pehala raja 1:1-53
1 raja daavid ki umra dhal chuki thi,+ woh kaafi boodha ho gaya tha. use kai kambal odhaye jaate the, fir bhi uske shareer ko garmi nahin milti thi.
2 isliye uske sevkon ne usse kaha, “agar ijazat ho to hum apne maalik raja ki dekhbhal ke liye ek kunvari ladki dhoondhkar laayenge. woh ladki raja ke paas rehkar raja ki seva aur dekhbhal karegi. woh tere paas leta karegi taaki tujhe garmi mile.”
3 unhonne poore israel desh mein ek khoobsoorat ladki ki talash ki aur unhein abeeshag+ naam ki ek ladki mili jo shoonem+ ki rehnevali thi. woh use raja ke paas le aaye.
4 woh ladki bahot khoobsoorat thi. woh raja ke paas rehkar uski dekhbhal karne lagi. magar raja ne uske saath sambandh nahin rakhe.
5 inhin dinon haggeet ka beta adoniyah+ yah kehkar khud ko uncha uthane laga, “agla raja main hi banoonga!” usne apne liye ek rath taiyar karvaya, kuch ghudsavaar chune aur 50 aadmiyon ko apne aage-aage daudne ke kaam par lagaya.+
6 magar uske pita ne kabhi yah kehkar use nahin roka,* “toone aisa kyon kiya?” adoniyah bhi bahot sundar-sajeela tha. uska janm abshalom ke baad hua tha.
7 usne sarooyah ke bete yoab aur yaajak abiyatar+ se baat ki aur woh adoniyah ki madad karne aur uska saath dene ke liye taiyar ho gaye.+
8 magar yaajak saadok,+ yahoyada ke bete banayah,+ bhavishyavakta naatan,+ shimi,+ rei aur daavid ke veer yoddhaon+ ne adoniyah ka saath nahin diya.
9 aakhirkar ek din adoniyah ne en-rogel se kuch doori par johelet ke patthar ke paas balidan ka intazam kiya.+ usne bhedon, gaay-bailon aur mote kiye jaanvaron ki bali chadhayi. is mauke par usne apne sabhi bhaaiyon ko yaani raja ke sabhi beton ko aur yahooda ke sabhi aadmiyon ko yaani raja ke sabhi sevkon ko nyauta diya.
10 magar usne bhavishyavakta naatan ko, banayah ko, daavid ke veer yoddhaon ko aur apne bhaai sulaiman ko nahin bulaya.
11 tab naatan+ ne sulaiman ki maa batsheba+ ke paas jaakaar kaha, “kya toone suna hai ki haggeet ka beta adoniyah+ raja ban gaya hai aur hamare maalik raja ko is baare mein koi khabar nahin?
12 ab agar tu apni aur apne bete sulaiman ki jaan bachana chahti hai, to meri salah maan.+
13 tu raja daavid ke paas jaa aur usse keh, ‘mere maalik raja, toone shapath khaakaar apni daasi se kaha tha, “mere baad tera beta sulaiman raja banega aur vahi meri raajgaddi par baithega.”+ to fir ab adoniyah kaise raja ban gaya hai?’
14 jab tu raja se baat kar rahi hogi, tab main bhi vahaan aa jaaunga aur raja se kahoonga ki tu sahi keh rahi hai.”
15 isliye batsheba raja ke paas uske sone ke kamre mein gayi. raja bahot boodha tha aur shoonem ki rehnevali abeeshag+ uski seva kar rahi thi.
16 batsheba ne raja ke saamne jhukkar use pranam kiya. raja ne usse kaha, “main tere liye kya kar sakta hoon?”
