ʼƗKITƗARIKA 14
¿Títayari Yuútsi reuyehɨwá keane memeyexeiya memɨyɨnɨká?
1. ¿Títayari Yuútsi tiwaranayawau israelitatsixi kiekarieya memɨhɨɨkɨtɨnikɨ?
Abrahán niwemamakɨ Yuútsi xeime kiekari putawewi meyɨnɨkame metá nɨʼarikate pɨwayatuiri. ʼIkɨ kiekari pɨtiuterɨwaxɨ Israel, pɨʼɨwiyakai Yuútsi Niukíeya metá ʼaixɨ ʼanemekɨ mayexeiyariekakɨ (Salmo 147:19, 20). Yememɨteʼuyurikɨ teuteri naitsarie memɨtaama mepareewiyatɨ mepakɨɨnekekai. Nakaterɨwa Génesis 22:18. *
Yuútsi pɨwaranuyawau israelitatsixi heetsiena timieme hiipame memɨtewakuxaxaatɨwanikekaikɨ. Meripai kemɨtiuyɨ́ ʼikɨ kiekaritsíe pɨtikuhekɨatá kenaame Yuútsi nɨʼarikateya kuʼeniwatɨ yeme ʼaixɨ tiyeyaní (Deuteronomio 4:6). Yemetekakɨneku israelitatsixi, hiipatɨ mepɨyɨwekaxɨanikekai Yuútsi yuri mɨhɨɨkɨ memetimaanikekaikɨ. Nakaterɨwa Isaías 43:10, * 12. *
2. ¿Títayari Yuútsi reuyehɨwá keane memeyexeiya memɨyɨnɨká?
ʼAriké tá israelitatsixi Yuútsi hɨxie ʼaixɨ mekwateʼuyuri, ʼayumieme pareewiyaya mepeuyehɨa mepupatsie Ketsuútsi tɨɨriyamaamakɨ (Mateo 21:43; 23:37, 38). ʼAyumieme hiikɨ mepɨhɨɨkɨ Ketsuútsi yuri memuweiya keane Jehová memayexeiya heetsiena timieme memɨtekuxaata, mekwahɨɨkɨ rí israelitatsixi. Nakaterɨwa Hechos 15:14, * 17. *
Ketsuútsi yutɨɨriyama yatiwarutahɨawixɨ kehepaɨ memɨteʼɨɨkitakekai metá teyɨʼɨɨkitɨwamete mewarayeitɨanikɨ Kwieépa muyahanetsíe (Mateo 10:7, 11; 24:14; 28:19, 20). Hiikɨ, pɨtikuhekɨkɨare kenaame teʼuʼuwa rí tuukaari tixɨximekaku mɨtikumawiriximenitsíe tita mɨtixuawe metá kemɨtiyɨatɨne, yeme pɨkuxaxaatsiwa Yuútsi Niukíeya heiwa mɨpaɨ kwatiyɨwekai. Jehová pɨwaratixeɨrixime waɨkawa teuteri naitsarie memɨtaama meyutinɨnɨwenikɨ yuri yeiyari meʼuweiyatɨ (Revelación [Apocalipsis] 7:9, 10). Yuri memuweiya memɨyɨnɨʼɨkɨ mepɨyukupareewiwa metá mepayukawaɨritɨatɨkɨka. Yunaitɨ memɨyukuxexeɨriwatɨkatsíe yaxeikɨ́a tiʼaneneeme meputeʼutiʼɨɨkitɨariwa Bibliatsíe timieme. Nakaterɨwa Hebreos 10:24, 25. *
3. ¿Kemeteʼutsuutɨa hiikɨ memuʼuwa Jehová Niukíeya memɨkuxaata?
Meyunɨtɨ́ mepɨteʼukatsutɨa yapaɨmetɨ wiitaari hautiyaku 1870 tsíe. Tsimeyupaɨmetɨ teyɨʼɨɨkitɨwamete Bibliatsíe timieme, mɨixa ʼanuyeyaku mepɨteʼukaxei mɨtiyuri mɨtiʼawietsekai. Mepɨteʼakumaikai kenaame Ketsuútsi yutɨɨriyama waranayahapakai memɨtekuxaatanikɨ Yuútsi Niukieyatsíe mieme, ʼayumieme mepɨteʼukatsutɨa naitsarie metimatiwakɨ Yuútsi ʼIitsɨɨkame mayeitɨa heetsíe mieme. 1931 mepɨteʼuyuterɨwaxɨ Jehová Niukíeya memɨkuxaata. Nakaterɨwa Hechos 1:8; * 2:1, * 4, * 11, * metá 5:42. *
4. ¿Títayari Yuútsi hiikɨ xeime kiekari ranuyewau?
