ʼƗKITƗARIKA 7
¿Ketinɨʼatɨ Yuútsi payaaní?
1. ¿Ketinɨʼatɨ Yuútsi payaaní?
¿Títayari teteʼutiyuawe kenaame Ketsuútsi hauyewetsé mɨtinɨʼaka? (MARCOS 1:40-42)
Xeime ʼiitsɨɨkame payeitɨa mɨyuawitsíe, mɨkɨ ʼiitsɨɨkamekɨ kwitɨwa ʼiitsɨɨkate pɨwapata rí metá pɨrayaʼatɨani tita Yuútsi mɨreuyehɨwá Kwieépa metá mɨyuawitsíe. Yuútsi ʼIitsɨɨkame mayeitɨa yeme teyunaitɨ tepeuyehɨwá, meyunaime teuteri ʼaixɨ meteyuxeiyame mɨwarayeitɨanikɨ naime Kwieepatsíe. ¿Waʼatɨ yeme ʼikɨ niukite ʼaixɨ ranuyɨtɨká? Nakaterɨwa Daniel 2:44; * Mateo 6:9, 10, * metá 24:14. *
Mɨtiwayenɨʼariwatsíe peuyewetsé xewitɨ mɨtinɨʼaka, ʼayumieme Jehová yuNiwé Ketsuútsi panayehá tinɨʼaatɨ mayanikɨ. Nakaterɨwa Revelación (Apocalipsis) 11:15. *
2. ¿Títakɨ yeme ʼaixɨ tiʼaane Ketsuútsi mɨtinɨʼaka?
Yuútsi Niweya yeme ʼaixɨ katiniukaʼiyaarini ʼiitsɨɨkame mɨhɨɨkɨtɨni mɨtiuyukanenimayakɨ metá mɨkɨ yunaime yaxeikɨ́a ʼanemekɨ kaniwareupareewiemɨkɨni (Mateo 11:28-30). Tsiere tá pɨyɨwe tɨrɨkariya mexeiyakɨ teuteri wapareewieni ʼeena Kwieépa mɨyuawitsíe paitɨ tinɨʼatɨ. Ketsuútsi ʼanutanieritɨarieka mɨyuawitsíe kaneyaní, maana Yuútsi ʼaurié pɨtiukwewi tinɨʼatɨké mayanikekaikɨ (Hebreos 10:12, 13). ʼAriké, Yuútsi ʼIitsɨɨkame kaneyeitɨani. Nakaterɨwa Daniel 7:13, 14. *
3. ¿Ketsuútsi haamatɨa tsiere hiipatɨ metenɨʼatɨ meteʼakɨɨné?
Bibliatsíe paine Yuútsi memayexeiya meyunaitɨ mekwatetanɨʼani Ketsuútsi haamatɨa tsimeyupaɨmetɨ xeikɨ́a. Daniel 7:27 tsíe mepɨteʼuterɨwarɨwa memɨkakwiemarietɨká. Matɨari Ketsuútsi haamatɨa memukuʼuwakai Yuútsi pɨwaranuyawau memɨkakwiemarietɨká memɨhɨɨkɨtɨnikɨ. Hiikɨ temuʼuwaatsíe Jehová yaxeikɨ́a pɨtiyuriene, pɨwaranuyewawa ʼuukitsi metá ʼuukari yuri heetsiena memɨteʼerie memɨkakwiemarietɨká memakɨɨnekɨ. Yaxeikɨ́a Ketsuútsi hepaɨ mɨyuawitsíe mepekɨɨká metakuukuwetsíe metá mekayuhekɨkɨatɨ mepakɨɨká. Nakaterɨwa Juan 14:1-3 * metá 1 Corintios 15:42-44. *
¿Kemeyupaɨmetɨ mɨyuawitsíe mepɨyehú? Biblia paine mekayuwaɨkawa, Ketsuútsi tiwaruterɨwaxɨ «muxatsi tsimemɨyupaɨme» (Lucas 12:32). 144,000 meyupaɨmetɨ Ketsuútsi haamatɨa metenɨʼatɨ mepakɨɨné Kwieepatsíe. Nakaterɨwa Revelación 14:1. *
4. ¿Ketiuyɨ́ kepauka Ketsuútsi ʼIitsɨɨkame mayeitɨarietsíe?
