ʼƗKITƗARIKA 5
¿Títa reuyehɨatɨ́ Yuútsi Kwieé tiutawewi?
1. ¿Títakɨ Yuútsi Kwieé tiutawewi?
Jehová Kwieé putaawewi teyunaitɨ heetsiena temuʼuwaanikɨ. Adán metá Eva kawarutiwewi mɨyuawitsíe mehetitetɨ memakɨɨnekekaikɨ. Yuútsi yutɨɨriyama rí pɨwareetiwewiekai mɨyuawitsíe memeʼuwanikɨ (Job 38:4, 7). Jehová meri ʼukí putaawewi witsitiuyeʼanekaku Edén tiuyetewaakaku (Génesis 2:15-17). Mɨkɨ metá niwemama pɨwarupitɨa tuukaari kaxɨɨweme mehexeiyatɨ memakɨɨnekekaikɨ ʼeena Kwieépa. Nakaterɨwa Salmo 37:29 * metá 115:16. *
Haaraweri tsipɨyeukai Edén tiuyetewaakaku mɨyemakai. Adán metá Eva tɨɨrí mewarayexeiyatɨ mepakɨɨnekekai, mɨkɨ tá matsi ʼeyeukame haaraweri mepayeitɨanikekai (Génesis 1:28). Kwieé putawewiya teuteri maana memuʼuwanikɨ metá hatsuaku kwahauyehɨiyani. Nakaterɨwa Salmo 104:5. *
2. ¿Títakɨ tá hiikɨ Kwieé haaraweri katihɨɨkɨ?
Adán metá Eva Yuútsi mekaʼuʼenikɨ, Edén mɨtiuyetewakaitsíe mepayeweiyerie. ʼAyumieme Haaraweri peuyewe metá xewitɨ pɨkayɨwe tawaarié haaraweri mayeitɨani. Bibliatsíe paine teuteri haxa memɨteʼuʼiyaari Kwieé mepɨyetuiriyerie (Job 9:24). Nakaterɨwa Génesis 3:23, 24. *
¿Jehová tiuhayewaxɨ rí tita mɨreuyehɨakai teuteri waheetsíe mieme? Hawaikɨ, mɨkɨ naime tikema metá kemutaine pɨrayaʼatɨwa (Isaías 45:18). Matɨari Yuútsi kemɨreunakeʼeriekai teuteri waheetsíe miemekɨ, kwitɨwa mɨpaɨ pɨtiyurieni. Nakaterɨwa Salmo 37:11, * 34. *
3. ¿Kehepaɨ tiʼitɨarieme tawaarié Kwieé Haaraweri payaaní?
Yuútsi, Ketsuútsi ʼIitsɨɨkame mayeitɨa Kwieé haaraweri kwitɨwa payeitɨani. Ketsuútsi Yuútsi tɨɨriyamaama warawitɨtɨ mepɨwareuyehɨaní keane Yuútsi memakaheka tuukaarieya mayaʼanitsíe mɨtiuterɨwarɨwa Armagedón. 1,000 wiitaari peunamieni Satanás haxa mɨtiukaʼiyaari, keane Adán metá Eva tiwaruʼitaiyaku Yuútsi memukaʼanuʼeni. Keane Yuútsi memayexeiya mepɨtawikweni mɨtitayuniyerienitsíe, Ketsuútsi waheimá pɨtanuani pɨwataʼɨwiya, ʼariké tá ʼaixɨ yari meʼuʼuwaatɨ mepakɨɨné tuukaari kaxɨɨweme mehexeiyatɨ Haaraweritsíe. Nakaterɨwa Revelación (Apocalipsis) 20:1-3 * metá 21:3, 4. *
4. ¿Kepauka pɨtikumawiré mɨtatiukaʼenitɨwa?
¿Kepauka Yuútsi pɨtikumawiriyá haxa mɨtiyɨatɨne? Ketsuútsi «yapuutayɨ́» ʼayaʼaxɨmekaku kehepaɨ mɨtiyɨnikekai. Hiikɨ kemɨtiyɨatɨnekɨ teuteri watuukaari pɨkweriwaʼitɨarie maana pɨtikuhekɨkɨare kenaame teʼuʼwa rí «tuukaaritsíe kemɨtiyɨatɨne mɨtikumawirirɨmenitsíe tita mɨtixuawe». Nakaterɨwa Mateo 24:3, * 7-14, * 21, 22. *
1,000 wiitaari Ketsuútsi mɨtitanɨʼanitsíe ʼeena Kwieépa, mɨyuawitsíe paitɨ ʼakaweetɨ pɨtiyamawiriyatɨyaní tita mɨtatiukaʼenitɨwa (Isaías 9:6, 7; 11:9). Tsiere ʼiitsɨɨkame hɨɨkɨtɨtɨ payaaní sumo sacerdote, mɨkɨ panɨyɨne Yuútsi memayexeiya meʼinakeʼeerietɨ pɨwatiʼitieni memɨʼixɨrikimatɨká. Yuútsi, Ketsuútsi pɨtanɨʼani mɨtikumaawiriyakɨ kwiniyate, teuteri warayeitɨanikɨ ʼukirawetsixi mekaʼakɨkame metá mekatakuukuweme. Nakaterɨwa Isaías 25:8 * metá 33:24. *
5. ¿Keane Haaraweritsíe meʼuʼuwaatɨ mepakɨɨné?
