ʼƗKITƗARIKA 13
¿Kehaine Biblia ketiwayurieni keane Yuútsi mekaʼeyexeiyatɨ yeiyarikate memɨteʼuweiya?
1. ¿Naitɨ yeiyarite Yuútsi tinaake?
Naime yeiyaritsíe teuteri mepuxuawe ʼaixɨ meteʼuʼiyaaritɨ. Yeme ʼaixɨ kaniʼaneni temɨtehetimaamatekɨ kenaame Yuútsi wareuyehɨwá metá wakɨmaana heuyuʼiyaaritɨa. Tepayukaheiwerietɨkɨka kepauka temɨwakuxexeiyatsíe hiipame yeme haxa meteyuriekame meʼutiyuatɨ kenaame Yuútsi meʼayexeiya (2 Corintios 4:3, 4; 11:13-15). Tepɨteʼenana kenaame Yuútsi meʼayexeiya meʼutiyuatɨ mepɨtepareewie kuyaxá metá hiipame yeme haxa mepɨwayurié metewarukaʼenitɨwanikɨ, tɨɨrí mepɨwatiwaayá metá mewaranutsaaná. ¡ʼIkɨ ʼaixɨ pɨkatiwarukaʼeritɨwa teuteri ʼaixɨ memɨteʼuʼiyaari! Nakaterɨwa Mateo 24:3-5, * 11, 12. *
Yeiyari yuri mɨhɨɨkɨ Yuútsi pɨtemawieritɨa metá yeiyari yuri mɨkahɨɨkɨ kwaʼinaake. Maana pɨtikɨʼɨɨkitarɨwa katiyuritɨ Yuútsi heetsíe metá mɨɨkite waheetsíe tita Bibliatsíe mɨkarayemié. ʼAyumieme Jehová pɨtinakeʼerie teuteri memɨtehetimaamateni mɨtiyuri heetsiena mieme. Nakaterɨwa Ezequiel 18:4 * metá 1 Timoteo 2:3-5. *
2. ¿Biblia ketikɨʼɨɨkita yeiyaritsíe mieme ʼuxaʼa waaríe ketiyɨní?
Kenaame meʼeyexeiya memɨtiyuane Yuútsi mekwateʼuʼitaiyawe kenaame meʼinakeʼerie meʼutiyuatɨ metá haxa meteyurietɨ (Santiago 4:4). Naime yeiyari yuri mɨkahɨɨkɨ Biblia pɨtiuterɨwa «Babilonia Tɨrɨkaɨye». Babilonia kiekari patɨ́a muyukatsutɨatsíe yeiyari mɨkayuri, yapɨtiuyɨ́ ʼariké meʼukuhautsitɨarieku Noé muyeikakaitsíe. Kwitɨwa yeiyari mɨkatiyuri tiwaʼitaiya metá teuteri tiwarukaʼenitɨwa Yuútsi pɨtikumawiriyá kwatiwamaritɨani. Nakaterɨwa Revelación (Apocalipsis) 17:1, 2, * 5, * 16, 17 * metá 18:8. *
Jehová kwawaratɨtɨmaiya teuteri ʼaixɨ meteʼuʼiyaaritɨ memuweiya yeiyari kayuri mɨkɨ waranayawawatɨ pɨwaxeɨrié. ¿Ketiwakuxexeɨriwa tá? Mɨtiyuri tiwaʼɨɨkitɨatɨ. Nakaterɨwa Miqueas 4:2 *, 5. *
3. ¿Kemeteʼuyuriewawe ʼaixɨ memuteʼuʼiyaari?
