pehala raja 16:1-34
16 fir yahova ne hanani+ ke bete yehoo+ ke zariye baasha ko yah saza sunayi:
2 “mainne tujhe dhool se uthaya tha aur apni praja israel ka aguva banaya tha.+ magar tu yaarobam ke nakshe-kadam par chalta raha aur toone meri praja israel se bhi paap karvaya aur unhonne apne paapon se mera krodh bhadkaya.+
3 isliye hey baasha, main tera aur tere gharane ka poori tarah safaya kar doonga. main tere gharane ka vahi hashra karoonga jo mainne nabat ke bete yaarobam ke gharane ka kiya tha.+
4 tere vanshajon mein se jo koi shehar mein marega use kutte khaa jaayenge aur jo maidan mein marega use aakash ke pakshi khaa jaayenge.”
5 baasha ki zindagi ki baaki kahani, usne jo bade-bade kaam kiye unka aur uske baaki kaamon ka byaura israel ke raajaon ke itihas ki kitab mein likha hai.
6 fir baasha ki maut ho gayi* aur use tirsa mein dafnaya gaya.+ uski jagah uska beta elah raja bana.
7 baasha ne yahova ki nazar mein bahot-se bure kaam karke uska krodh bhadkaya aur is tarah woh yaarobam ke gharane jaisa ban gaya tha. saath hi, baasha ne use* maar daala tha. in donon vajahon se yahova ne hanani ke bete bhavishyavakta yehoo ke zariye baasha aur uske gharane ko saza sunayi.+
8 baasha ka beta elah jab israel ka raja bana, tab yahooda mein raja aasa ke raaj ka 26vaan saal chal raha tha. elah ne tirsa mein rehkar do saal raaj kiya.
9 uska ek sevak tha jimri jo uski aadhi rath-sena ka senapati tha. usne elah ke khilaf saazish ki aur jab elah tirsa mein apne raajmahal ki dekhrekh ke adhikari arsa ke ghar peekar dhutt ho gaya tha,
10 tab jimri ne aakaar use maar daala+ aur uski jagah khud raja ban gaya. jab jimri raja bana tab yahooda mein raja aasa ke raaj ka 27vaan saal chal raha tha.
11 jimri jaise hi raajgaddi par baitha, usne baasha ke poore gharane ko maar daala. uske rishtedaron* aur doston mein se ek bhi aadmi ya ladke ko zinda nahin chhoda.
12 is tarah jimri ne baasha ke poore gharane ko mita diya aur yahova ka woh vachan poora hua jo usne bhavishyavakta yehoo se baasha ke khilaf sunaya tha.+
13 baasha ke gharane ka yah anjam isliye hua kyonki baasha aur uske bete elah ne bahot-se paap kiye aur israeliyon se paap karvaya tha. aur israeliyon ne nikammi moorton ki pooja karke israel ke parmeshvar yahova ka krodh bhadkaya tha.+
14 elah ki zindagi ki baaki kahani, uske sabhi kaamon ka byaura israel ke raajaon ke itihas ki kitab mein likha hai.
15 jab yahooda mein raja aasa ke raaj ka 27vaan saal chal raha tha, tab tirsa mein jimri raja bana aur usne saat din raaj kiya. us dauran sena ki tukdiyaan palishtiyon ke shehar gibbaton+ par hamla karne ke liye chhaavni daale hui thi.
16 kuch vakt baad us chhaavni mein khabar pahunchi ki jimri ne raja ke khilaf saazish ki aur use maar daala hai. tab poore israel ne usi din chhaavni mein senapati omri+ ko israel ka raja bana diya.
17 omri aur uske saath poora israel gibbaton se nikaalkar oopar gaye aur unhonne tirsa ki gherabandi ki.
18 jab jimri ne dekha ki shehar par kabza kar liya gaya hai to woh raajmahal ki meenar mein chala gaya aur usne mahal mein aag laga di aur usi mein jalkar mar gaya.+
19 jimri ka yahi anjam hua kyonki usne yaarobam ke nakshe-kadam par chalkar yahova ki nazar mein bure kaam kiye the aur israel se bhi paap karvaya tha.+
20 jimri ki zindagi ki baaki kahani, usne jo saazish rachi uska byaura israel ke raajaon ke itihas ki kitab mein likha hai.
21 isi ghatna ke baad israel ke log do guton mein bat gaye. ek gut ke log geenat ke bete tibni ki taraf the aur use raja banana chahte the aur doosre gut ke log omri ki taraf the.
22 omri ke gut ke logon ne geenat ke bete tibni ke gut ko hara diya. tibni ki maut ho gayi aur omri raja ban gaya.
23 jab omri israel ka raja bana, tab yahooda mein raja aasa ke raaj ka 31vaan saal chal raha tha. omri ne 12 saal raaj kiya. chhe saal usne tirsa se raaj kiya tha.
24 usne shemer se do tode* chaandi ki keemat par saamriya pahad khareeda aur us par ek shehar banvaya. usne shehar ka naam, pahad ke purane maalik shemer ke naam par saamriya* rakha.+
25 omri yahova ki nazar mein bure kaam karta raha aur woh un sabhi raajaon se badtar nikala jo usse pehale huye the.+
26 usne nabat ke bete yaarobam ke sabhi taur-tareeke apna liye aur israel se bhi paap karvaya. aur israeliyon ne nikammi moorton ki pooja karke israel ke parmeshvar yahova ka krodh bhadkaya tha.+
27 omri ki zindagi ki baaki kahani, uski badi-badi kaamyabiyon aur uske kaamon ka byaura israel ke raajaon ke itihas ki kitab mein likha hai.
28 fir omri ki maut ho gayi* aur use saamriya mein dafnaya gaya. uski jagah uska beta ahab+ raja bana.
29 omri ka beta ahab jab israel ka raja bana, tab yahooda mein raja aasa ke raaj ka 38vaan saal chal raha tha. omri ke bete ahab ne saamriya+ se israel par 22 saal raaj kiya.
30 omri ka beta ahab yahova ki nazar mein un sabhi raajaon se badtar nikala jo usse pehale huye the.+
31 usne bhi vahi paap kiye jo nabat ke bete yaarobam ne kiye the+ aur maano yah kaafi na tha, usne seedoniyon+ ke raja etabal ki beti izebel+ se shaadi ki aur woh baal devta ki seva karne aur uske aage dandvat karne laga.+
32 itna hi nahin, usne saamriya mein baal devta ka jo mandir+ banvaya tha, vahaan us devta ke liye ek vedi bhi khadi karvayi.
33 usne pooja-laath* bhi banvayi.+ ahab ne itne paap kiye ki usne un sabhi raajaon se badhkar yahova ka krodh bhadkaya, jo usse pehale israel mein huye the.
34 ahab ke dinon mein betel ke rehnevale hiel ne yareeho shehar ko dobara banvaya. magar use iski bhaari keemat chukani padi. jab usne yareeho ki ninv daali to uska pehalautha abeeram mar gaya aur jab usne faatak lagvaye to uska sabse chhota beta sagoob mar gaya. is tarah yahova ka woh vachan poora hua jo usne noon ke bete yahoshoo se kehalvaya tha.+
kai footnote
^ shaa., “apne purkhon ke saath so gaya.”
^ yaani yaarobam ke bete naadab ko.
^ ya “uske khoon ka badla lenevalon.”
^ matlab “shemer kul ka.”
^ shaa., “apne purkhon ke saath so gaya.”
