ʼƗKITƗARIKA 11
¿Ketatikupareewiwa ʼɨkitɨarikate Bibliatsíe mieme?
1. ¿Títayari teteheuyehɨwá Yuútsi mɨtatsiʼuwitɨximeni?
¿Ketatikupareewiwa ʼɨkitɨarikate Bibliatsíe mieme teyɨʼɨwiyatɨ ʼaixɨ temɨteyakɨnekɨ? (HECHOS 17:28)
Jehová taPaapa metá taWewíekame, mɨkɨ xeikɨ́a kwinié pɨrakumaate tsiere pɨtatsinakeʼerie metá takɨmaana peuyuʼiyaritɨa. Pɨkatatsiʼutiwewi taxaɨtá temɨteʼanuyewawanikɨ ketemɨteyurieni (Jeremías 10:23). Tɨɨrí mepeuyehɨwá wapaapama mewaruwitɨximeni, yaxeikɨ́a tsiere teuteri mepeuyehɨwá Yuútsi waruwitɨximeni (Isaías 48:17, 18). Jehová ʼɨkitɨarikaya pɨʼimikieri pɨtatsikupareewiwa ʼaixɨ temɨteyakɨnekɨ tatuukaaritsíe. Nakaterɨwa 2 Timoteo 3:16. *
Jehová nɨʼarikateya metá ʼɨkitɨarika tatikɨʼɨɨkitɨwa keteyɨatɨ yeme ʼaixɨ temɨteheukuteni, hiikɨ metá ʼuxaʼa waaríe heyeme tetehexeiyatɨ ʼaixɨ tiʼaneneme tepakɨɨné. Yuútsi mɨtatsiʼutiwewikɨ ʼaixɨ yari tepikuʼeniwani. Nakaterɨwa Salmo 19:7, * 11 * metá Revelación (Apocalipsis) 4:11. *
2. ¿Títa tihɨɨkɨ ʼɨkitɨarikate Bibliatsíe mieme?
ʼƗkitɨarikate metá nɨʼarikate Bibliatsíe mieme yuri pɨtihɨɨkɨ yaxeikɨ́a tá kwaʼanɨyɨtɨká. ʼƗkitɨarika naimetsíe pɨtatsikupareewiwa, nɨʼarikate tá hipametsíe xeikɨ́a pɨtatsipareewie (Deuteronomio 22:8). Temeitiʼenietɨkɨnekɨ meri tepitimaixɨani ketemɨteyurieni xeime ʼɨkitɨarikakɨ (Proverbios 2:10-12). Biblia tikɨʼɨɨkita kenaame tuukaari Yuútsi ʼimikierieya hɨɨkɨ. Mɨkɨ ʼɨkitɨarika tatsipareewieni taʼuximayatsikatsíe, takié metá kepauka temukuʼuwanitsíe tatsihayeʼeeritɨwa yetemɨtekakɨnekɨ teyɨʼɨwiyatɨ. Nakaterɨwa Hechos 17:28. *
3. ¿Keanenetɨ ʼɨkitɨarikate huutatɨ yeme kwinié pɨrayeʼatɨká?
Ketsuútsi huutame ʼɨkitɨarika putixaataxɨ. Meri tatiʼɨɨkɨtɨa titakɨ temɨteʼuʼuwa: Yuútsi temakumaikakɨ, teminakeʼeriekakɨ metá temeyexeiyanikɨ. ʼIkɨtsíe tepɨtiʼeriwani naime ketemɨteyuriekatsíe (Proverbios 3:6). Keane mɨkɨ ʼɨkitɨarika memɨkuʼeniwa Yuútsi hamikumaama mepakɨɨné, yeme mepɨyukatemamaawieni metá tuukaari kaxɨɨweme mehexeiyatɨ mepakɨɨné. Nakaterɨwa Mateo 22:36-38. *
ʼƗkitɨarika huuta pɨtatsipareewie ʼaixɨ temɨtewaxeiyanikɨ meyunaime (1 Corintios 13:4-7). Xɨka mɨpaɨ tetekakɨkani, Yuútsi tepɨtaʼɨke teuteri mɨtiwaxeiya hepaɨ. Nakaterɨwa Mateo 7:12 * metá 22:39, 40. *
4. ¿Kehepaɨ tatikupareewiwa ʼɨkitɨarikate Bibliatsíe mieme?