1914 Ketsuútsi ʼIitsɨɨkame mayeitɨarietsíe, meri mɨyuawitsíe Satanás metá tɨɨriyamaama ʼeena Kwieépa pɨwarakaxɨri. * ʼAyumieme Diablo kwinié tihaʼatɨ haxa pɨtiyeyurietɨya naime Kwieepatsíe (Revelación 12:7-10, 12). Yemɨtiuyɨtsíe paitɨ yeme ʼaixɨ tiʼaneneetɨ kwatixuawe Kwieé waɨkawa putayuane, kuyaxá putixuawirixɨ, waɨkawa kwiniyate metá haaka katiniutixuawiré. Hiikɨ naitɨ yemɨtiyɨatɨnekɨ pɨtikuhekɨkɨare kenaame Yuútsi ʼIitsɨɨkame mayeitɨa kwitɨwa tinɨʼatɨ rí ʼayaaní naime Kwieepatsíe. Nakaterɨwa Lucas 21:7, * 10, 11, * 31. *
5. ¿Yuútsi ʼIitsɨɨkame mayeitɨa hiikɨ ketiyuriene metá ʼuxaʼa waarié ketiyurieni?
Yuútsi Niukíeya mukuxaaxatsiwakɨ naime Kwieepatsíe, Yuútsi ʼIisɨɨkame mayeitɨa waxeɨrie rí «meyuwaɨkawa teuteri» naitsarie kiekatari. Meyuwaɨkawatɨ ʼaixɨ memɨteʼuʼiyaari Ketsuútsi meʼenietɨ mepakɨɨká, kepauka haxa mɨtiʼaane mɨtikumawiriyatsíe Yuútsi ʼIitsɨɨkame mayeitɨa mɨkɨ naime pɨwatawikweitsitɨani. ʼAyumieme, xɨka teteheuyehɨaká naime kemɨtiyurieni, Ketsuútsi teheuʼenietɨ tepuʼuwaani. Nakaterɨwa Revelación 7:9, * 14, * 16, 17. *
Yuútsi ʼIitsɨɨkame mayeitɨa mɨhekɨaretsíe tinɨʼatɨ katinikatsutɨamɨkɨ, Yuútsi kemɨtikuʼeriwakai teuteri waheetsíe miemekɨ metá Kwieé haaraweri kanayeitɨariemɨkɨ yetiyurienetɨ kanayaʼatɨariemɨkɨ 1,000 wiitaari tinɨʼatɨ. Kwinatɨrieka rí Ketsuútsi naime yuPaapa katiniyetuiriemɨkɨ, Mɨkɨ xeikɨ́a tinɨʼatɨ mayaanikɨ (1 Corintios 15:24-26). ¿Metikunanaake mɨpaɨ xeime pemɨtiuxaatɨani kemɨtiyurieni Yuútsi ʼIitsɨɨkame mayeitɨa? Nakaterɨwa Salmo 37:10, 11, * 29. *
^ párr. 1 Dn 2:44: »Metá kepauka mɨkɨ ʼiitsɨɨkate memɨtenɨʼakatsíe, Yuútsi mɨyuawitsíe kiekame ʼiitsɨɨkame panukakení mɨkɨ nɨʼarikaya wakwaʼuʼaní. Metá ʼikɨ ʼiitsɨɨkametsíe hatsuaku teuteri mekatetanɨʼani. Meyunaime ʼiitsɨɨkate kaniwareuyehɨamɨkɨ, metá mɨkɨ xeikɨ́a tinɨʼatɨ heyeme kanayeimɨkɨ;
^ párr. 1 Mat 6:9,10: »Xemetsɨ mɨpaɨ xepɨteyukuneneewiwani:» «TaPaapa mɨyuawitsíe pemaakawe, kepemɨtitewá yeme ʼaixɨ pɨtixeiyarieka. ʼEkɨ ʼeena ketineutanɨʼa. Yaketiuyɨní tita pemɨreuyehɨwá, mɨyuawitsíe mɨreyɨatɨne hepaɨ, mɨpaɨ tsiere pɨtiyɨatɨneni kwieepatsíe.