Jehová Niukíeya memɨkuxaata memɨwayutixexeɨriwatsíe pepɨwaretimaaní teuteri Yuútsi menakeʼeriekame metá matsi meteheumaikume Yuútsi memeuʼeniekakɨ
Keane Yuútsi memeuʼenié Haaraweritsíe meʼuʼuwaatɨ mepakɨɨné (1 Juan 2:17). Ketsuútsi pɨtiwarunɨʼa keane memiweiya, teuteri ʼaixɨ memɨteʼuʼiyaari mewawautɨweni metewaʼɨɨkitɨatɨ Yuútsi hamikuma memakɨɨnekɨ. Hiikɨ Jehová meyuwaɨkawame pɨtiwaʼɨɨkitɨa Haaraweritsíe meʼuʼuwaatɨ memakɨɨnekɨ (Sofonías 2:3). Jehová Niukíeya memɨkuxaata memɨwayutixexeɨriwatsíe, naitɨ nuiwarite Yuútsi memayexeiya, mepɨtehetimaamateke ʼaixɨ meteʼuʼiyaaritɨ memakɨkanikɨ keane tɨɨrí memɨwareuxeiya metá memɨneneɨke Yuútsi Niukieyatsíe mayemié wapareewiekaku. Nakaterɨwa Miqueas 4:1-4. *
^ párr. 1 Sal 37:29: Keane heitseriemekɨ yememɨtekahú kwieé mehexeiyatɨ mepakɨɨné, metá heyeme meʼuʼuwaatɨ mepakɨɨné heetsiena.
^ párr. 1 Sal 115:16: Yuawitsíe mɨtimieme Jehová pɨtipinieya, metá kwieé ʼuukitsi waniwema pɨwayatuiri.
^ párr. 2 Sal 104:5: Mɨkɨ ʼakutseʼikaku kwieé kaniutayení; kewa meihɨa maana hatsuaku kwakuyuani.
^ párr. 3 Gén 3:23,24: Metá Jehová kaneeyeweiya haaraweeri Edén mɨtiuyetewakaitsíe, ʼukaʼetsatɨ mayanikekaikɨ kwieépa kewa hetituiyaka mutawewiyakaitsíe. Metá ʼariké ʼukí kaniutaweiya metá Edén haaraweeri tau manatineikatsíe kaniwaranuʼuitɨani keruwinitsixi metá rataxikaunitɨ titaatɨ́ pɨranakuwautsekai mɨkareutahatɨrenikɨ huyetá mɨyaʼakai ʼiteɨri tuukaaritsíe mieme.
^ párr. 4 Sal 37:11: Metá keane ʼaixɨ meteʼuʼiyaari kwieé mehexeiyatɨ mepakɨɨné metá heyeme meyutemamaawietɨ mepakɨɨné mɨkatiyukwitɨnenitsíe rí.
^ párr. 4 Sal 37:34: Jehová heetsíe ketinetakwewieka metá huyeya neuweiyani metá mɨkɨ weʼeme pɨʼatsiʼayeitɨani kwieépa pemuyeikanikɨ. Haxa memɨteʼuʼiyaari memauyehɨiyanitsíe, ʼekɨ pepɨwaxeiya.
^ párr. 5 Rev 20:1-3: Metá xeime niuki tuayame nepuxéi yuawitsíe ʼakamiekame yawi ʼakwekame xawatá kwinié maukatewatá mieme metá cadena kwinié tewime ʼahurietɨ. Metá kuu mɨtexierie kaniuwiya, matɨari mieme, kanihɨɨkɨtɨni Diablo metá Satanás, metá 1,000 wiitaari kanihɨani. Metá xawatá kwinié maukatewatá kaneikahɨaní, kaneikanani metá ʼaixɨ katiniunani mɨkawatiyeikanikɨ kiekarite mɨkatiwaʼitaiyanikɨ, 1,000 wiitaari ʼakaxɨyuké yapaɨmexa pɨtaxɨnarieni.
^ párr. 5 Rev 21:3,4: Metá ʼariké niuki tɨrɨkarima nepuʼeni kewa ʼuweni makawetsíe metá kanainekaitɨni: «¡Neuxéi! Yuútsi kiya teuteri watsata kaniuweni metá mɨkɨ wahaamatɨa ʼuyeikatɨ kanayeimɨkɨ, mɨkɨ tá kiekarieya menakɨnikuni. Metá Yuútsi watsata ʼuyeikatɨ kanayeimɨkɨ. Metá naime waʼuukai kanaʼitiexɨamɨkɨ wahɨxita. Tawaarié mepɨkakwiní, mepɨkateʼukakukwiineni. Tita meri paitɨ mɨtimiemétɨkai katinanakayaani rí».
