ʼƗKITƗARIKA 8
¿Títakɨ Yuútsi tipitɨ́a haxa mɨtiʼane metá tita mɨtatiukaʼenitɨwa?
1. ¿Ke tiuyutsutɨa haxa mɨtiʼane?
Yuútsi pɨwahayawa teuteri memɨtenɨʼakakɨ tiwahekɨatsitɨanikɨ kenaame mekayɨwawe haxa mɨtiʼane metekumawiriyá
Haxa mɨtiʼane putiuné Kwieepatsíe, kepauka Satanás meri mɨtiuʼitatsíe. Mɨkɨ ʼaixɨ pɨtiukaʼiyaarikai metá payaʼakakai, yaʼanetɨ́tɨtɨ «mɨtiyuritsíe ʼuyeikatɨ pɨkaʼatɨ́a» (Juan 8:44). Naime mɨtiutiweewi mayexeiyariekaikɨ kwaʼinaakixɨ pɨtiutiheiweʼerietɨya mɨkɨ pɨɨtá mayexeiyarieka. Satanás, Eva tiuʼitaiyaka yuheetsíe pitiʼeritsitɨa Yuútsi mukakuʼeniwanikekaikɨ. Adán yuʼɨya hepaɨ pɨtikatɨ́a Yuútsi kwaʼanuʼeni. Yatiuyɨku pɨtiuné tita mɨtatiukaʼenitɨwa metá mɨɨkí. Nakaterɨwa Génesis 3:1-6, * 19. *
Kepauka Satanás, Eva tiutahɨawixɨtsíe kenaame Yuútsi kakuʼeniwanikekai, tiʼeritɨa kenaame Yuútsi haxa tiuʼIitsɨɨkata. ʼAana paitɨ Satanás teuteri pɨtiwaʼitaiya hepaɨna meteyukɨhɨawenikɨ. Meyuwaɨkawame pɨwaxeɨrié memikuʼeniwanikɨ, ʼayumieme «ʼiitsɨɨkame kwieepatsíe» pɨhɨɨkɨ. Nakaterɨwa Juan 14:30 * metá 1 Juan 5:19. *
2. ¿Yuútsi reuyewetɨkaime tiutiwewi?
Jehová wewiyaya yeme ʼaixɨ pɨtiʼanene tixaɨ pɨkareuyewetɨká heetsiena. Matɨari teuteri memutiwewiya metá niuki tuayamete yeme mepɨyɨwawekai Yuútsi memeuʼenieka naimetsíe (Deuteronomio 32:4, 5). Mɨkɨ tatsipitɨ́a temɨteʼanuyewauní ʼaixɨ mɨtiʼane metá haxa mɨtiʼane. Yuútsi temɨnakeʼeriekɨ tepɨyɨwawe ʼaixɨ mɨtiʼane temɨteʼanuyewauní. Nakaterɨwa Santiago 1:13-15 * metá 1 Juan 5:3. *
3. ¿Títakɨ tá Yuútsi tipitɨ́a temɨteʼukaʼeniwani?
Tseepá hiikɨ Satanás mɨtinɨʼa, Jehová pɨkareuteeré ʼiʼeirietɨ. ¿Títakɨ tá tipitɨ́a? Mɨtihekɨatakɨ kenaame xewitɨ ʼiitsɨɨkame Yuútsi pareewiyaya kahexeiyatɨ kayɨwe teuteri ʼaixɨ mɨtiwapareewieni (Eclesiastés 7:29; 8:9). 6,000 wiitaari manuyemié kemɨtiwatiyɨxime pɨtihekɨ́a teuteri ʼiitsɨɨkate mekwayɨwawe metekumawiriyá tita mɨtatiukaʼenitɨwa, kuyaxá metá kwiniyate. Nakaterɨwa Jeremías 10:23 * metá Romanos 9:17. *
Xɨka teʼipitɨaka Yuútsi mɨtatsinɨʼakakɨ, ʼaixɨ tiʼanenetɨ taheetsíe pɨtiyeʼatɨarieni (Isaías 48:17, 18). Jehová kwitɨwa puwakumawiriyá teuteri ʼiitsɨɨkate. Xeikɨ́a meʼuʼuwaatɨ mepakɨɨné ʼeena Kwieépa keane memɨpareewieka ʼIitsɨɨkame mayeitɨa (Isaías 11:9). Nakaterɨwa Daniel 2:44. *
4. ¿Ketatipareewie Yuútsi mɨtikwewiekɨ?