^ párr. 1 Mat 24:14: Metá ʼikɨ niuki ʼaixɨ ʼaneneetɨ metá hehékwatɨ pɨkuxaatsieni kenaame Yuútsi titanɨʼani naime kwieepatsíe naitsarie mɨʼenierienikɨ; metá yetiyɨyu katineutiparimɨkɨ.
^ párr. 2 Rev 11:15: ʼAtahutarieka tá niuki tuayame yutrompeta niutahɨtsieni. Mɨyuawitsíe tá tɨrɨkarima menetiniuni mehaitɨkaitɨ́: «TaʼUkiyari ʼiitsɨɨkame kanayaní naime kwieepatsíe metá Kɨritsituya, metá mɨkɨ heyeme tinɨʼatɨ kanayeimɨkɨ ʼiitsɨɨkame hepaɨ».
^ párr. 3 Dn 7:13,14: »Tɨkaarikɨ mɨtiuyuhekɨarixɨ netiniyexeiyatɨyaní, metá ¡neuxéi!, yuawitsíe pakamiekai xewitɨ haiwitsíe yewetɨ ʼukí niweya hepaɨ tiyuhekɨatɨ; metá puyɨwékaxɨa ʼUkiratsi hetsɨa mɨyaʼakɨ metá Mɨkɨ hɨxie hurawa pɨyexaatsie. Metá mɨkɨ katiniyetuiriyarieni mɨʼiitsɨɨkametɨnikɨ, metá ʼaixɨ mɨtiuxaxaatsiwanikɨ heetsiena, metá mɨtinɨʼakakɨ kiekaritetsíe, países, metá naitɨ yɨɨkɨ memɨteʼuniuka memeiʼeniekakɨ. Heyeme pɨtitanɨʼani, hatsuaku pɨkatihayewa metá ʼiitsɨɨkameya pɨkahauyehɨiyani.
^ párr. 4 Jn 14:1-3: «Xeʼiyaari pɨkamaaka. Yuri xeteneʼerieka Yuútsi heetsíe, neheetsíe tsiere yuri xeteneʼerieka. NePaapa kié waɨkawa pexuawe kewa xemetiyaxé. Xɨka mɨpaɨ kareʼanenike, mɨpaɨ nepɨkaxetitahɨawekekai, kewa xemeyukuhayawakɨ ʼaixɨ nepɨrekuyurieni. Yaxeikɨ́a, xɨka nehuyé ʼutɨa neheyaní metá ʼaixɨ nereekuyurieni kewa xemetiyaxe, tawaarié nepamié metá kiepa ne nepɨxetsiʼanunake, xeme tsiere nehamatɨa xemeʼuwanikɨ kewa nemeyeika.
^ párr. 4 1 Cor 15:42-44: ʼIpaɨ tsiere kaniʼaneni mɨɨkite memanukuʼuitɨarienitsíe. Mukaʼetsie tipɨniwetɨ, panukukeni katipɨniwetɨ. Mukaʼetsie ʼaixɨ katixeiyarietɨ, panukukeni witsiʼanetɨ. Mukaʼetsie katɨrɨkaɨyetɨ, panukukeni tɨrɨkaɨyetɨ. Mukaʼetsie waiyari hekɨatɨ, panukukeni waiyari kayuhekɨatɨ. Xɨka waiyari hekɨatɨ xuaweni, tsiere pɨxuawe kayuhekɨatɨ.
^ párr. 5 Rev 14:1: Metá neniuxeiya, ¡neuxéi!, yemuri Siontsíe Muxá pawekai metá hamatɨana 144,000 meyupaɨmetɨ, yukanaata meʼeʼutɨatɨ kemɨtitewá mɨkɨ metá Paapaya.
