ʼƗKITƗARIKA 12
¿Kehepaɨ tepɨyɨwawe Yuútsi ʼaurié hurawa temuʼuwanikɨ?
1. ¿Yuútsi meyunaime wanenewierika tiʼenié?
Yuútsi yunaime puwaʼinié nenewierikakɨ memikɨhɨaweni (Salmo 65:2). Mɨkɨ tá kwaʼanɨyɨne kenaame Yuútsi naime nenewierika kuʼeniwa. Xɨka xewitɨ yuʼɨya tsewiximatɨ metá ʼinanaimatɨ nenewierikaya «pɨkaʼenierieni» (1 Pedro 3:7). Israelitatsixi haxa metekuyuruwakaitsíe waɨkamexa Yuútsi kwawakuʼeniwakai. Yaatɨtɨ Yuútsi pɨwakuʼeniwa keane yeme haxa meteʼuyurieka memaxɨxɨa, memɨteʼukuʼeiri tá tita haxa memɨteʼuyuri. Nakaterɨwa Isaías 1:15 * metá 55:7. *
2. ¿Kehepaɨ teteʼutanenewiwani?
TaWewíekame Jehová temayexeiyakɨ, mɨkɨ xeikɨ́a nenewierika tepɨwewirieka (Mateo 4:10; 6:9). Tsiere temɨkaʼayaʼatɨkakɨ tepɨyutinenewiwani Ketsuútsi mɨtitewá heetsíe, mɨkɨ takɨmaana mumɨkɨ (Juan 14:6). Jehová kwaʼinaake teʼiterɨwatɨ nutsɨ yaxeikɨ́a teʼutiyuatɨ temɨyumaitsitɨaka, matsi pɨɨtá pinaake taʼiyaaritsíe paitɨ ketemɨteyukuhɨawe tepuyutinenewiwani. Nakaterɨwa Mateo 6:7 * metá Filipenses 4:6, 7. *
Xɨka teʼuyutinenewiwani tekaʼutiniutɨ taʼiyaaritsíe paitɨ xeikɨ́a tsiere taWewíekame pɨtatsikuʼeniwa (1 Samuel 1:12, 13). Tatsiʼinié tseepá kepauka teteʼutanenewiwa tuukaari manukayeikatsíe ximeri, taikái, tetekwanitsíe nutsɨ haxa temuteʼanuyahunitsíe. Nakaterɨwa Salmo 55:22 * metá Mateo 15:36. *
3. ¿Xɨka xeɨritsikaatetsíe tehetaʼaxeni kehepaɨ tatipareewieni?
Tepuʼuuwa teuteri Yuútsi mekaʼayexeiyatɨ memuʼuuwatsíe, meʼiʼaatsetɨ meputiyuane kenaame Yuútsi karayaʼatɨani ʼeena Kwieépa ʼaixɨ yari temɨtiteenikɨ. Mɨkɨ pɨtatiuʼeritɨawe kenaame kayɨwe Yuútsi mayexeiyani (2 Timoteo 3:1, 4; 2 Pedro 3:3, 13). ʼAyumieme tepeuyehɨwá temuyukuxexeɨriwani keane Jehová memayexeiya wahaamatɨa temayukawaɨritɨatɨkɨkanikɨ. Nakaterɨwa Hebreos 10:24, 25. *
Xɨka Yuútsi memɨnakeʼerie wahaamatɨa teʼuyutinɨnɨweni Yuútsi tenakeʼerietɨ tepakɨɨné. Jehová Niukíeya memɨkuxaata waxeɨritsika pɨtatsikupareewiwa temɨwataʼɨkekɨ hiipatɨ yuri meteʼerietɨ kememɨtekahú. Nakaterɨwa Romanos 1:11, 12. *
4. ¿Keteteʼuyuriwe Yuútsi temakumaikakɨ?
Teʼutiʼeeriwatɨ metá yatetekahutɨ tita temɨtehetimaamate Yuútsi Niukieyatsíe. Neutiʼeriwani, kemɨtiwatiyurieximetsíe, mariʼitsitɨarikateyatsíe metá kemaine ʼuxaʼa waarié kemɨtiyurienitsíe. ʼAmaitɨ́ peʼitiʼeeriwatɨ kepemɨretimaamatetsíe, peʼuyutinenewiwatɨ pɨʼatsipareewieni pemeitiʼenietɨyanikɨ Yuútsi kemɨtiuyukanakeʼerie metá kemɨrakumaate. Nakaterɨwa Josué 1:8 * metá Salmo 1:1-3. *
Xeikɨ́a Yuútsi ʼaixɨ pɨtatixeiyani xɨka yuri heetsiena teteʼerieka metá heetsiena tekawɨka. Tita mɨrayeniere ʼikwai pɨreuyehɨwá mayenierenikɨ, yaxeikɨ́a tsiere yuri temɨteʼeriekakɨ peuyewetsé tamaitɨ́ temɨtimaamateni titatsíe temɨteʼerie. Nakaterɨwa Mateo 4:4 * metá Hebreos 11:1, * 6. *
5. ¿Títa ʼaixɨ tiʼaneneeme tetekaxeiya xɨka Yuútsi teʼakumaiká?
