ʼƗKITƗARIKA 6
¿Tiyɨwe tawaarié meʼuʼuwaatɨ memakɨɨné teuteri memeutakwixɨa?
1. ¿Memeutakwixɨa waheetsíe mieme ketiyɨní?
Lázaro, Ketsuútsi hamikuya Betania pɨkiekaametɨkai Jerusalén ʼaurié. Reumietɨ Lázaro pumɨ́. Nauka tuukaari hautineku Ketsuútsi punúa kewa Lázaro mekiekaametɨkai, Marta metá María Lázaro ʼiwamama wahaamatɨa kaneyaní kewa mekateukiekai, kareutewikaku tá meyuwaɨkawatɨ meniuyukuxeɨrieni. ¿Kepetikuʼeriwa ʼaɨmɨ́ kemeteʼakaʼerietɨkɨ́ yuʼiwá ʼayeniereme memuxeitsíe? Nakaterɨwa Juan 11:21-24, * 38-44. *
Waɨkawame niukite ʼaixɨ ʼaneneeme paxaxaata Biblia, maana paine kenaame mɨɨkite meʼanukuʼuitɨarieni. Marta mɨkɨtsíe timieme pɨrakumaikai kenaame Jehová mɨɨkite waranukuʼuitɨani, tawaarié meʼuʼuwatɨ memakɨɨnekɨ ʼeena Kwieépa. Nakaterɨwa Job 14:14, 15. *
2. ¿Memɨtakuukuwe kemekɨyɨne?
Yuútsi Adán pɨtiutahɨawixɨ: «Kwieé tɨmɨanariyari pepɨhɨɨkɨ metá tawaarié kwieé tɨmɨanariyari pepayaaní» (GÉNESIS 3:19)
Teuteri tepɨwewiyatɨká «kwieé tɨmɨanariyarikɨ» (Génesis 2:7; 3:19). Rayenieretɨ tataɨtá kwatiwatiyeiká temɨtakuukuwetsíe. Xɨka xewitɨ ʼumɨɨní kwaxuayatsíe naitɨ pɨreuyewautse, tixaɨtɨ tataɨtá tepɨkatehexeiya tiwikweiweme. Mɨɨkite tsimekateyurieewawetɨ mekateʼukaʼeniwatɨ mepakɨɨká metá xaɨtsíe mepɨkahekɨká. ʼAyumiemekɨ Lázaro ʼanutanieritɨarieka yakwaʼuutayɨ́ kemɨtiuyumai mɨmɨkikaitsíe. Nakaterɨwa Eclesiastés 9:5, 6, * 10. *
Hiipatɨ meteyukɨhɨawe kenaame keane memɨtakuukuwe Yuútsi waretaiya, tseepá mɨpaɨ memutiyuane mɨkɨ kwatiyuri. Temɨtehetimaa hepaɨ, mɨɨkite tixaɨ mekwatemaate rí. ʼAyumieme kememutiyuane pɨkatiyuri pɨtiʼiitarika, Jehová mɨkɨ pɨtixaniʼerie kwaʼinaake hiipame mɨwataiyani. Nakaterɨwa Jeremías 7:31. *
3. ¿Tiyɨwe mɨɨkite wahaamatɨa temɨteʼutixaata?
Mɨɨkite mekwaniuwawe metá mekwatatsiʼenié (Salmo 115:17). Niuki tuayamete haxa meʼitɨtɨa teuteri metewaruʼitaiya mepɨyɨwawe, memeutakwixɨa hepaɨ meʼutiyuatɨ metá meteyuhekɨatɨ (2 Pedro 2:4). ʼAyumieme Jehová kwaʼinaake mɨɨkite wahaamatɨa temɨteʼutixaxaatani. Nakaterɨwa Deuteronomio 18:10, 11. *
4. ¿Keane tawaarié meʼuʼuwatɨ mepakɨɨné?