^ párr. 6 Xɨka matsi waɨkawa pereumaimɨkɨni kemɨtiuyɨ́ 1914, manayaxaxaatsiwa Bibliatsíe pemɨretimaanikɨ neutiwawá xapa ¿Qué nos enseña la Biblia? página 215 ʼutiʼakamé 218 paitɨ.
^ párr. 6 Luc 21:7: ʼAana menitaʼiwawiya, metehehɨawetɨ: «Tiʼɨɨkitame, ¿kepauka ʼikɨ pɨrayuyaʼatɨani metá tita tiyuhekɨare ʼikɨ yamɨtiyɨnitsíe?».
^ párr. 6 Luc 21:10,11: Tsiere tiniwarutahɨawé: «Kiekarite ʼemɨyeyeu mekaniyutakwikuni meʼayukaʼuunietɨ, metá ʼiitsɨɨkatari mekaniyutakwikuni; metá waɨkawa kwieé ʼutayuatɨ kanayeimɨkɨ, metá naitsarie kwiniya pɨtawení metá ʼikwai pɨtikumawiré; metá haxa pɨtiyɨ́atɨneni xemɨtimaamanikɨ, metá mɨyuawitsíe waɨkawa pɨtihekɨare.
^ párr. 6 Luc 21:31: Xeme tsiere yaxeikɨ́a, yetiyɨatɨneme xemɨtexeiyanitsíe, xetenakumaiká kenaame Yuútsi ʼiitsɨɨkame mayeitɨa kareutere rí.
^ párr. 7 Rev 7:9: Metá ʼariké ʼikɨ ʼutɨa netiniuxeiya, ¡neuxéi!, meyuwaɨkawa teuteri, xewitɨ ʼukí warutiʼinɨatá kwayɨwekai, naitɨ kwieépa memɨtaama metá nuiwarite metá kiekarite metá yɨɨkɨ memɨteʼuniuka, ʼuweni hɨxie menitiʼukaitɨni metá Muxá hɨxie, kemari tɨtɨɨme tuxame meʼanakatɨtɨkaitɨ́; metá takɨ́ xawariyari meʼuhurietɨ.
^ párr. 7 Rev 7:14: Ne ʼaana yapauka netinitahɨawé: «Ne ʼUkiyari, ʼekɨ xeikɨ́a pepɨrakumaaté». Metá kanetiniutahɨawé: «ʼIkɨ mepɨhɨɨkɨ yeme kwikwiniyatsíe memayenexɨa metá yukemari mɨtɨtɨ meniutiʼekwa metá menitituxariyá Muxá xuriyayatsíe.
^ párr. 7 Rev 7:16,17: Mepɨkaheuhakakwikuni rí metá mepɨkaheuharikuni, tau kwawatixɨrimɨtɨani, mekwahauxɨrikwikuni, Muxá ʼuweni ʼaurié muwe mɨwataʼɨwiyakɨ, metá pɨwaranuwitɨni haixa tuukaari mɨyetuá mukuwɨtɨkatsíe. Metá Yuútsi naime waʼuukai kanaʼitiexɨamɨkɨ».
^ párr. 8 Sal 37:10,11: Metá pɨkareutere rí, haxa memɨteʼuʼiyaari meʼuʼuwaatɨ rí mekwaʼakɨɨné; pepɨnieré kewa memeʼuwakai metá maana mepumawini rí. Metá keane ʼaixɨ meteʼuʼiyaari kwieé mehexeiyatɨ mepakɨɨné metá heyeme meyutemamaawietɨ mepakɨɨné mɨkatiyukwitɨnenitsíe rí.
^ párr. 8 Sal 37:29: Keane heitseriemekɨ yememɨtekahú kwieé mehexeiyatɨ mepakɨɨné, metá heyeme meʼuʼuwaatɨ mepakɨɨné heetsiena.
