pehala itihas 17:1-27
17 jab daavid apne mahal mein rehne laga, to uske kuch hi samay baad usne bhavishyavakta naatan+ se kaha, “dekh, main to devdar se bane mahal mein reh raha hoon,+ jabki yahova ke karar ka sandook kapde se bane tamboo mein hai.”+
2 naatan ne daavid se kaha, “tere man mein jo kuch hai woh kar kyonki sachcha parmeshvar tere saath hai.”
3 usi din, raat ko parmeshvar ka yah sandesh naatan ke paas pahuncha,
4 “tu jaakaar mere sevak daavid se kehna, ‘yahova tujhse kehta hai, “mere nivas ke liye bhavan bananevala tu nahin hoga.+
5 jab se main israel ko nikaal laaya, tab se lekar aaj tak kya mainne kisi bhavan mein nivas kiya hai? main hamesha ek tamboo se doosre tamboo mein aur ek dere se doosre dere* mein jaata raha.+
6 jis dauran main poore israel ke saath-saath chalta raha aur mainne apne logon par nyayi thehraye ki woh charvahon ki tarah unki dekhbhal karein, tab kya mainne kabhi kisi nyayi se kaha ki toone mere liye devdar ka bhavan kyon nahin banaya?”’
7 tu mere sevak daavid se kehna, ‘senaon ka parmeshvar yahova kehta hai, “main tujhe charagahon se le aaya tha jahaan tu bhedon ki dekhbhal karta tha aur tujhe apni praja israel ka aguva banaya.+
8 tu jahaan kahin jaayega main tere saath rahoonga+ aur tere saamne se tere sabhi dushmanon ko naash kar doonga+ aur tera naam aisa mahan karoonga ki tu duniya ke bade-bade naami aadmiyon mein gina jaayega.+
9 main apni praja israel ke liye ek jagah chunoonga aur vahaan unhein basaunga. woh vahaan chain se jeeyenge, koi unhein dukh nahin dega. un par dusht log atyachar nahin kareinge, jaise guzre vakt mein+
10 dusht mere logon par tab se atyachar karte rahe jab mainne un par nyayi thehraye the.+ main tere sab dushmanon ko tere adheen kar doonga.+ main tujhe ek aur baat batata hoon, ‘yahova tere liye ek raaj-gharana taiyar karega.’
11 jab teri umra poori ho jaayegi aur teri maut ho jaayegi* to main tere vansh ko, tere beton mein se ek ko khada karoonga+ aur uska raaj mazbooti se kaayam karoonga.+
12 vahi mere liye ek bhavan banayega+ aur main uski raajgaddi sada ke liye mazbooti se kaayam karoonga.+
13 main uska pita banoonga aur woh mera beta hoga.+ main usse pyar* karna kabhi nahin chhodoonga,+ jaise mainne us insan se karna chhod diya tha jo tujhse pehale tha.+
14 main hamesha ke liye use apne bhavan mein thehraunga aur apna raaj saunpoonga+ aur uski raajgaddi sada tak kaayam rahegi.”’”+
15 naatan ne jaakaar ye saari baatein aur yah poora darshan daavid ko bataya.
16 tab raja daavid yahova ke saamne baithkar kehne laga, “hey yahova parmeshvar, meri hasti hi kya hai? main aur mera gharana kuch bhi nahin. fir bhi toone mujhe uncha uthakar is mukam tak pahunchaya.+
17 hey parmeshvar, toone yah bhi vaada kiya hai ki tere sevak ka raaj-gharana muddaton tak kaayam rahega.+ hey yahova parmeshvar, toone mujhe is kaabil samjha hai ki main aur uncha uthaya jaaun.*
18 tera yah sevak daavid is samman ke baare mein tujhse aur kya keh sakta hai? tu to apne sevak ko achhi tarah jaanta hai.+
19 hey yahova, toone apne sevak ki khaatir aur apne man ki ichha ke mutabik ye saare mahan kaam kiye hain aur is tarah apni mahanta zahir ki hai.+
20 hey yahova, tere jaisa aur koi nahin.+ hamne bahot-se ishvaron ke baare mein suna hai, magar tujhe chhod aur koi parmeshvar nahin.+
21 aur is dharti par teri praja israel jaisa aur kaun-saa raashtra hai?+ sachcha parmeshvar jaakaar unhein chhuda laaya taaki woh uske apne log banein.+ toone apne logon ko misra se chhudaya aur unke saamne se doosri jaatiyon ko khadedkar baahar kar diya.+ toone mahan aur vismaykari kaam karke apna naam uncha kiya.+
22 toone apni praja israel ko hamesha ke liye apne log bana liya+ aur hey yahova, tu unka parmeshvar ban gaya.+
23 ab hey yahova, toone apne sevak aur uske gharane ke baare mein jo vaada kiya tha use poora karne mein tu hamesha vishvasyogya rahe aur tu theek vaisa hi kare jaisa toone vaada kiya hai.+
24 tera naam sada kaayam* aur uncha rahe+ taaki log kahein, ‘senaon ka parmeshvar aur israel ka parmeshvar yahova israel ke liye parmeshvar hai’ aur tere sevak daavid ka raaj-gharana tere saamne sada tak mazbooti se kaayam rahe.+
25 hey mere parmeshvar, toone apne sevak ko apna yah maksad bataya hai ki tu uske liye ek raaj-gharana banayega. iseeliye tera yah sevak poore yakeen ke saath tujhse yah prarthna kar paaya hai.
26 hey yahova, tu hi sachcha parmeshvar hai aur toone apne sevak ke baare mein in bhale kaamon ka vaada kiya hai.
27 isliye meri dua hai ki tu apne sevak ke gharane ko khushi-khushi aasheesh de aur yah gharana tere saamne hamesha kaayam rahe kyonki hey yahova, toone hi is gharane ko aasheesh di hai aur yah aasheesh sada bani rahegi.”
kai footnote
^ shaayad iska matlab hai, “ek tamboo ki jagah se doosri jagah aur ek nivas se doosre nivas.”
^ shaa., “tu apne purkhon ke saath hone ke liye jaayega.”
^ ya “atal pyar.”
^ ya “toone mujhe unche pad ka aadmi samjha hai.”
^ ya “vishvasyogya saabit ho.”