Jehová peuyuʼiyaritɨa keane meminakeʼerie wakɨmaana. Pɨyɨwe waheimá mutanuani tita yuri memɨteʼerie metá tuukaari kaxɨɨweme memɨtakwewie memɨkatehauyahɨpanikɨ (Salmo 91:1, 2, 7-10). Tsiere tá yatiwakɨhɨawe kememɨtekuyuruwani ʼaixɨ memɨteheuʼeriekakɨ metá memeuyutemamaawiekakɨ. Jehová tiwakuʼɨɨkitɨwa kehepaɨ yeme ʼaixɨ memɨtehaukuteni. Nakaterɨwa Salmo 73:27, 28 * metá Santiago 4:4 *, 8. *
^ párr. 1 Isa 1:15: Metá xeme kepauka yumamate xemanutayepiwatsíe, nehɨxite neputiʼawiwieta nekaxehauxeiyamɨtɨ. Tseepá waɨkawa xemɨyunenewie, nepɨkaxetsiʼenié; yumamatetsíe kwinié xepɨtehauxuriyamatɨká.
^ párr. 1 Isa 55:7: Haxa mɨʼitɨ́a yuhuyé keʼukuʼeirieni, metá ʼukí tiuyukananaima kemɨtiyɨkɨhɨawe; metá Jehová hetsɨa keʼanuani, mɨkɨ pitanenimayata, metá taYuútsi hetsɨa, mɨkɨ yeme pɨreiyehɨwirieni.
^ párr. 2 Mat 6:7: Pemɨʼanenewiekatsíe, yaxeikɨ́a tiʼaneneeme pekwatiyaxaataximeni, teuteri xaɨtsíe kiekatari memɨteʼuhú hepaɨ, mɨkɨ memɨteyɨkɨhɨawekɨ kenaame waɨkawame niukikɨ meʼenierieni.
^ párr. 2 Fil 4:6,7: Tixaɨtɨkɨ xepɨkateyuʼiyaaritɨaka, matsi pɨɨtá naimetsiekɨ, nenewierikakɨ metá yeme xeteʼiwawirietɨ, pamɨpariutsi xeteʼikɨhɨawetɨ naime yuʼiyaarikɨ, naime Yuútsi yaxeteneutahɨawi tita xemɨteheuyehɨwá; metá Yuútsi katiniyuriemɨkɨ ʼaixɨ xemɨteyumaikakɨ, tseepá temɨkateʼamaté kehepaɨ, kexemɨteyɨkɨhɨawetsíe pɨtitaʼɨwiya Kɨritsitukɨ Ketsuútsi.
^ párr. 3 Sal 55:22: Jehová hetsɨa ʼaʼika nehɨwá, metá mɨkɨ kaʼaniwiyakamɨkɨ.
Hatsuaku pɨkatipitɨani ʼaixɨ mɨtiyuriene matiwautseni.
^ párr. 3 Mat 15:36: kaniutiʼɨni ʼatahutame panes metá ketsɨte, pamɨpariutsi ʼutayɨka, ʼititsanaka, metá yɨtɨɨriyama kaniwarutaʼɨitɨani, tɨɨriyamama tá meyuwaɨkawame meniwataʼɨitɨwakaitɨni.
^ párr. 4 Heb 10:24,25: Metá tepɨtewautɨweni kehepaɨ temɨteyupareewieni temɨyunaakeʼeriekakɨ metá ʼaixɨ temɨteyuriekakɨ, tekwatekuhayeikawani teʼuyukuxexeɨriwatɨ, hiipatɨ memɨtekuyuruwa hepaɨ, matsi pɨɨtá tepayukawaɨritɨatɨkɨkani, kepaitsɨ xeme xemɨteʼamaatekɨ kenaame tuukaari rí ʼayaʼaxime.
^ párr. 5 Rom 1:11,12: Nepɨxetsihauxeiyamɨkɨ nexetsiheuparewimɨtɨ mɨtiyuritsíe xemɨkatekuhayeikawanikɨ; matsi pɨɨtá temayukawaɨritɨatɨkɨkanikɨ teyuxexuitɨ yuri ketemɨteʼeriekɨ, xeheetsíe miemekɨ metá neheetsíe miemekɨ.