17 batsheba ne kaha, “mere maalik, toone hi apne parmeshvar yahova ki shapath khaakaar apni daasi se kaha tha, ‘mere baad tera beta sulaiman raja banega aur vahi meri raajgaddi par baithega.’+
18 magar dekh! ab adoniyah raja ban gaya hai aur maalik ko iski koi khabar nahin.+
19 usne badi taadad mein bailon, bhedon aur mote kiye jaanvaron ki bali chadhayi hai. is mauke par usne raja ke sabhi beton ko aur yaajak abiyatar aur senapati yoab ko nyauta diya hai,+ magar tere sevak sulaiman ko nahin bulaya.+
20 hey mere maalik raja, ab poore israel ki nazar tujh par tiki hai ki tu unhein bataye ki tere baad teri raajgaddi par kaun baithega.
21 agar maalik ne nahin bataya to jaise hi maalik ki maut ho jaayegi,* mere saath aur mere bete sulaiman ke saath gaddaron jaisa salook kiya jaayega.”
22 batsheba raja se baat kar hi rahi thi ki tabhi bhavishyavakta naatan vahaan pahunch gaya.+
23 raja ko fauran bataya gaya, “bhavishyavakta naatan aaya hai!” naatan raja ke saamne gaya aur usne jhukkar raja ko pranam kiya.
24 fir naatan ne kaha, “mere maalik raja, kya toone kaha hai ki tere baad adoniyah raja banega aur vahi teri raajgaddi par baithega?+
25 kyonki aaj adoniyah badi taadad mein bailon, bhedon aur mote kiye jaanvaron ki bali chadhane gaya hai+ aur usne raja ke sabhi beton, senapatiyon aur yaajak abiyatar ko bulaya hai.+ woh sab uske saath milkar daavat uda rahe hain aur keh rahe hain, ‘raja adoniyah ki jay ho!’
26 magar usne tere is sevak ko nahin bulaya. usne yaajak saadok ko, yahoyada ke bete banayah+ ko aur tere sevak sulaiman ko bhi nahin bulaya.
27 kya adoniyah ko yah sab karne ka adhikar raja ne diya hai? kya toone faisla kiya ki vahi tere baad raajgaddi par baithega? toone mujhe to is baare mein kuch nahin bataya.”
28 tab raja daavid ne kaha, “batsheba ko bulao.” batsheba andar aayi aur raja ke saamne khadi ho gayi.
29 raja ne shapath khaakaar usse vaada kiya, “yahova ke jeevan ki shapath, jisne mujhe har museebat se chhudaya hai,+
30 aaj main apni woh shapath poori karoonga jo mainne israel ke parmeshvar yahova ke naam se khaayi thi ki mere baad tera beta sulaiman raja banega aur vahi meri raajgaddi par baithega!”
31 tab batsheba ne zameen par jhukkar raja ko pranam kiya aur kaha, “mera maalik raja daavid lambee umra paaye!”
32 raja daavid ne fauran kaha, “yaajak saadok, bhavishyavakta naatan aur yahoyada ke bete banayah+ ko bulao.”+ tab woh teenon raja ke paas aaye.
33 raja ne unse kaha, “tum mere sevkon ko lekar jaao aur mere bete sulaiman ko mere khachchar* par bithao+ aur use neeche geehon+ le jaao.
34 yaajak saadok aur bhavishyavakta naatan vahaan uska abhishek karke+ use israel ka raja thehrayenge. fir narsinga foonkkar yah ailan karvaya jaaye, ‘raja sulaiman ki jay ho!’+
35 iske baad tum sab uske peechhe-peechhe yahaan laut aana aur fir woh andar aakaar meri raajgaddi par baithega. vahi meri jagah raja banega aur main use israel aur yahooda ka aguva thehraunga.”
36 tab yahoyada ke bete banayah ne fauran raja se kaha, “aameen! mere maalik raja ka parmeshvar yahova vahi kare jo raja ne kaha hai.
37 jis tarah yahova mere maalik ke saath raha hai, vaise hi woh sulaiman ke saath rahe+ aur uske raaj ko mere maalik raja daavid ke raaj se bhi zyada mahan kare.”+
38 tab yaajak saadok, bhavishyavakta naatan, yahoyada ke bete banayah+ aur kareti aur paleti logon+ ne sulaiman ko raja daavid ke khachchar par bithaya+ aur use neeche geehon+ le gaye.