ʼƗkitɨarikate Bibliatsíe mieme pɨwapareewie nuiwari meyunakeʼerietɨ memɨtitenikɨ (Colosenses 3:12-14). Maana mayemié xewitɨ ʼɨkitɨarika pɨwaʼɨwiya nuiwarite metá memayukawɨtɨa mekaʼuyukuʼeʼeiriwanikɨ. Nakaterɨwa Génesis 2:24. *
ʼƗkitɨarikate Bibliatsíe mieme temɨkuʼeniwatsíe pɨtatsipareewie temɨteʼɨwiyani piinite temɨtehexeiya metá ʼaixɨ temɨtehauʼeriekakɨ. ʼUximayatsika memexeiya, mepɨwareuyehɨwá yemetekakɨkame ʼɨkitɨarika Bibliatsíe kemayetaine meteʼayaʼatɨwame metá mekatenawawayame (Proverbios 10:4, 26; Hebreos 13:18). Tsiere Yuútsi Niukíeya tatikɨʼɨɨkitɨwa, tseepá waɨká piinite temɨkatehexeiya tepɨyutemamaawieka, piinitetsíe xeikɨ́a tekwaʼutiʼerieka matsi pɨɨtá Yuútsi meri tepuwautɨweni mɨtahamikutɨnikɨ. Nakaterɨwa Mateo 6:24, 25, * 33 * metá 1 Timoteo 6:8-10. *
ʼƗkitɨarikate Bibliatsíe mieme tatsikupareewiwa ʼaixɨ temɨteheuʼeeriekakɨ. Yuútsi nɨʼarikaya pɨtatsipareewie tekayutarɨwaiwawiekakɨ, temɨkatekuukuyenikɨ metá kwitɨwa tekatakukuweenikɨ (Proverbios 14:30; 22:24, 25; 23:20). Jehová pɨtatsipitɨ́a, ʼetsiwa xeikɨ́a temanuyeʼeeni (Salmo 104:15; 1 Corintios 6:10). ʼƗkitɨarikate Bibliatsíe mieme tatsikupareewiwa temiʼɨwiyanikɨ ketemɨtekuyuruwa metá ketemɨtekuʼeriwatsíe (Salmo 119:97-100). Ketsuútsi yuri temuweiya ʼɨkitɨarika Bibliatsíe mayemié tepɨkaʼeníe xeikɨ́a tatsikupareewiwakɨ tatuukaaritsíe, matsi pɨɨtá yetepɨteyurié taPaapa Jehová mɨyutemawiekakɨ. Nakaterɨwa Mateo 5:14-16. *
^ párr. 1 2 Tim 3:16: Naitɨ ʼutɨarika xapatsíe Yuútsi ʼineetɨaku yapɨreʼuxa, mɨtatikuʼɨɨkitɨwanikɨ, yamɨtatikɨhɨawenikɨ tita haxa mɨtiʼaane, tatikuʼɨɨkitɨwatɨ tita ʼaixɨ mɨtiʼaane, tita mɨtiheitserie mɨtatiʼɨɨkitɨakakɨ,
^ párr. 2 Sal 19:7: Jehová nɨʼarikaya yeme payaʼaxé, tuukaari ʼaixɨ ʼaneeme kanayeitɨwani. Jehová ʼɨkitɨarikaya yuri pɨhɨɨkɨ, keane mɨkareutamaiwé timaiweme payeitɨwa.
^ párr. 2 Sal 19:11: Mɨʼatsiʼayexeiya pɨkuʼɨxatsitɨwa; xɨka ʼikuʼeniwani ʼimikieri ʼaixɨ ʼaneme hexeiyatɨ kanayeimɨkɨ.
^ párr. 2 Rev 4:11: «ʼEkɨ xeikɨ́a pepɨhɨɨkɨ Jehová, taYuútsi yeme ʼaheetsíe ʼaixɨ mɨtiuxaxaatsiwanikɨ, metá ʼaixɨ ʼaneemekɨ pemɨxeiyarieka kepemɨtitɨrɨkaɨyekɨ, naime piinite pemɨtiutiweewi ʼekɨ mɨpaɨ pemɨtiutanakeʼerikɨ naitɨ yapɨtiuyɨ́».
^ párr. 3 Hch 17:28: Kɨmanakɨ tuukaari tepexeiya metá tepɨkuyuatɨká metá tepuʼuwa, hiipatɨ teʼutɨwamete xetsata miemetexi memutiyuane hepaɨ: «Taame tsiere niwemama tepɨhɨɨkɨ».
^ párr. 4 Mat 22:36-38: «Tiʼɨɨkitame, ¿Nɨʼarikatsíe keane ʼaitɨarika matsi kwinié pɨrayaʼaxé?». Mɨkɨ katinitahɨawé: ««Jehová ʼaYuútsi naime ʼaʼiyaarikɨ kenenakeʼerieka metá naime ʼatuukaarikɨ metá naime kepemɨtiʼakɨhɨawetsíe». ʼIkɨ matsi pɨrayaʼaxé metá ʼaitɨarika manuyehaitɨ́a pɨhɨɨkɨ.
