ʼƗKITƗARIKA 4
¿Keane Ketsuútsi pɨhɨɨkɨ?
1. ¿Ketsuútsi tuukaarieya kehepaɨ tiuyutsutɨa?
¿Ketsuútsi ketiukaʼiyaarikai metá teuteri ʼauriena kemeteyumaikai? (MATEO 11:29; MARCOS 10:13-16)
Ketsuútsi teuteri wahepaɨ kwaʼaane, ʼakuxi katinuiwawetɨ ʼeena Kwieépa mɨyuawitsíe peyeikakai niuki tuayame hepaɨ ʼaneetɨ (Juan 8:23). Jehová, Ketsuútsi meri petawewi, Ketsuútsi tá Jehová pepareewi naime mɨtiunetɨatsíe. Bibliatsíe pɨtiuterɨwarɨwa Yuútsi Niweya «mɨyuxewí» mɨkɨ xeikɨ́a Jehová yuxaɨtá mitawewikɨ (Juan 1:14). Tsiere pɨtiuterɨwarɨwa «Niuki» Jehovátsie mieme mutaniukakaikɨ. Nakaterɨwa Proverbios 8:22, 23, * 30 * metá Colosenses 1:15, 16. *
2. ¿Títayari Ketsuútsi reukuyeixɨa ʼeena Kwieépa?
Yuútsi yuniwé peyenɨʼa ʼeena Kwieépa xeime ʼɨimari ʼukí matɨa kakahuiwekametsíe pikaye, ʼayumieme Ketsuútsi ʼukí kwaniweya. Mɨkɨ ʼɨimari pɨtitewakai María metá Judá pɨkiekaametɨkai (Lucas 1:30-35). Peukuyeixɨa tihaikame rayaʼatɨanike: (1) titaʼɨɨkitake tita mɨtiyuri Yuutsitsíe, (2) temitaʼɨɨkekɨ mɨkɨ Yuútsi kemɨreuʼeniekai, tseepá haxa temɨteʼanuyekɨká, metá (3) yutuukaari ʼayaʼakamé yatuánike keane heetsiena yuri memɨteʼerie «mɨwatawikweitsitɨanikɨ». Nakaterɨwa Mateo 20:28. *
3. ¿Títayari tiwikweitsitɨwame teteheuyehɨwá?
Tiwikweitsitɨwame pɨyɨwe mɨrayukatuani xewitɨ tewi kakumimieriwanikɨ (Éxodo 21:29, 30). Hiikɨ ʼukirawetsixi tepakɨká metá tepɨtakuukuwe, Yuútsi pɨkatatsiʼutiwewi mɨpaɨ temɨkuyɨnenikɨ. Mɨkɨ tepɨteʼamaaté Jehová Adán mɨtiutahɨawixɨkɨ xɨka ʼaxɨɨnike, yakatixaɨ xɨka kaʼanuʼenake, pɨmɨnikekai (Génesis 2:16, 17; 5:5). Biblia paine, mɨɨkí «kaniuneni» Adán yamɨtikatɨakɨ kaʼanuʼenaka. Adán yuniwéma yatiʼaneeme tiwarukuhayewirikɨ, ʼayumieme hiikɨ tepɨyekwixime. Yatiuyɨku teyunaitɨ tepeuyehɨwá wikweitsitɨarika. Nakaterɨwa Romanos 5:12 * metá 6:23. *
¿Keane xeikɨ́a rayukatuame tatsitawikweitsitɨanikekai temɨkatakuukuwenikɨ? Temɨtakuukuwetsíe tepɨteʼayukatuaya temaxɨxɨwekɨ. Tekaʼayaʼatɨkakɨ tekwayɨwawe xeime temɨtawikweitsitɨani xɨka ʼaxɨni. Nakaterɨwa Salmo 49:7-9. *
4. ¿Títakɨ Ketsuútsi tiyuyetua takɨmaana?
Ketsuútsi tahepaɨ kwaʼanekai mɨkɨ ʼaxɨka kwaʼɨmɨ́, matsi pɨɨtá yutuukaari pɨyetua tatsitawikweitsitɨanike mɨkɨ hatsuaku kwaʼaxɨ́. Yuútsi pɨtiuhekɨataxɨ kemɨtareuyehɨwá, yuniwé meyanɨʼakɨ yutuukaari mɨyetuanikekaikɨ takɨmaana. Yaxeikɨ́a tsiere Ketsuútsi pɨtiuhekɨataxɨ kemɨtareuyehɨwá yuPaapa manuʼenitsíe metá yutuukaari mɨyetua tatsitawikweitsitɨanike temɨkatakuukuwenikɨ. Nakaterɨwa Juan 3:16 * metá Romanos 5:18, 19. *
5. ¿Hiikɨ temeuyeyɨatsíe Ketsuútsi ketiyuriene?