Ketsuútsi ʼumierieku, xeɨritsikate naitsarie mɨxuawekaitsíe memɨteʼayexeiyakai pɨwarupareewi Yuútsi kiekarieyatsíe meʼanuyehaitɨtɨakame mewarexeiyakaikɨ, mɨkɨ memanuyahaitɨakai mepɨtexeiyakai kenaame Ketsuútsi xeɨritsika Muʼuya hɨɨkɨ (Hechos 16:4, 5). Hiikɨ yaxeikɨ́a tsiere Memanuyahaitɨtɨa Yuútsi Kiekarieyatsíe yeme memɨtehautamaiwawe mepɨwapareewie Jehová Niukíeya memɨkuxaata metá mepɨʼɨwiya oficina manuʼutɨká naime Kwieepatsíe. Muwa xapate Bibliatsíe timieme ʼutɨarietɨ metá ʼanayenenetɨariwatɨ 600 niuki yɨɨkɨ ʼanɨyɨtɨkaimetsíe panutimie rí. Yuútsi Niukieyatsíe meyukuʼɨwiyatɨ Memanuyahaitɨtɨa Yuútsi Kiekarieyatsíe, mewawaɨritɨatɨ metá mewaruwitɨximetɨ 100,000 xeɨritsikatetsíe panutimie rí, muwa mepɨyaʼuwa tsiere ʼuukitsi memɨyumate Yuútsi muxatsimama mewanakeʼerietɨ mepɨwaʼɨwiya. Nakaterɨwa 1 Pedro 5:2, 3. *
Jehová Niukíeya memɨkuxaata mepɨyɨnɨʼɨ memɨkuxaatanikɨ niuki ʼaixɨ manɨyɨtɨká Bibliatsíe mieme metá teyɨʼɨɨkitɨwamete mewarayeitɨwanikɨ. Ketsuútsi tɨɨriyamaama memɨteʼuyuri hepaɨ, teuteri wakíe memukutetɨkatsíe mepɨtewakuxaxaatɨwa (Hechos 20:20). Tsiere mepɨtewaʼɨɨkitɨa keane yuri memɨnakeʼerie. Xeikɨ́a mekwayɨnɨʼɨ; matsi pɨɨtá naitɨ ʼiwamarixi xei nuiwari mepɨhɨɨkɨ meyunakeʼerietɨ metá mepɨyutemamaawie Yuútsi tiuyukanakeʼeriekame memexeiyakɨ (2 Tesalonicenses 1:3). Jehová Niukíeya memɨkuxaata mepɨyɨnɨʼɨ Yuútsi ʼaixɨ memɨteʼeritɨakɨ metá teuteri mewapareewiekɨ mepɨyutemamaawie xei nuiwari mehɨɨkɨtɨ. Nakaterɨwa Salmo 33:12 * metá Hechos 20:35. *
^ párr. 1 Gén 22:18: Metá ʼaniwekɨ meyunaitɨ kwieépa memɨtaama ʼaixɨ tiʼaneneeme metehexeiyatɨ mepakɨɨné, neniuki pemuʼenikɨ.
^ párr. 2 Isa 43:10: Xeme neheetsíe mieme xemɨtekuxaata xepɨhɨɨkɨ -Jehová mɨpaɨ kanaineni-, hɨ, ʼekɨ pemɨnetsikuʼeniwa, ʼekɨ pepɨhɨɨkɨ keane nemanayewau memɨteʼamaikakɨ metá neheetsíe yuri memɨteʼeriekakɨ, metá memeitiʼenietɨkɨnekɨ kenaame ne nekanepatawe. Meri paitɨ xewitɨ Yuútsi pɨkaʼutawewiya, neʼutɨma tá xewitɨ pɨkaʼuyeika.
^ párr. 2 Isa 43:12: «Ne nepɨhɨɨkɨ nemɨtiutaxaa metá mɨtiutawikweitsitɨa metá ne nepɨtiuyuri mɨramaatiwanikɨ. Kepauka xeme yuútsi xemɨkahexeiyekaitsíe xeime kiekaritsíe mieme. ʼAyumieme xeme xepɨhɨɨkɨ neheetsíe mieme xemɨtekuxaata -Jehová mɨpaɨ kanaineni-, metá ne Yuútsi nepɨhɨɨkɨ.