Satanás paine kenaame teuteri Yuútsi meʼayexeiya naime tiwakupiniriekɨ xeikɨ́a, mekaʼinakeʼerietɨ. Yuútsi pɨtiuyukakwewie, ʼayumieme tepɨyɨwawe temɨtehekɨatá yeteyɨatɨ ketatiʼɨɨkitɨa, ʼIitsɨɨkame mayeitɨa tepanayehana teuteri ʼiitsɨɨkate tekawaʼenietɨ, mɨpaɨ tepɨtehekɨatá kenaame Diablo tiʼitawa. Nakaterɨwa Job 1:8-12 * metá Proverbios 27:11. *
5. ¿Keteyɨatɨ Yuútsi ʼIitsɨɨkameya tepanayewauwé?
Tatuukaaritsíe ketemɨteyurié pɨtihekɨare xɨka Yuútsi tehauyehɨaká taʼIitsɨɨkame mɨhɨɨkɨtɨnikɨ
Tepɨyɨwawe temanayehana Yuútsi taʼIitsɨɨkame mɨhɨɨkɨtɨnikɨ xɨka tetehetimaamateni kehepaɨ mɨtiinake temeyexeiyani, yeiyari keʼaneme mɨkuhekɨkɨata yuNiukitsíe teʼuweiyatɨ (Juan 4:23). Ketsuútsi teʼɨketɨ ʼiitsɨɨkate teuteri tekawapareewieka metá tekahekɨkani kuyaxá, xɨka mɨpaɨ teteyurieka tepɨtehekɨatá kenaame Satanás tekahauyehɨwá taʼiitsɨɨkame mɨhɨɨkɨtɨni. Nakaterɨwa Juan 17:14. *
Satanás tɨrɨkariya mexeiyakɨ, teuteri tiwaʼeritɨa haxa memɨteyuriekakɨ. Temɨtehayawatsíe haxa mɨtiʼane pɨtiyɨwe hiipatɨ tahamikuma metá tanuiwarima kwawanaakiré, mepɨyahaʼani yakatixaɨ mepɨtatsitayuriyá (1 Pedro 4:3, 4). Xɨka mɨpaɨ teteʼanuyekɨɨné, tepɨwawautɨweni Yuútsi menakeʼerietɨ memeyexeiya metá Yuútsi nɨʼarikateya tepeuʼenieka. Xɨka mɨpaɨ teteyurieka, tepɨtehekɨatá Satanás pɨtiuʼiita mutayɨtsíe kenaame xewitɨ Yuútsi kaʼanuʼenieni kepauka haxa mɨranuyemienitsíe. Nakaterɨwa 1 Corintios 6:9, 10 * metá 15:33. *
Yuri tepɨteʼerie kenaame Yuútsi tikumawiriyá haxa mɨtiʼane metá mɨtatiukaʼenitɨwa mɨtatsinakeʼeriekɨ. Keane memɨtehekɨatá yuri meteʼerietɨ Yuútsi heetsíe, heyeme meʼuʼuwatɨ mepakɨɨné ʼeena Kwieépa. Nakaterɨwa Juan 3:16. *
^ párr. 1 Gén 3:1-6: Kuu kanayaní keane matsi mɨyutaʼɨwiyakai meyuwaɨkawame yeutari Jehová Yuútsi mɨwarutiwewiekaitsíe. ʼAyumieme ʼuká katiniutahɨawé: «¿Yuri raine Yuútsi kenaame naime ʼiteɨritsíe xekatekakwaʼani haaraweritsíe mɨtixuawe?». ʼUká mɨpaɨ tá kuu katiniuʼeiya: «Tepɨyɨwawe ʼiteɨritetsíe mɨreukatéi temɨtekwaká haaraweritsíe