Ketsuútsi Kwieépa muyeikakaitsíe tekwikwíkate waranayexɨri, mɨɨkite waranukuʼuitɨa metá wapareewiekai keane memɨteʼukaʼeniwakai, mɨpaɨ pɨtiuhekɨataxɨ ʼuxaʼa waarié kemɨtiyurieni, Yuútsi mekaʼukuʼeʼeiriwatɨ memeyexeiya wakɨmaana (Mateo 15:30, 31; Juan 5:28). Ketsuútsi mumɨtsíe, Yuútsi penutanieritɨa metá tuukaari piyetuiri mɨyuawitsíe heyeikatɨ mayanikɨ kayuhekɨatɨ (1 Pedro 3:18). Ketsuútsi pɨtiukweewi yuPaapa ʼaurié ʼutiwetɨ mɨtiyetuiriyerienikekaikɨ tinɨʼaatɨ mayanikɨ ʼeena naime Kwieepatsíe (Hebreos 10:12, 13). Hiikɨ Ketsuútsi pɨrenɨʼá mɨyuawitsíe metá keane memiweiya naime kwieepatsíe niuki ʼaixɨ ʼaneme mepɨkuxaata mɨkɨtsíe mieme. Nakaterɨwa Daniel 7:13, 14 * metá Mateo 24:14. *
Yuútsi ʼIitsɨɨkame meyeitɨakɨ, ʼikɨ ʼIitsɨɨkame kwinié titɨrɨkaɨye kwitɨwa pɨwareuyehɨaní teuteri haxa memɨteʼuʼiyaari metá tita haxa memɨteyurié. Keane yuri memɨteʼerie Ketsuutsitsíe meheiʼenietɨ meyutemamaawietɨ meʼuʼuwaatɨ mepakɨɨné Kwieé haaraweri ʼayeitɨarieyu. Nakaterɨwa Salmo 37:9-11. *
^ párr. 1 Prov 8:22,23: Jehová matɨari paitɨ pɨnetsiʼutawewi yuhuyetsíe, meri paitɨ tixaɨtɨ ʼakuxi katitiwewiwetɨ. Kewa nemakawe mɨkɨ meri paitɨ yapɨnetiuke, meri paitɨ ne meri nekaniunetɨarieni, kwieé ʼakuxi kanetɨariewekaku.
^ párr. 1 Prov 8:30: ne ʼaana ʼauriena neʼutiwetɨ nepatɨ́a yeme ʼaixɨ mɨtiuʼuximayata hepaɨ, metá nepatɨ́a naime tuukaaritetsíe mɨkɨ keane matsi yeme mɨnakeʼeriekai, metá hɨxiena neʼuyeikatɨ heyeme nepɨyutemawiekai,
^ párr. 1 Col 1:15,16: Mɨkɨ pɨhekɨata Yuútsi mɨkayuhekɨ́a, naitɨ piinite katinetɨariewekaku mɨkɨ meri putawewiya; kɨmanakɨ naitɨ piinite tiniunetɨarieni mɨyuawitsíe metá kwieepatsíe, piinite mɨtiyuhekɨkɨa metá mɨkatiyuhekɨkɨa, tseepá memɨhɨɨkɨ ʼuwenitsíe mematei, weʼeemete, ʼiitsɨɨkate, memɨtenɨʼá. Naitɨ piinite pɨtiutiwewiya kɨmana metá heetsiena mieme.
^ párr. 2 Mat 20:28: ʼUkí nuʼaya hepaɨ, pɨkanúa mɨtiyatuiriyeriekakɨ, matsi pɨɨtá mɨtiyatuakakɨ metá yutuukaari yatuánike meyuwaɨkawame mɨwatawikweitsitɨanikɨ».
^ párr. 3 Rom 5:12: ʼAyumieme, xeime ʼukikɨ kaniuneni mɨtiʼixɨriki naime kwieepatsíe, metá mɨɨkí kanayemiemetɨni mɨtiʼixɨrikiyatsíe, ʼayumieme naime ʼuukitsi watsata mɨɨkí kaneutayeixɨani yunaitɨ memɨʼixɨrikimatɨkateikɨ.