39 fir yaajak saadok ne tel-bhara woh sing liya+ jo tamboo+ se laaya gaya tha aur us tel se sulaiman ka abhishek kiya.+ iske baad woh narsinga foonkne lage aur sab log zor-zor se kehne lage, “raja sulaiman ki jay ho! raja sulaiman ki jay ho!”
40 iske baad sab log baansuri bajate aur jashna manate huye sulaiman ke peechhe-peechhe chalne lage. logon ne itni unchi aavaz mein jayjaykar kee ki zameen fatne lagi.+
41 adoniyah aur uski daavat mein aaye sabhi logon ne yah shor suna. ab tak woh khaa-pi chuke the.+ jaise hi yoab ne narsinge ki aavaz suni, usne kaha, “shehar mein yah hohalla kaisa?”
42 jab woh bol hi raha tha to yaajak abiyatar ka beta yonatan+ vahaan aaya. adoniyah ne kaha, “aa, andar aa. tu ek achha* insan hai. tu zaroor koi achhi khabar laaya hoga.”
43 magar yonatan ne adoniyah se kaha, “maaf karna, khabar achhi nahin hai. hamare maalik raja daavid ne sulaiman ko raja bana diya hai.
44 raja ne sulaiman ke saath yaajak saadok, bhavishyavakta naatan, yahoyada ke bete banayah aur kareti aur paleti logon ko bheja aur unhonne use raja ke khachchar par bithaya.+
45 woh use geehon le gaye jahaan yaajak saadok aur bhavishyavakta naatan ne uska abhishek karke use raja bana diya. iske baad woh jashna manate huye vahaan se shehar laut gaye. iseeliye poore shehar mein itna hohalla macha hai. tum logon ne jo shor suna hai woh yahi hai.
46 aur-to-aur, sulaiman raajgaddi par baith gaya hai.
47 aur haan, hamare maalik raja ke sevak raja ko yah kehkar badhai de rahe hain, ‘tera parmeshvar sulaiman ka naam tere naam se zyada mashhoor kare aur uske raaj ko tere raaj se zyada mahan kare!’ yah sab sunkar raja ne, jo bistar par tha, apna sir jhukaya
48 aur kaha, ‘israel ke parmeshvar yahova ki taareef ho, jisne aaj mere bete ko meri raajgaddi par bithaya hai aur mujhe apni aankhon se yah dekhne ka mauka diya hai!’”
49 jab adoniyah ke mehmanon ne yah khabar suni to woh sab bahot dar gaye aur uthkar apne-apne raaste chale gaye.
50 adoniyah bhi sulaiman ki vajah se bahot dar gaya, isliye woh uthkar vedi ke paas gaya aur usne vedi ke sing pakad liye.+
51 sulaiman ko khabar di gayi ki adoniyah usse bahot dar gaya hai aur vedi ke sing pakadkar keh raha hai, “main yahaan se tab tak nahin jaaunga jab tak raja sulaiman mujhse shapath khaakaar nahin kehta ki woh apne is sevak ko talvar se nahin maar daalega.”
52 sulaiman ne kaha, “agar woh bhala aadmi bankar rahega, to uska baal bhi baanka nahin hoga. lekin agar usne kuch galat kiya+ to woh zinda nahin bachega.”
53 tab raja sulaiman ne apne sevkon ko bheja ki woh use vedi par se utar laayen. fir adoniyah raja sulaiman ke paas aaya aur usne jhukkar use pranam kiya. sulaiman ne usse kaha, “jaa, apne ghar chala jaa.”
kai footnote
^ ya “use thes nahin pahunchayi; use nahin daanta.”
^ shaa., “maalik apne purkhon ke saath so jaayega.”
^ ya “maada khachchar.”
^ ya “kaabil.”