mɨtixuawe. Rixɨ́a, ʼiteɨritsíe mɨreukatéi haaraweri hixɨapa muwekɨ, Yuútsi kaniutayɨní: «Mɨkɨtsíe mieme xekatekakwaʼani, hawaikɨ, xekwaʼikumaɨwani xɨka mɨpaɨ xeteʼuyurieni xenikwikuni»». Mɨpaɨ tá kuu ʼuká tiniutahɨawé: «Hawaikɨ, xepɨkakwiní. Yuútsi mɨrakumaatekɨ kepauka xemɨtekakwaní, ʼaana tuukaaritsíe xehɨxite kananutayepierimɨkɨ metá Yuútsi hepaɨ xeteʼakumaitɨ xenakɨnikuni xeteʼakumaitɨ́ tita ʼaixɨ mɨtiʼane metá haxa mɨtiʼane». Yatiuyɨku, ʼikwaxi ʼiteɨritsíe mɨreukateekai pɨtiyuhekɨakai ʼuká hɨxie kenaame witsiraʼanekai, tsipɨtiyuhekɨakai hɨxiena. Katiniutiʼinɨtɨyaaní ʼikwaxi metá katiniutikwaní. ʼAriké mɨkɨ yukɨɨna tsiere kaniumini kepauka hetsɨana mɨnuatsíe, mɨkɨ tá tiniutikwaní.
^ párr. 1 Gén 3:19: ʼAhɨxie pekwaxiyatɨ pan penitakwaimɨkɨ pemanuaniké kwieépa petinihayawamɨkɨ, mɨkɨkɨ pemutawewiyakɨ, kwieé tɨmɨanariyari pemɨhɨɨkɨkɨ metá tawaarié kwieé tɨmɨanariyari pepayaaní».
^ párr. 2 Jn 14:30: Xehamatɨa waɨkawa rí nekwatitaxaata, ʼiitsɨɨkame kwieepatsíe mɨtinɨʼá mamiekɨ. Metá mɨkɨ neheetsíe kwatinɨʼá,
^ párr. 2 1 Jn 5:19: Taame tepɨteʼamaaté Yuutsitsíe tepayemieme, metá naime kwieepatsíe pɨtinɨʼá haxa mɨtiukaʼiyaari.
^ párr. 3 St 1:13-15: Xewitɨ ʼinɨatsietɨ pɨkahaineni: «Yuútsi kaneniʼinɨatani». Mɨkayɨwekɨ Yuútsi mɨkuʼinɨnɨatani haxa tiʼaneneemekɨ, mɨkɨ xeime pɨkakuʼinɨnɨatá. Matsi pɨɨtá yuxexuitɨ mepɨyukuʼinɨnɨata metá mepɨyuwiniya tita memɨteheiweʼeriekɨ. ʼAriké, kepauka mɨtiheiweʼerie tɨrɨkaɨyetɨ mayaanitsíe, tewi kanaxɨmɨkɨ, ʼaxɨme kanimɨmɨɨkɨ.
^ párr. 3 1 Jn 5:3: Mɨpaɨ tepɨtehekɨatá kenaame Yuútsi tenakeʼerie: ʼaitɨarikateya teʼenietɨ; metá ʼaitɨarikateya pɨkaʼahehete,
^ párr. 4 Jer 10:23: Jehová, ne yeme nepɨrakumaaté, teuteri yɨhɨkɨate memɨyunɨʼaka yutuukaaritsíe meukayɨwawe, metá meukayɨwawe memɨteʼanuyewauní yutuukaaritsíe.
^ párr. 4 Rom 9:17: ʼUtɨarika Faraón tikuhɨawekɨ: «ʼIkɨkɨ nepɨʼatsipitɨ́a pemuyeikani, kenemɨʼatsiyurienikɨ netɨrɨkariya nemɨhekɨatakɨ, metá naime kwieepatsíe mɨkuxaxaatsiwanikɨ kenemɨtitewá».
