨ yuʼɨya ʼukuʼeirieme xeime matɨa ʼutineɨké, haxa pɨtiyurieni xeime matɨa ʼukahuputɨ mayaanikɨ mɨkaʼayukawie matɨa. Xeikɨ́a pikuʼeiriwe, xɨka ʼɨyaaya xeime matɨa rí ʼukahuuní».
^ párr. 3 Efe 4:31,32: Yuʼiyaaritsíe xepɨkateheekani, xepɨkayuhaxɨawieka, xepɨkayukwitɨweni, haxa xepɨkateyutahɨaweni, metá xeteneuhayawa naime haxa mɨtiʼane. Matsi pɨɨtá ʼaixɨ xeketeneuʼiyaarini, xekeneyunenimayaka, metá yeme naime yuʼiyaarikɨ xeteneuyuyahɨwiriwani, yaxeikɨ́a tsiere Yuútsi mɨxereuyehɨwiri hepaɨ Kɨritsitukɨ.
^ párr. 3 Efe 5:22-25: Memɨwiikíe mepɨwareuʼenieka yukɨnaama ʼUkiyari memɨteʼenié hepaɨ, kɨnaaya muʼuuya mɨhɨɨkɨkɨ, tsiere Kɨritsitu hepaɨ xeɨritsika muʼuuya pɨhɨɨkɨ, mɨkɨ hɨɨkɨtɨtɨ ʼikɨtsíe miemetexi wawikweitsɨtɨwame. Yaxeikɨ́a, xeɨritsika Kɨritsitu memɨteheuʼenié hepaɨ, mɨpaɨ tsiere mepɨʼaneni memɨwiikíe yukɨnaama mepɨwareuʼenieka naimetsíe. Xemɨneneɨke, yuʼɨitama xewanakeʼerietɨ xekwatekuhayeikawani, yaxeikɨ́a tsiere Kɨritsitu xeɨritsika mɨtiutanakeʼeri hepaɨ metá kɨmana pɨyuyetua,
^ párr. 3 Efe 5:33: Yaxeikɨ́a tsiere, xeme yuxexuitɨ yuʼɨitama xekenewanakeʼerieka xemɨteheuyunakeʼerie hepaɨ; yaxeikɨ́a tá ʼukaratsi yukɨna yeme ʼaixɨ pɨtixeyani.
^ párr. 3 1 Ped 3:7: Xeme xemɨneneɨke, yaxeikɨ́a tsiere wahaamatɨa xekenetiteni xewaretiʼenietɨkɨkatɨ, kexemɨtehetimaamateke waheetsíe yaxeneyɨaka, ʼuká tekɨxi mɨtariwe hepaɨ pɨʼane. Xeme mɨkɨ wahaamatɨa ʼimikieri tuukaaritsíe mieme xemɨyetuiriyerienikɨ kaxerakemakakutɨtɨ, xɨka mɨpaɨ xekateyurieka xenenewierika pɨkaʼenierieni.
^ párr. 4 1 Cor 7:10-13: Memɨneneɨke nepɨtiwakɨhɨawe -ne nekwahaine, taʼUkiyari pɨɨtá- keʼane mɨwikie yukɨna pɨkaʼukuʼeʼeiriwani; xɨka heyaaní, pɨkaʼutiwikiwani, yakatixaɨ yukɨna matɨa tiutixaatame keʼanuani; kɨnaaya tá yuʼɨya kwaʼukuʼeʼeiriwani. Hiipame tá nepɨtiwarahɨawe -hɨ, ne nepaine, taʼUkiyari hawaikɨ-: Xɨka xewitɨ taʼiwá yuʼɨya yuri katiʼeriekame ʼawitɨkɨni, metá xɨka ʼɨyaaya yuwaɨriyani hamatɨana mukanikɨ, pɨkaʼikuʼeʼeiriwani; metá ʼuká yuri katiʼeriekame matɨa wikieka, metá xɨka yuwaɨriyani kɨnaaya hamatɨana mukanikɨ, pɨkaʼikuʼeʼeiriwani.