^ párr. 6 Jos 1:8: ʼIkɨ xapa nɨʼarikatsíe mieme petikuxaatatɨ hatsuaku pekwatikuhayeikawani, ʼamaitɨ heetsiena ketinakaterɨwani tuukaarikɨ metá tɨɨkaarikɨ, pemɨʼɨwiyanikɨ yapetiyurienetɨ tita naitɨ mɨrayaʼuxa mɨkɨtsíe; xɨka mɨpaɨ petiyurieneni ʼahuyé ʼutɨa ʼaixɨ petiniyeyeimɨkɨ metá ʼaixɨ pepɨtiyeyaní perakumaitɨ́.
^ párr. 6 Sal 1:1-3:ʼUkí pɨyutemawie kepauka haxa memutiyuane waʼɨxatsika mɨkakɨʼeniwatsíe, metá memɨʼixɨrikimatɨká wahuyetsíe mɨkaʼuyeika, metá memɨteyuyuriyá waʼɨɨparitsíe mɨkaʼayeixá. Matsi pɨɨtá Jehová nɨʼarikayatsíe temawierikaya payemieme, tuukaarikɨ metá tɨɨkaarikɨ nɨʼarikayatsíe pɨtiutiterɨwa yumaitɨ. Metá yeme ʼiteɨri ʼakiʼutɨa haa ʼuhanekaku tetsita mukawe hepaɨ ʼaneetɨ kanayeimɨkɨ metá tuukaarieya mayaʼaxetsíe ʼikwaxi katineukayaxikeni, metá xawariyari pɨkaʼutiyɨnare, naime kemɨtiyurieni yeme ʼaixɨ katiniyeyeimɨkɨ.
^ párr. 7 Mat 4:4: Metá mɨkɨ katiniʼeiya: «Katineukuʼutɨarieka: «ʼUkí kwaʼuyeikani pan xeikɨ́a kwatɨɨ, matsi pɨɨtá puyeikani niuki naitɨ Jehová tetana mɨrayeneikakɨ»».
^ párr. 7 Heb 11:1: Keane yeme yuri mɨtiʼerie Yuutsitsíe pɨkatitaweʼerie kename yatiyɨní tita mɨtikwewie, pɨtiyumaate mɨtixeiyani hepaɨ tseepá mɨkatihekɨ́a.
^ párr. 7 Heb 11:6: Tsiere, yuri katiʼerietɨ pɨkayɨwe Yuútsi ʼaixɨ mɨtiʼeritɨaka, keane Yuútsi ʼaixɨ mɨtiʼeritɨamɨkɨ hetsɨa mɨyaʼaxekɨ yuri pɨtiʼerieka kenaame mɨkɨ ʼuyeika metá kenaame Yuútsi ʼimikieeri tiwayetuiriwa keane yeme memiwautɨwe.
^ párr. 8 Sal 73:27,28: Yurikɨ, keane ʼahetsɨa tewapaitɨ memuʼuwa mepɨkwiní. Pepɨwareuyehɨaní, keane meteʼixɨrikimatɨ memɨʼatsiʼukuʼeʼeiriwa. Neheetsíe miemekɨ tá, ʼaixɨ pɨʼane Yuútsi ʼaurié hurawa nemuyeikani. ʼUkiyari ʼIitsɨɨkame Jehová nepukuwau netsiʼɨwiyanikɨ. Naime pemɨtiutiwewi nemɨtikuxaatanikɨ.
^ párr. 8 Sant 4:4: Xemuyuwitɨkɨ hiipame wahaamatɨa xemukahiipite, ¿xekateʼamaaté keane kwieetsíe memɨmiemetexi mɨwahamikuta karayuyeitɨwa Yuútsi makaheka? ʼAyumieme, keane mɨwareuhamikutamɨkɨ kwieetsíe memɨmiemetexi kanayuyeitɨwani Yuútsi makaheka.
^ párr. 8 Sant 4:8: Hurawa xekeneyakɨni Yuútsi hetsɨa metá mɨkɨ xehetsɨa hurawa pɨyeyaní. Xeneuyuʼitiexɨaka yumamatetsíe, xemɨʼixɨrikimatɨká, yuʼiyaari xeneutaʼiti, xeme xeʼiyaari manutahuhuta.
Xɨari ʼikɨtá metsiʼunakiwe
TIKUXAXAATSIWATƗ TAHEETSÍE
¿Títakɨ Biblia hetsíe teteyu’ɨkitɨaka?
Meyuwaɨkawatɨ teuteri Kwieépa memɨtaama Yuútsi Niukieyatsíe mepɨteukaxexeiyá tita kwinié memɨteheumaiku. Tematsi’inié pemɨti’ati’ɨkitɨanikɨ tahaámatɨa ’ikɨ xapatsíe mɨrayemie ’aixɨ ti’aneneetɨ tita tatuukaaritsíe yeme mɨreuyewetsé.