^ párr. 3 Rom 6:23: Mɨɨkikɨ pɨrayukatuaya mɨtiʼixɨrikima, ʼimikieri tá Yuútsi mɨyetúa pɨhɨɨkɨ tuukaari mɨkaxɨɨwe Kɨritsitukɨ Ketsuútsi taʼUkiyari.
^ párr. 4 Sal 49:7-9: xewitɨ pɨkayɨwe yuʼiwá mɨtawikweitsitɨani, tsiere Yuútsi pɨkarakapitɨawe tixaɨtɨkɨ mitawikweitsitɨanikɨ (metá kemɨrayaʼaxé mɨkɨ watuukaari wikweitsitɨarikaya yeme kwinié pɨrayaʼaxé mɨkɨkɨ hatsuaku mepɨkateʼayukatuawe); heyeme muyeikanikɨ metá xawatá kahaukanierekɨ.
^ párr. 5 Jn 3:16: »Yuútsi waɨkawa teuteri wanakeʼerietɨ yuniwé mɨyuxewí kaniyetuani, keane tá mɨtihekɨatá heetsiena yuri tiʼerietɨ kwahauyahɨiyani, matsi pɨɨtá tuukaari kaxɨɨweme hexeiyatɨ kanayeimɨkɨ.
^ párr. 5 Rom 5:18,19: Mɨpaɨtsɨ, heimiemekɨ mɨtiuʼixɨrikimariekɨ naitɨ ʼuukitsi meniutihɨiyani, mɨpaɨ tsiere xeime ʼaixɨ tiʼanemekɨ kemɨtiɨyɨ́, ʼuukitsi naitsarie kiekatari ʼaixɨ mepɨtexeiyerieni heitseriemekɨ memuʼuwanikɨ tuukaari kaxɨweme mehexeiyatɨ. Mɨpaɨ tsiere xewitɨ ʼukí mɨkaʼanuʼenaxɨkɨ meyuwaɨkawatɨ menayeitɨarieni meʼixɨrikimatɨkaitɨ́, yaxeikɨ́a tsiere xewitɨ tewi manuʼenaxɨkɨ meyuwaɨkawatɨ heitseriemekɨ memuʼuwa hepaɨ mepɨtexeiyarieni.
^ párr. 6 Dan 7:13,14: »Tɨkaarikɨ mɨtiuyuhekɨarixɨ netiniyexeiyatɨyaní, metá ¡neuxéi!, yuawitsíe pakamiekai xewitɨ haiwitsíe yewetɨ ʼukí niweya hepaɨ tiyuhekɨatɨ; metá puyɨwékaxɨa ʼUkiratsi hetsɨa mɨyaʼakɨ metá Mɨkɨ hɨxie hurawa pɨyexaatsie. Metá mɨkɨ katiniyetuiriyarieni mɨʼiitsɨɨkametɨnikɨ, metá ʼaixɨ mɨtiuxaxaatsiwanikɨ heetsiena, metá mɨtinɨʼakakɨ kiekaritetsíe, países, metá naitɨ yɨɨkɨ memɨteʼuniuka memeiʼeniekakɨ. Heyeme pɨtitanɨʼani, hatsuaku pɨkatihayewa metá ʼiitsɨɨkameya pɨkahauyehɨiyani.
^ párr. 6 Mat 24:14: Metá ʼikɨ niuki ʼaixɨ ʼaneneetɨ metá hehékwatɨ pɨkuxaatsieni kenaame Yuútsi titanɨʼani naime kwieepatsíe naitsarie mɨʼenierienikɨ; metá yetiyɨyu katineutiparimɨkɨ.
^ párr. 7 Sal 37:9-11: Memeuyehɨiyanikɨ teuteri haxa memɨteʼuʼiyaari keane tá Jehová heetsíe memɨtekwewie kwieé mehexeiyatɨ menakɨnikuni. Metá pɨkareutere rí, haxa memɨteʼuʼiyaari meʼuʼuwaatɨ rí mekwaʼakɨɨné; pepɨnieré kewa memeʼuwakai metá maana mepumawini rí. Metá keane ʼaixɨ memɨteʼuʼiyaari kwieé mehexeiyatɨ mepakɨɨné metá heyeme meyutemamaawietɨ mepakɨɨné mɨkatiyukwitɨnenitsíe rí.