Yuri yeiyari memuweiya xeinuiwari mepakɨɨká
Jehová peuyuʼiyaaritɨa yuri memɨnakeʼeriekɨ metá ʼaixɨ memɨteheuyurieku wakɨmaana. ʼAyumieme Jehová pɨwaʼinié yeiyari mɨkayuri memɨkuʼeirienikɨ. Xɨka yuri meʼinakeʼerieka, kememɨtekuʼeriwatsíe mepɨyuwapá Yuútsi mɨyutemawiekakɨ. Nakaterɨwa Revelación 18:4. *
Ketsuútsi ʼumierieku, tɨɨriyamama Yuútsi Niukíeya memɨkuxaataxɨtsíe waɨkawa teuteri ʼaixɨ meteʼuʼiyaaritɨ mɨkɨ niuki ʼaixɨ yari meputanakeʼeri. Jehová pɨtiwarutaʼɨɨkitɨa kehepaɨ yeme ʼaixɨ memɨtehaukuteni meyutemamaawietɨ metá metetakwewietɨ tita memɨkatexeiyakai. Taame yaxeikɨ́a tsiere Yuútsi Niukíeya tepɨkuʼeniwani Jehová meri tewautɨwetɨ. Nakaterɨwa 1 Tesalonicenses 1:8, 9 * metá 2:13. *
Jehová pɨwanakeʼerie memukuʼeiri yeiyari mɨkayuri meyunaitɨ meyutemamaawietɨ hamikumaama mepakɨɨká, nuiwari mepexeiya tiuyukanakeʼeriekame Jehová meʼayexeiyeme metá tuukaari kaxɨɨweme metakwewiekame. ¿Metikunanaake mɨpaɨ tiʼaneneeme pemɨrexeiyani? Nakaterɨwa Marcos 10:29, 30 * metá 2 Corintios 6:17, 18. *
4. ¿Yuútsi ketiyurieni ʼaixɨ mɨtikɨyɨnikɨ naitsarie Kwieépa meyutemamaawietɨ memakɨɨnekɨ?
^ párr. 1 Mat 24:3-5: Yemuri Olivos titewakametsíe yuxaɨtá ʼakakaiku tɨriyamama hurawa meniyakɨné, metá metenitahɨawé: «Yatatineutahɨawi: ¿Kepauka ʼikɨ pɨrayuyaʼatɨani metá ketiyɨatɨneni pemɨnuanitsíe metá mɨkɨ tuukaaritsíe kemɨtiyɨatɨne mɨtikumawirirɨmenitsíe tita mɨtixuawe?». Metá Ketsuútsi tiniwaruʼeiya, haitɨ: «Xeneyɨʼɨwiyani xewitɨ kataku xetsihauyaxɨrieni; meyuwaɨkawatɨ memahukɨ neheetsíe meteʼitatɨ, metá kenemɨtitewakɨ meʼuyuterɨwatɨ: «Ne Kɨritsitu nepɨhɨɨkɨ», metá meyuwaɨkawame mepɨwareuyaxɨrieni.
^ párr. 1 Mat 24:11,12: Meyuwaɨkawatɨ mepanuukuʼuní profetatsixi meteʼiitatɨ, metá yuwaɨká metewaʼitaiya; metá matsi waɨká haxa mɨtiyeyɨximenikɨ meyuwaɨkawatɨ meyunakeʼerietɨ mekwaʼakɨɨné.
^ párr. 2 Eze 18:4: ¡Neuxéi! Naitɨ tuukaari... ne pɨtinepini. Niwema metá wapaapama watuukaari... ne pɨtinepini. Xɨka xewitɨ ʼaxɨni... yɨkɨɨmana kanimɨmɨkɨ.