Meyuwaɨkawatɨ teuteri memeutakwixɨa tawaarié meʼuʼuwaatɨ mepakɨɨné ʼeena Kwieépa. Tsiere mepanukuʼuitɨarieni Jehová mekaʼakumaitɨ́ memuukwi tseepá haxa memɨteʼuyuuri yutuukaaritsíe. Nakaterɨwa Lucas 23:43 * metá Hechos 24:15. *
Keane memanukuʼuitɨarieni mepɨtehetimaaní tita mɨtiyuri Yuutsitsíe, Ketsuutsitsíe yuri memɨteʼeriekakɨ metá memeiʼeniekakɨ (Revelación [Apocalipsis] 20:11-13). Xɨka mɨpaɨ metekakɨɨné, meyutemamaawietɨ heyeme meʼuʼuwaatɨ mepakɨɨné ʼeena Kwieépa. Nakaterɨwa Juan 5:28, 29. *
5. ¿Ketatikuʼɨɨkitɨwa Jehová heetsíe mɨɨkite waranukuʼuitɨanikɨ?
ʼAixɨ mɨtiukaʼiyaarikɨ tseepá keane mɨkatiwarakematsíe Jehová pɨtihekɨatá yeme kemɨtiuyukanakeʼerie mɨɨkite waranukuʼuitɨanitsíe. Pamɨpariutsi Yuútsi yuNiwé meyanɨʼakɨ taheetsíe mieme yutuukaari mɨyetuakɨ, xɨka teʼukwiní tawaarié tepanukuʼuitɨarieni. ʼEkɨ tá, ¿keane pepeuxeiyamɨkɨ memeutakwixɨa memanukuʼuitɨarienitsíe? Nakaterɨwa Juan 3:16 * metá Romanos 6:23. *
^ párr. 1 Jn 11:21-24: Mɨpaɨtsɨ Marta Ketsuútsi tiniutahɨawé: «ʼUkiyari, xɨka meri paitɨ peʼunuanike neʼiwá kwamɨnikekai. Tseepá, hiikɨ tá nepɨrakumaaté tseepá tita Yuútsi pemɨtiutawawiri, Yuútsi pɨʼatiyetuirieni». Ketsuútsi katinitahɨawé: «ʼAʼiwá kananukukemɨkɨ». Marta katinitahɨawé: «Nepɨrakumaate kwinatɨrieka tuukaari memanutanieritɨarienitsíe panukukení».
^ párr. 1 Jn 11:38-44: ʼAana Ketsuútsi, tawarié hayuheiweriwatɨ, kewa mautateukiekaitsíe kaninuani. Terɨta pɨhɨɨkɨtɨkai metá tetekɨ pɨreunamekai. Ketsuútsi kaniutayɨní: «Teté xeneɨkɨhɨwá». Marta mumɨkai ʼiwaya, katinitahɨawé: «ʼUkiyari, nauka tuukaari panuyemíe, haxa pɨkɨʼɨaré». Ketsuútsi katinitahɨawé: «¿Nekaʼatiutahɨawixɨ xɨka yuri petiʼeriekaitɨni pepɨxeiyekekai Yuútsi yeme tɨrɨkariyaya?». Mɨpaɨtsɨ, teté meneukɨhɨaní. Ketsuútsi muyuawitsíe hautiniereka metá kaniutayɨní: «Nepaapa, pamɨpariutsi nepɨʼarahɨawe pemɨnetsiʼeniekɨ. Ne yeme nepɨramaikai kenaame heyeme penetsikuʼeniwa; hiikɨ meyuwaɨká ʼeena nehamatɨa memutiʼukɨ nepɨtiutaxaa, memɨteʼamaikakɨ kenaame ʼekɨ penetsiheyenɨʼa». Metá yaʼutayɨka, tɨrɨkarima niutayɨní: «¡Lázaro, newayayaʼá!». ʼUkí mɨmɨɨkikai kaniwayeyaní yuʼɨkatetsíe metá yumamatetsíe naitɨ heuʼeimetɨ metá hɨxiena pautinamekai ʼixurikikɨ. Ketsuútsi katiniwarutahɨawé: «Xeneutawena metá xeneuhayawa mɨyemiekɨ».
^ párr. 2 Job 14:14,15: Xɨka xewitɨ ʼukí ʼumɨɨní, ¿tiyɨwe tawarié ʼuyeikatɨ mayaní? Naime tuukaaritetsíe nepɨtikwewieni ʼuximayatsikakɨ waɨriyarika nepɨrayaʼatɨani, kepauku xewitɨ nekɨmana munuaniké. ʼEkɨ pepɨnetsitahɨawé metá ne nemetsitaʼeiya. Yeme penetsihauxeiyamɨtɨ pepayaaní ʼamamatekɨ pemɨnetsiʼutawewikɨ.
