pehala itihas 10:1-14
-
shaaool aur uske beton ki maut (1-14)
10 palishti log israeliyon se yuddh kar rahe the. israeli sena palishtiyon se haarkar bhaag gayi aur bahot-se israeli sainik gilbo pahad par dher ho gaye.+
2 palishti sainik shaaool aur uske beton ka peechha karte-karte unke paas aa gaye. unhonne shaaool ke bete yonatan, abeenadab aur malkeeshooa+ ko maar daala.
3 fir unhonne shaaool ke saath jamkar ladai ki aur jab teerandazon ne use dekha to use ghaayal kar diya.+
4 tab shaaool ne apne hathiyar dhonevale sainik se kaha, “tu apni talvar nikaalkar mujhe ghonp de taaki ye khatnarahit aadmi mujhe berahmi se na maarein.”*+ magar uske sainik ne inkar kar diya kyonki aisa karne ki uski himmat nahin hui. tab shaaool ne apni talvar li aur khud us par gir gaya.+
5 jab shaaool ke hathiyar dhonevale sainik ne dekha ki woh mar gaya hai, to woh sainik bhi apni talvar par gir pada aur mar gaya.
6 is tarah shaaool aur uske teen bete mar gaye aur unke saath-saath uske gharane ke sabhi log mar gaye.+
7 jab ghaati ke ilake mein rehnevale sab israeliyon ne dekha ki sab log bhaag gaye hain aur shaaool aur uske bete mar gaye hain, to woh apna-apna shehar chhodkar bhaagne lage. fir palishti aakaar un shehron mein rehne lage.
8 agle din jab palishti, maare gaye israeli sainikon ke kapde aur hathiyar lene aaye to unhonne gilbo pahad par shaaool aur uske beton ki laashein dekhin.+
9 unhonne shaaool ka sir kaat liya aur uska bakhtar aur sabhi hathiyar nikaal liye. unhonne palishtiyon ke poore desh mein sandesh bheja ki yah khabar unke moorton ke mandiron tak aur logon tak pahunchayi jaaye.+
10 fir unhonne shaaool ke hathiyar le jaakaar apne devta ke mandir mein rakhe aur uska sir daagon ke mandir+ mein latka diya.
11 jab gilad ke yaabesh mein rehnevalon+ ne suna ki palishtiyon ne shaaool ke saath kya kiya hai,+
12 to unke sabhi yoddha nikaal pade aur shaaool aur uske beton ki laashein utha laaye. woh un laashon ko yaabesh le aaye aur unki haddiyaan yaabesh mein bade ped ke neeche dafna di.+ aur unhonne saat din tak upvas kiya.
13 is tarah shaaool mar gaya kyonki woh yahova ka vishvasyogya na raha aur usne yahova ki aagya na maani,+ saath hi usne mare huon se sampark karne ka daava karnevali aurat se poochhtachh ki+
14 bajay iske ki woh yahova se uski marzee poochhta. isliye parmeshvar ne use maar daala aur yishai ke bete daavid ko raaj saunp diya.+
kai footnote
^ ya “mere saath bura salook na karein.”