^ párr. 2 1 Tim 2:3-5: ʼIkɨ yeme ʼaixɨ kaniʼaneni metá Yuútsi Tatsiwikweitsitɨwame katininaakeni, mɨkɨ pɨreuyehɨwá teuteri yɨɨkɨ meʼanenetɨ memɨtawikweitsitɨarieni metá mɨtiyuri ʼaixɨ memɨtehetimaamateni. Xewitɨ xeikɨ́a Yuútsi muyeikakɨ metá xewitɨ xeikɨ́a yapɨtiyuriewe Yuútsi hetsɨa ʼaixɨ yari teuteri memuʼuwanikɨ, xewitɨ ʼukí, Kɨritsitu Ketsuútsi,
^ párr. 3 Rev 17:1,2: ʼAtahuta niuki tuayamete tekɨxi memuhapakai heetsíe ʼayeneka xewitɨ kaninuani metá nehamatɨa katiniutixaata, kaniutayɨní: «Niwa, nemanixeiyatsitɨamɨkɨ kemɨtixanetsieni ʼuká weʼeme metá meyuwaɨkawame wahaamatɨa mɨyahuixime, haa waɨkawametsíe mayeixá, keane ʼiitsɨɨkate kwieepatari hamatɨana memukahi, metá teuteri kwieépa memuʼuwa winuyakɨ meputitarɨwaitɨarie, ʼikɨ panɨyɨne kenaame meyuwaɨkawame wahaamatɨa ʼukahui».
^ párr. 3 Rev 17:5: Metá kanatana paʼuxakai kemɨtitewá ʼawietɨmekɨ: «Babilonia Tɨrɨkaɨye, hiipame wahaamatɨa memukahiipite watéi metá piinite kwieépa mɨtimieme mɨtixaniʼeriwa».
^ párr. 3 Rev 17:16,17: Metá tamamata ʼaawate pemuxéi, metá yautanaka mariwemetsíe, ʼikɨ ʼuká mepɨyeheka hiipame wahaamatɨa mɨyahuixime metá kayɨweme metá kahaukemarime meʼeyeitɨame mepikuʼeirieni, metá waiyarieya mepɨtikwaní metá naime mepɨtataiyá. Yuútsi waʼiyaaritsíe mɨpaɨ mɨtiwaruʼeritɨakɨ kemɨtiyɨkɨhɨawe yamemɨteyurienikɨ, ʼikɨtsíe xeikɨ́a meʼutiʼeriwatɨ mepakɨɨné: yuʼiitsɨɨkame memɨyetuirienikɨ yeutanaka mɨmaariwe, Yuútsi niukieyatsíe yetiyuyuké.
^ párr. 3 Rev 18:8: ʼAyumieme, xeime tuukaaritsíe xeikɨ́a kwikwiniyateya pɨtinuani: mɨɨkí metá kwikwiniya metá haaka, metá naitɨ pɨtataiyarieni taikɨ, kepaitsɨ Jehová Yuútsi mɨtɨrɨkaɨyekɨ pɨtiitáwawiri kemɨreutiyuriexɨakɨ.
^ párr. 4 Miq 4:2: Teuteri waɨká paisestsíe mieme mɨkɨtsíe mepɨtikɨné metá mepɨtiyuani: «Xenakɨkani, metá Jehová hɨrieyatsíe teputikɨɨné metá Jacob Yuútsieya kié; metá mɨkɨ pɨtatitaʼɨɨkitɨani yuhuyetsíe mieme, metá mɨkɨtsíe teʼuʼuwaatɨ tepakɨɨné». Nɨʼarikaya Sión mayenenikɨ Jehová niukíeya tá Jerusalén.
^ párr. 4 Miq 4:5: Tseepá naitɨ kiekarite yuxexuitɨ meʼuʼuwaatɨ memakɨ́, wayuútsi kemɨtitewá heetsíe; metá taame heyeme tepuʼuwani kemɨtitewá taYuútsi Jehová heetsíe.
^ párr. 5 Rev 18:4: Metá tarieka niuki neniuʼenieni mɨyuawitsíe haineme: «Maana xenanayekɨni, nekiekari, xɨka hamatɨana xekatehaupareewikuni mɨtiʼixɨrikimatsíe, xɨka xekatehauyehɨaká kwikwiniyate heetsiena mɨrayemieme.