^ párr. 6 Mat 24:3: Yemuri Olivos titewakametsíe yuxaɨtá ʼakakaiku tɨriyamama hurawa meniyakɨné, metá metenitahɨawé: «Yatatineutahɨawi: ¿Kepauka ʼikɨ pɨrayuyaʼatɨani metá ketiyɨatɨneni pemɨnuanitsíe metá mɨkɨ tuukaaritsíe kemɨtiyɨatɨne mɨtikumawirirɨmenitsíe tita mɨtixuawe?».
^ párr. 6 Mat 24:7-14: »País xeime país matɨa meniyutakwikuni metá ʼiitsɨɨkatari hiipame ʼiitsɨɨkatari wahaamatɨa meniyutakwikuni, metá ʼikwai pɨtikumawiré metá kwieé naitsarie kanitayuamɨkɨ. Naitɨ ʼikɨ yamɨtiyɨatɨnenitsíe. katiniyutsutɨamɨkɨ yeme kwikwíniya. »Yaxeikɨ́a xeniyetuiyakuni xemɨtekaʼenitɨarienikɨ metá xepɨkwiʼiwá, metá naitɨ países mepɨxetsiyeheka xemɨnetsiʼuwéiyakɨ. Yaxeikɨ́a tsiere, meyuwaɨká mepekaxɨriyani, metá meteyuʼitaiyatɨ mepakɨɨné metá mepɨyuyehekaxɨani. Meyuwaɨkawatɨ mepanuukuʼuní profetatsixi meteʼiitatɨ, metá yuwaɨká metewaʼitaiya; metá matsi waɨká haxa mɨtiyeyɨximenikɨ meyuwaɨkawatɨ meyunakeʼerietɨ mekwaʼakɨɨné. Keane katikuhayeikawani tineewietɨ haxa mɨtiʼane mɨreuyehɨiyanitsíe paitɨ mɨkɨ pɨtawikweitsitɨarieni. Metá ʼikɨ niuki ʼaixɨ ʼaneneetɨ metá hehékwatɨ pɨkuxaatsieni kenaame Yuútsi titanɨʼani naime kwieepatsíe naitsarie mɨʼenierienikɨ; metá yetiyɨyu katineutiparimɨkɨ.
^ párr. 6 Mat 24:21,22: mɨtitixuawirekɨ yeme kwikwiniya, matɨari paitɨ hepaɨ metá hiikɨ mɨpaɨ kwatiyɨwe kwieépa, hawaikɨ, metá tawarié mɨpaɨ kwatiyɨní. Xɨka mɨkɨ tuukaarite yapauka kaʼutixɨnike xewitɨ kwaʼutawikweiwe; memanuyewawiekɨ tá kwitɨwa mɨkɨ tuukaarite pɨtixɨni.
^ párr. 7 Isa 25:8: ʼIitsɨɨkame Jehová mɨɨkí heyeme pɨkumaweriyá, meyunaime waʼuukai kanaʼitiexɨamɨkɨ metá naime kwieepatsíe pɨtikumawiriyá tita haxa mɨtikuniuwa kiekarieyakɨ, Jehová mɨpaɨ kanaineni.
^ párr. 7 Isa 33:24: Metá xewitɨ kwatayɨnɨ́: «Nepɨreukuye». Teuteri kwieépa meʼuʼuwaatɨ memakɨɨné mepɨtehauyehɨwiyarieni tita haxa memɨteʼuyuri.
^ párr. 8 Miq 4:1-4: Metá tuukaarite tixɨximekaku katiniyɨmɨkɨ Jehová kiyatsíe hɨɨri kwakuyuitɨarieni, metá kwinié neetɨ matsi payaaní naime hɨɨrite pɨwaranutiʼiwa, metá matsi yemurite pɨwaranutiʼiwa metá mɨkɨtsíe meputikɨɨné kiekarite. Teuteri waɨká paisestsíe mieme mɨkɨtsíe mepɨtikɨné metá mepɨtiyuani: «Xenakɨkani, metá Jehová hɨrieyatsíe teputikɨɨné metá Jacob Yuútsieya kié; metá mɨkɨ pɨtatitaʼɨɨkitɨani yuhuyetsíe mieme, metá mɨkɨtsíe teʼuʼuwaatɨ tepakɨɨné». Nɨʼarikaya Sión mayenenikɨ Jehová niukíeya tá Jerusalén. Metá mɨkɨ waɨká kiekaritetsíe kanitayɨmɨkɨ keane ʼaixɨ mɨtiuyuri metá haxa mɨtiuyuri, tewa países tɨrɨkawi mukumanetsíe haxa mɨtiʼane ʼaixɨ pɨrakayurieni. Metá espada payeitɨarieni hararu metá ʼɨɨrɨ́ mɨtɨtɨ tixikame payeitɨarieni. Espadakɨ mekwayutakwini rí país xeime país matɨa, mekwatehetimaani rí kuyaxatsíe. Metá yuxexuitɨ yukaxíe ʼiteɨriyaritɨ́a meputiyaxé metá yuxapa hetɨ́a metá xewitɨ pɨkawatimariuta; Jehová kuuyaxi wanɨʼá mɨpaɨ mainekɨ.