^ párr. 5 Dn 2:44: »Metá kepauka mɨkɨ ʼiitsɨɨkate memɨtenɨʼakatsíe, Yuútsi mɨyuawitsíe kiekame ʼiitsɨɨkame panukakení mɨkɨ nɨʼarikaya wakwaʼuʼaní. Metá ʼikɨ ʼiitsɨɨkametsíe hatsuaku teuteri mekatetanɨʼani. Meyunaime ʼiitsɨɨkate kaniwareuyehɨamɨkɨ, metá mɨkɨ xeikɨ́a tinɨʼatɨ heyeme kanayeimɨkɨ;
^ párr. 6 Job 1:8-12: Metá Jehová, Satanás katiniutahɨawé: «¿Petiuyɨʼɨwiyaxɨ Job mɨnetsiʼayexeiyatsíe, xewitɨ hepaɨna tiukaʼiyaaritɨ kwaʼuyeika kwieépa, ʼaixɨ ʼitɨatɨ, heitseriemekɨ yatikamietɨ, Yuútsi heuʼenietɨ metá haxa katiyurienetɨ?». ʼAriké Satanás, Jehová katiniuʼeiya metá kaniutayɨní: «¿Job yaakɨ xeikɨ́a Yuútsi reuʼenié? ¿ʼEkɨ mɨkɨ peʼenaatɨkaikaku katiyɨane metá kiena pekaranatɨká metá naime tita mɨrexeiya pekatiʼɨwiya? Naime kemɨtiyuriene peʼipareewiekaku metá tewamama mepɨyuwaɨkawa naime kwieepatsíe. 11 Tsipá ʼamamakɨ haxa neuyuri metá tineunawairi tita naime mɨrexeiya metá neuʼaʼɨwiya xɨka ʼakɨmana haxa katayɨmɨkɨ ʼahɨxie». Metá ʼariké Jehová, Satanás tiniutahɨawé: «¡Neuxéi! Tita naime mɨrexeiya ʼamamatsíe katinapiká. ¡Rixɨ́a ʼamamakɨ mɨkɨ haxa pekaʼikuyuruwani!». Satanás, Jehová ʼixeiyakaku kaneyaaní.
^ párr. 6 Prov 27:11: Neniwé, tineutamaiweni metá neʼiyaari neukatemawieritɨa, nemɨtaʼeiyakɨ keane mɨnetsiʼiiwane netsiyuriyatɨ.
^ párr. 7 Jn 17:14: Ne ʼaniuki nepɨwayatuiri, metá teuteri kwieépa memɨtaama mepɨwaheka, mɨkɨ wahepaɨ memɨkaʼitɨtɨakɨ, tsiere ne kwieépa nemɨkamiemekɨ.
^ párr. 8 1 Cor 6:9,10: ¡Kutá! ¿Xekateʼakumaate, kenaame haxa memɨtekahuu mekanieré kepauka Yuútsi tinɨʼatɨ mayaanitsíe? Xeukayukuʼiitaiyani. Keane memukahiipite mekaʼayukawɨɨtɨatɨ, kakaɨyariíxi memɨwarayexeiya, keane memukahiipite memɨneneɨke wahaamatɨa nutsɨ memɨwiikietɨká, keane ʼuukitsi memuyuʼeirie wahepaɨ ʼuukitsi wahaamatɨa memukahiipiteni, metá mɨwanaake ʼuukitsitɨtɨ yuhaamatɨa memukahiipite, memɨtenaawawaya, keane memɨteheiweʼerie tita mɨkatiwapiini, tarɨwekariixi, keane haxa mutaine hiipame wahepaɨtsita, keane mɨtiwatanawairiwa tita mɨkatipiinieya watsewiximatɨ, mɨkɨ mekanieré kepauka Yuútsi tinɨʼatɨ mayaanitsíe.
^ párr. 8 1 Cor 15:33: Xepɨkayuhayawani xemɨteʼitaiyariekakɨ. Xɨka haxa memɨteʼuʼiyaari pewarutinɨnɨweni memeteneuyehɨwiriekuni ʼaixɨ pemɨtiukaʼiyaari.
^ párr. 9 Jn 3:16: »Yuútsi waɨkawa teuteri wanakeʼerietɨ yuniwé mɨyuxewí kaniyetuani, keane tá mɨtihekɨatá heetsiena yuri tiʼerietɨ kwahauyahɨiyani, matsi pɨɨtá tuukaari kaxɨɨweme hexeiyatɨ kanayeimɨkɨ.