^ párr. 6 1 Tes 1:8,9: Pɨtiyuri, xeheetsíe xeikɨ́a pɨkatiyukuxaata Jehová niukíeya Macedonia metá Acaya, matsi pɨɨtá naitsarie pɨyukuxaata yuri kexemɨteʼerie Yuutsitsíe, ʼayumiemekɨ tixaɨtɨ rí pɨkareuyewetsé taame temutiniunikɨ. Mɨkɨ memikuxaatakɨ xehetsɨa matɨari temanɨkɨtsíe mieme metá kehepaɨ xemɨteʼukuʼeiri tita xemɨtewarayexeiyakai Yuútsi yuri mayeniere xeteʼuximayatsiriekutɨ,
^ párr. 6 1 Tes 2:13: Yémekɨ, ʼayumieme taame tsiere tepɨkatekuhayeikawa Yuútsi pamɨpariutsi tetekɨhɨawetɨ, kepauka Yuútsi niukíeya xemanunakixɨtsíe, xetatsiʼuʼenieka, xepitanakeʼeri, ʼukí niukíeya hepaɨ xekwateʼixéi, matsi pɨɨtá yeme Yuútsi niukíeya hepaɨ, yuri heetsiena xemɨteʼerie puxetsiyepareewixime.
^ párr. 7 Mar 10:29,30: Ketsuútsi niutayɨní:«Yuri nepɨxerahɨawe: Xɨka xewitɨ ʼukuʼeirieni kí, nutsɨ yuʼiwama, nutsɨ yumaama, nutsɨ yupaapa, nutsɨ yuniwema, nutsɨ yukwieé, nekɨmanakɨ metá niuki hehekwa ʼaixɨ manɨyɨtɨkakɨ, hiikɨ temuʼuwatsíe cien paɨmexɨa katiniyatuiriyariemɨkɨ: kiite metá ʼiwamarixi metá waɨká maamama, metá waɨká niwema metá waɨká kwieé pɨtiyetuiriyerieni, tseepá xemɨteʼukaʼeniwa metá tita mɨrakamietsíe xepɨteyetuiriyerieni tuukaari kaxɨɨweme.
^ párr. 7 2 Cor 6:17,18: ««ʼAyumieme, watsata xekenanayakɨni metá xekwawanɨɨká -Jehová kanaineni-, metá xekatekumaɨwani tita mɨtikwieema»»; ««ne tá nepɨxetsiʼanunake»». ««Metá ne xepaapa nepayaaní, xeme tá neniwema xepakɨɨné», kanaineni Jehová Naime Mɨtikema».
^ párr. 8 Rev 18:20,21: »¡Kemɨranuyatɨakɨ neyutemawieka mɨkɨ heetsíe, yuawi metá tsiere xeme xemɨtiʼitiya metá Ketsuútsi tɨɨriyama metá profetatsixi, Yuútsi yamɨtayɨkɨ rí kemiyurieni, xekɨmana!». Metá xewitɨ niuki tuayame tɨrɨkaɨyetɨ xeime teté kaniutiʼɨni kwinié yaukame titɨxɨme hepaɨ ʼaneme metá haramaratsíe kaneikahɨaní, ʼutaitɨ: «Mɨpaɨ mexɨiwa tiumiekamekɨ Babilonia kiekari mɨyawa kaneukahɨiyamɨkɨ tetɨata paitɨ metá hatsuaku pɨkakaxeiyarieni.
^ párr. 8 Rev 21:3,4: Metá ʼariké niuki tɨrɨkarima nepuʼeni kewa ʼuweni makawetsíe metá kanainekaitɨni: «¡Neuxéi! Yuútsi kiya teuteri watsata kaniuweni metá mɨkɨ wahaamatɨa ʼuyeikatɨ kanayeimɨkɨ, mɨkɨ tá kiekarieya menakɨnikuni. Metá Yuútsi watsata ʼuyeikatɨ kanayeimɨkɨ. Metá naime waʼuukai kanaʼitiexɨamɨkɨ wahɨxita. Tawaarié mepɨkakwiní, mepɨkateʼukakukwiineni. Tita meri paitɨ mɨtimiemétɨkai katinanakayaani rí».