^ párr. 5 Mat 7:12: ʼAyumieme, xɨka xenaakeni teuteri kememɨxeyuriekakeyu naimetsíe, mɨpaɨ tsiere xeme xekenewayuurieka; ʼikɨ panɨyɨne, nɨʼari metá nɨʼariekate waniuki, Yuútsi heetsíe memutekuxaatakai.
^ párr. 5 Mat 22:39,40: Hutarieka manuyehaitɨ́a hepaɨ pɨʼane, ʼikɨ kanihɨɨkɨtɨni: «Kepemɨtiyunakeʼerie hepaɨ mɨpaɨ tsiere ketinenakeʼerieka ʼaʼaurié hurawa muyeika». ʼIkɨ hutatɨ ʼaitɨarikatetsíe payemieme Nɨʼarika, metá Profetatsixi».
^ párr. 6 Gén 2:24: ʼAyumieme ʼukí kanikuʼeiriemɨkɨ yupaapa metá yumaama, metá yuʼɨya kanitinɨmɨkɨ, metá meyuhutatɨ xewitɨ xeikɨ́a menayeikuni.
^ párr. 7 Mat 6:24,25: »Pɨkayɨwe xewitɨ yuhutame mɨtiwaʼuximayatsirieka; kepaitsɨ xeime mɨyeheka metá xeime mɨtanakeʼerieni, nutsɨ xeimetsíe pɨkawiere xeime tá haxa pɨtixeiya. Xeme xepɨkayɨwawe Yuútsi xeteʼuximayatsirietɨ tsiere tá Tumini metá piinite xemɨteʼuximayatsirieka. »ʼIkɨkɨ nepɨxerahɨawe: Xepɨkayuʼiyaaritɨaka rí yutuukaarikɨ, tita xemɨtetikwanikɨ, nutsɨ tita xemɨteʼanuʼienikɨ, nutsɨ tita kemari xemɨteʼanakapiiní. ʼIkwai tuukaari hepaɨ pɨkarayaʼaxé. Metá kemarite waiyari hepaɨ pɨkarayaʼaxé.
^ párr. 7 Mat. 6:33: »Meri xenewautɨwenitsɨ́ Yuútsi mɨtinɨʼá ʼiitsɨɨkame hɨɨkɨtɨ metá Yuútsi nɨʼarikateya mɨtiheitserietɨká, metá Yuútsi naime ʼikɨ piinite kaxetiniyetuiriemɨkɨ.
^ párr. 7 1 Tim. 6:8-10: ʼAyumieme tetehexeiyatɨ ʼikwai metá tita temɨteʼanakapiní, mɨkɨ yetipaɨmemekɨ tepauyutemamaawieka. Keane xeikɨ́a tumini memɨheiweʼerie yukɨmana mepɨyukuʼinɨnɨata metá mepɨteheuyuriku tita tixaɨtɨkɨ mɨkareuyewetsé metá mɨtikwinitɨa, ʼayumieme mepeuyehɨiyani. Tumini xeikɨ́a yemetenakeʼerietɨ memɨteʼuyukakwikwinitɨwa mepɨwanɨʼɨ́, keane mɨpaɨ memɨteʼuyuri mepɨteʼuhayawaxɨ yuri meteʼerietɨ Yuutsitsíe metá waɨká meteʼukakukwinetɨ mepakɨká nawaxakɨ mɨkuxitekiwani hepaɨ.
^ párr. 8 Mat 5:14-16: »Xeme xepɨhɨɨkɨ kwieépa memɨtaama wahekɨariya. Kiekari hɨritsíe kamatɨ́ kwaʼuyutiʼawietawe. Kɨxeeme ʼutaiyame xeime tsamurikɨ kwaʼanukanani, matsi pɨɨtá wata paitɨ kanekemɨkɨ mɨwahekɨariyanikɨ naime kiitá memayetéi. Mɨpaɨ tsiere xeheetsíe hekɨariya xetenehekɨatani ʼuukitsi wahɨxie, ʼaixɨ yeme tiʼaneeme xeheetsíe memɨtexeiyanikɨ metá ʼaixɨ mɨtiuxaxaatsiwanikɨ xeYeu mɨyuawitsíe makawe.
Xɨari ʼikɨtá metsiʼunakiwe
TIKUXAXAATSIWATƗ TAHEETSÍE
Tineutawawá pemaʼiwatsiemiekɨ
Tineutawawá pemaʼiwatsiemiekɨ pemɨtitixaatakɨ Yuútsi Niukieyatsíe xeime Jehová niukíeya xaxaatame hamatɨa nutsɨ tinayehɨniya tita ʼeena mɨtiwawié pekatiʼatuatɨ pemɨtiyutiʼɨkitɨanikɨ