^ párr. 3 Hch 15:14: Symeón naime katinikuxaatani, kehepaɨ Yuútsi matɨari mɨtiuyɨʼɨwiyaxɨ hiipame países tsíe waranuyawauniké xeime kiekari ʼayeitɨanike metá kemɨtitewá heetsíe ʼiterɨwake.
^ párr. 3 Hch 15:17: Jehová memɨwautɨwenikɨ naime yuʼiyaarikɨ ʼuukitsi keane memɨyuhayawatɨweni, mewanɨɨtɨ́ teuteri naime países tsíe memɨtaama, teuteri memuterɨwarɨwa kenemɨtitewakɨ, Jehová kanaineni, ʼikɨ yamɨtiyuriene,
^ párr. 4 Heb 10:24,25: Metá tepɨtewautɨweni kehepaɨ temɨteyupareewieni temɨyunaakeʼeriekakɨ metá ʼaixɨ temɨteyuriekakɨ, tekwatekuhayeikawani teʼuyukuxexeɨriwatɨ, hiipatɨ memɨtekuyuruwa hepaɨ, matsi pɨɨtá tepayukawaɨritɨatɨkɨkani, kepaitsɨ xeme xemɨteʼamaatekɨ kenaame tuukaari rí ʼayaʼaxime.
^ párr. 5 Hch 1:8: xetɨrɨkawitɨ xepakɨɨné kepauka Yuútsi tɨrɨkarieya xeheetsíe mɨyeʼaní, metá xenetsikuxaatatɨ xepakɨɨné Jerusalén, Judea kwieyaritsíe, metá Samaria, tsiere kwieépa kwinié mukuteteewatsíe».
^ párr. 5 Hch 2:1: Hiikɨ tá, mexi ʼixɨarari Pentecostés wewiyakai, yunaitɨ muwa mepɨyuxeɨriekai,
^ párr. 5 Hch 2:4: metá meyunaitɨ menanuyenexɨani Yuútsi tɨrɨkarieya mɨkayuhekɨ́akɨ metá niuki yɨɨkɨ ʼaneneemekɨ meʼutiniutɨ menakɨɨné, Yuútsi tɨrɨkarieya kemɨtiwapitɨakai hepaɨ.
^ párr. 5 Hch 2:11: Creta metá Arabia kiekatari, tepɨwaruʼeni taníukikɨ meʼutiniukame yeme ʼaixɨ tiʼaneneeme Yuútsi heetsíe timieme».
^ párr. 5 Hch 5:42: Metá kiitá mɨrayexeiyariekaitsíe metá memukutetɨkateitsíe kiepa meʼukakɨkatɨ, naime tuukaaritsíe meteʼɨɨkitatɨ mekwatekuhayeikawakai, metekuxaatatɨ niuki ʼaixɨ tiʼaneneeme Kɨritsitu, Ketsuútsi heetsíe mieme.
^ párr. 6 1 Ped 5:2,3: Yuútsi muxatsimaama xemuhɨritɨarie, naimetsíe xekenewaʼɨwiyani, xeme ʼuukitsi xemɨteʼɨwiya, waɨriyarika xepɨkayɨaka, matsi pɨɨtá ʼaixɨ yari xenewapareewieka, Yuútsi mɨtinakeʼerie hepaɨ; tumini xeʼiiwákutɨ xepɨkayɨaka, matsi pɨɨtá kexemɨteyɨwawe naimetsíe waheetsíe miemekɨ yexeketeneyurieka; tsiere, xepɨkawanɨʼaka xeikɨ́a keane Yuútsi mɨxetsiʼuhɨritɨa, matsi pɨɨtá ʼaixɨ xeteneyayurieximeni muxatsi xehepaɨ memɨyɨakakɨ.
^ párr. 7 Sal 33:12: Yuútsi Jehová pɨhɨɨkɨ, kiekarieya pɨyutemawie; kiekari manuyawau heetsiena mieme memɨhɨɨkɨtɨnikɨ.
^ párr. 7 Hch 20:35: Naimetsíe nepɨxetikuhekɨatsitɨwa waɨká xepɨteʼuximayaka mɨpaɨ xemɨtewapareewienikɨ keane memɨkatɨrɨkawi, metá xekahetɨtɨmaiyani Ketsuútsi taʼUkiyari niukíeya, mɨkɨ mutayɨtsíe: «Matsi pɨtemawierika mɨtiyatuakatsíe, yaxeikɨ́a pɨkatitemawierika mɨtiyetuiriyeriekatsíe».