^ párr. 5 Ecle 11:9-12:1: Temaikɨ, neyutemawieka mexi petemaikɨ, metá ʼaʼiyaari neuhayawa mɨyutemawiekakɨ pemɨtemaikɨtɨnitsíe. Neuweiyani ʼaʼiyaari huyeya metá neumieni ʼahɨxite kemɨʼatiyewitɨxime. Xeikɨ́a nayeʼeriwani kenaame yuri Yuútsi metitawawirieni ʼikɨ naime heetsiekɨ. ʼAyumieme, haxa mɨtiʼanene ʼaʼiyaaritsíe tineukuyeitɨa metá ʼawaiyari neʼɨwiyani tita mɨtiikwinitɨawetsíe; temaikɨtɨ metá tɨrɨkaɨyetɨ pɨkarayaʼaxé. Nayeʼeriwani, hiikɨ mexi petemaikɨ, yeme ʼaWewiekame heetsíe, mexi tuukaari kaʼayaʼawé petiukaʼeniwatɨ pemayanitsíe, mɨkɨ witaritetsíe ʼayaʼayú pemɨtayɨnitsíe: «Mɨkɨkɨ nepɨkayutemawie rí»;
^ párr. 5 Mat 19:13-15: ʼAriké tɨɨrí hetsɨana meniʼatɨarieni, waheetsíe hautimeeme mɨyutanenewienikekaikɨ; tɨɨriyamama tá meniwarutitiení. 14 Ketsuútsi tá kaniutayɨní: «Tɨɨrí xenewaruhayawa xekawarateʼani, xeniwaruhayawa nehatsɨa memakɨnekɨ, mɨyuawitsíe makawe ʼiitsɨɨkameya heetsíe memɨmiemetekɨ mɨpaɨ memɨʼitɨtɨa». Metá waheetsíe hautimeka, metá kaneyaní.
^ párr. 5 Mat 21:15,16: Sacerdotetsixi metá escribatsixi pɨkawarunakirixɨ memɨteʼuxeitsíe naime kemɨtiuyuri, metá kiitá mɨrayexeiyeriekaitsíe tɨɨrí tɨrɨkarima meniutiniuni meʼutiyuatɨ: «Tepɨyunenewie, ¡Neutawikweitsitɨa, David Niweya!», metá metenitahɨawé: «¿Petiwaʼeníe ʼikɨ kememaitɨká?». Ketsuútsi katiniwarutahɨawé: «Hɨ. ¿Heiwa ʼikɨ xekateʼakaterɨwaxɨ:«Petiuyuri tɨɨrí metá ʼunetsitsixi ʼakɨmama ʼaixɨ memutiyuaneni»?».
^ párr. 6 Deu 6:4-7: »Neuxéi, neuʼena Israel: TaYuútsi Jehová, pɨyuxewí xeikɨ́a Jehová. Metá ʼaYuútsi Jehová naime ʼaʼiyaarikɨ pepinakeʼerieka metá naime ʼatuukaarikɨ metá naime ʼatɨrɨkariyakɨ. Hiikɨ ʼikɨ niuki nemetsihenɨʼairiwa ʼaʼiyaaritsíe kenexeiyani; metá ʼaniwema kenewayeʼɨɨkitɨaximeni mɨkɨtsíe metá newakuxaaxatɨwani mɨkɨ heetsíe mieme ʼakié pemukanitsíe metá huyetá pemumienitsíe metá pekahuiximetɨ metá pemanukukenitsíe.
^ párr. 6 Prov 22:6: Nunutsi neutaʼɨɨkitɨa keʼaneeme huyé muweiyani; kepauka ʼukiratsi mayanitsíe pɨkaʼikuʼeirieni.
^ párr. 7 Col 3:21: Tɨɨrí xemɨwareuxeiya, yuniwema xepɨkawahaxɨatɨaka, mɨkɨ memɨkayuheiweriekakɨ.
^ párr. 8 Sal 19:7: Jehová nɨʼarikaya yeme payaʼaxé, tuukaari ʼaixɨ ʼaneeme kanayeitɨwani.
Jehová ʼɨkitɨarikaya yuri pɨhɨɨkɨ, keane mɨkareutamaiwé timaiweme payeitɨwa.
^ párr. 8 Sal 19:11: Mɨʼatsiʼayexeiya pɨkuʼɨxatsitɨwa; xɨka ʼikuʼeniwani ʼimikieri ʼaixɨ ʼaneme hexeiyatɨ kanayeimɨkɨ.