^ párr. 3 Ecle 9:5,6: Memayenenierekɨ mepɨteʼamaate kenaame mekwiní; mɨkite tá tixaɨtɨ rí mekwateʼakumaate, mɨkɨ mekwatepitɨarie, tita naitɨ waheetsiekɨ mɨrayaʼeriwa pɨratɨmaiyarie. Yaxeikɨ́a, wanakeʼeriya metá wahaaxɨ́a metá waʼɨtetsárika putiukumawirixɨ rí, metá mekwatepareewiwawe rí tau hetɨa kemɨtiyɨane.
^ párr. 3 Ecle 9:10: Naime ʼamamakɨ kepemɨtiyuriwe, yetineuyuri naime ʼatɨrɨkariyakɨ, mɨkahexuawekɨ ʼuximayatsika metá pemɨreʼerieneni kepemɨreyurieni tsiere pepɨkaretimaaní, mɨkɨ kwarexuawe kewa pemetɨ́a mɨɨkite memukateukiwatsíe.
^ párr. 4 Jer 7:31: Metá meputiwewi xirikite ʼeʼutɨtɨme Tófet mɨrayetewatsíe, yetapa mɨyema Hinón niweya tiyetewakaku, yuniwema mewatitaiyake, ne mɨpaɨ nekwatiunɨʼakai metá neʼiyaaritsíe mɨpaɨ nekatikuʼeriwakai».
^ párr. 5 Deu 18:10,11: Xetsata xewitɨ yuniwema pɨkawatitaiyani, xewitɨ pɨkawaraʼiwawiyani memɨteyumariuta memɨkayuhekɨkɨa ʼuxaʼá waarietsíe timieme, xewitɨ pɨkatiyukewaiyani, xewitɨ pɨkaʼutaineni ʼuxaʼá waaríe kemɨtiyɨní, xewitɨ pɨkamaraʼakametɨni, xewitɨ pɨkawaʼaitɨaka memɨkayuhekɨkɨa xeime haxa memɨyurienikɨ, xewitɨ maraʼakate wahetsɨa pɨkahetaʼaxeni, nutsɨ pɨkaʼutaineni xewitɨ tewi kemɨranuyayaní, tsiere xewitɨ mɨɨkite pɨkawaraʼiwawiyani.
^ párr. 6 Luc 23:43: Metá mɨkɨ tinitahɨawe: «Hiikɨ yeme nepɨʼarahɨawe: Nehamatɨa pepeyeikani Haaraweritsíe».
^ párr. 6 Hch 24:15: metá ne nepɨtitakwewie Yuútsi hetsɨa, mɨkɨ tsiere yaxeikɨ́a tiʼaneeme memɨtetakweewie, memanukuʼunikɨ ʼaixɨ memɨteʼuʼiyaari metá haxa memɨteʼuʼiyaari.
^ párr. 7 Jn 5:28,29: Temawierikakɨ xekwaʼayahɨhɨxini kenemɨxetiutahɨawixɨkɨ, tuukaari kanayaʼamɨkɨ meyunaitɨ mɨɨkite memɨteuke niukíeya meniʼeniekuni metá menewatikɨnikuni, ʼaixɨ memɨteʼuyuri tuukaari meniyetuiriyeriekuni, haxa memɨteʼuyuri tá menitaxanetsiekuni.
^ párr. 8 Jn 3:16: »Yuútsi waɨkawa teuteri wanakeʼerietɨ yuniwé mɨyuxewí kaniyetuani, keane tá mɨtihekɨatá heetsiena yuri tiʼerietɨ kwahauyahɨiyani, matsi pɨɨtá tuukaari kaxɨɨweme hexeiyatɨ kanayeimɨkɨ.
^ párr. 8 Rom 6:23: Mɨɨkikɨ pɨrayukatuaya mɨtiʼixɨrikima, ʼimikieri tá Yuútsi mɨyetúa pɨhɨɨkɨ tuukaari mɨkaxɨɨwe Kɨritsitukɨ Ketsuútsi taʼUkiyari.
