pehala raja 22:1-53
22 seeriya aur israel ke beech teen saal tak koi yuddh nahin hua.
2 teesre saal yahooda ka raja yahoshapat+ israel ke raja se milne gaya.+
3 israel ke raja ne apne sevkon se kaha, “kya raamot-gilad+ hamara ilaka nahin hai? fir hum use seeriya ke raja se vaapas lene se kyon jhijhak rahe hain?”
4 fir usne yahoshapat se kaha, “kya tu yuddh karne mere saath raamot-gilad chalega?” yahoshapat ne israel ke raja se kaha, “hum donon ek hain. mere log tere hi log hain. mere ghode tere ghode hain.”+
5 magar yahoshapat ne israel ke raja se kaha, “kyon na hum pehale yahova se poochhein+ ki uski kya salah hai?”+
6 isliye israel ke raja ne bhavishyavaktaon ko ikattha kiya jo kareeb 400 the. usne unse poochha, “kya main raamot-gilad par hamla karne jaaun?” unhonne kaha, “jaa, tu hamla kar, yahova use tere haath mein kar dega.”
7 fir yahoshapat ne kaha, “kya yahaan yahova ka koi bhavishyavakta nahin hai? chalo hum uske zariye bhi poochhte hain.”+
8 tab israel ke raja ne yahoshapat se kaha, “ek aur aadmi hai jiske zariye hum yahova se salah maang sakte hain,+ magar mujhe us aadmi se nafrat hai.+ woh mere baare mein kabhi achhi baaton ki bhavishyavani nahin karta, sirf buri baatein kehta hai.+ woh yimla ka beta meekayah hai.” magar yahoshapat ne kaha, “raja ko aisi baat nahin kehni chahiye.”
9 tab israel ke raja ne apne ek darbaari ko bulaya aur usse kaha, “yimla ke bete meekayah ko fauran yahaan le aa.”+
10 israel ka raja ahab aur yahooda ka raja yahoshapat, shaahi kapde pehne saamriya ke faatak ke paas ek khalihan mein apni-apni raajgaddi par baithe the. saare bhavishyavakta un donon ke saamne bhavishyavani kar rahe the.+
11 tab kanaana ke bete sidkiyah ne apne liye lohe ke sing banvaye aur kaha, “tere liye yahova ka yah sandesh hai: ‘tu seeriya ke logon ko inse tab tak maarta* rahega jab tak ki woh mit nahin jaate.’”
12 baaki bhavishyavakta bhi yahi bhavishyavani kar rahe the. woh keh rahe the, “jaa, tu raamot-gilad par hamla kar. tu zaroor kaamyab hoga, yahova use tere haath mein kar dega.”
13 meekayah ko bulane ke liye jo doot gaya tha, usne meekayah se kaha, “dekh, saare bhavishyavakta raja ko ek hi baat bata rahe hain. woh use achhi baaton ki bhavishyavani suna rahe hain. isliye meharbani karke tu bhi unki tarah koi achhi baat suna.”+
14 magar meekayah ne kaha, “yahova ke jeevan ki shapath, main vahi baat bataunga jo yahova mujhe batayega.”
15 fir meekayah raja ke paas aaya aur raja ne usse poochha, “meekayah, tu kya kehta hai, hum raamot-gilad par hamla karein ya na karein?” usne fauran javab diya, “jaa, tu raamot-gilad par hamla kar. tu zaroor kaamyab hoga, yahova use tere haath mein kar dega.”
16 raja ne usse kaha, “main tujhe kitni baar shapath dharakar kahoon ki tu yahova ke naam se mujhe sirf sach batayega?”
17 tab meekayah ne kaha, “main dekh raha hoon ki saare israeli pahadon par titar-bitar ho gaye hain,+ un bhedon ki tarah jinka koi charvaha nahin hota. yahova kehta hai, ‘inka koi maalik nahin hai. inmein se har koi shaanti se apne ghar laut jaaye.’”
18 tab israel ke raja ne yahoshapat se kaha, “dekha, mainne kaha tha na, yah aadmi mere baare mein achhi baaton ki bhavishyavani nahin karega, sirf buri baatein kahega.”+
19 fir meekayah ne kaha, “isliye ab yahova ka sandesh sun. mainne dekha hai ki yahova apni raajgaddi par baitha hai+ aur uske daayin aur baayin taraf swarg ki saari sena khadi hai.+
20 fir yahova ne kaha, ‘ahab ko kaun bevkoof banayega taaki woh raamot-gilad jaaye aur vahaan maara jaaye?’ tab sena mein se kisi ne kuch kaha to kisi ne kuch.
21 fir ek swargdoot+ yahova ke saamne aakaar khada hua aur usne kaha, ‘main ahab ko bevkoof banaunga.’ yahova ne poochha, ‘tu yah kaise karega?’
22 usne kaha, ‘main jaakaar uske sabhi bhavishyavaktaon ke munh se jhooth bulvaunga.’+ parmeshvar ne kaha, ‘tu use bevkoof bana lega, tu zaroor kaamyab hoga. jaa, toone jaisa kaha hai vaisa hi kar.’
23 isliye yahova ne tere in sabhi bhavishyavaktaon ke munh se jhooth bulvaya hai,+ magar yahova ne ailan kiya hai ki tujh par sankat aayega.”+
24 tab kanaana ka beta sidkiyah, meekayah ke paas gaya aur uske gaal par zor se thappad maara aur kaha, “yahova ka swargdoot kab se mujhe chhodkar tujhse baat karne laga hai?”+
25 meekayah ne kaha, “iska javab tujhe us din milega jab tu bhaagkar andar ke kamre mein jaa chhipega.”
26 tab israel ke raja ne hukm diya, “le jaao is meekayah ko. ise shehar ke pradhan aamon aur raja ke bete yoash ke havale kar do.
27 unse kehna, ‘raja ne aadesh diya hai ki ise jail mein band kar do+ aur jab tak main sahi-salamat laut nahin aata tab tak ise naam ke liye khaana-paani dete rehna.’”
28 magar meekayah ne kaha, “agar tu sahi-salamat lauta to iska matlab yah hoga ki yahova ne mere zariye baat nahin ki hai.”+ fir usne kaha, “logo, tum sab yah baat yaad rakhna.”
29 iske baad israel ka raja ahab aur yahooda ka raja yahoshapat raamot-gilad gaye.+
30 israel ke raja ne yahoshapat se kaha, “main apna bhes badalkar yuddh mein jaaunga, magar tu apne shaahi kapde pehne rehna.” israel ka raja bhes badalkar yuddh mein gaya.+
31 vahaan seeriya ke raja ne apni rath-sena ke 32 senapatiyon+ ko yah hukm diya tha, “tum log seedhe israel ke raja se yuddh karna, uske siva kisi aur se mat ladna, fir chahe woh koi maamooli sainik ho ya bada adhikari.”
32 jaise hi rath-sena ke senapatiyon ne yahoshapat ko dekha unhonne socha, “zaroor yahi israel ka raja hoga.” isliye woh sab yahoshapat par hamla karne lage aur woh madad ke liye pukarne laga.
33 jaise hi senapatiyon ko pata chala ki woh israel ka raja nahin hai, unhonne uska peechha karna chhod diya.
34 tab kisi sainik ne yoon hi ek teer chalaya aur woh teer israel ke raja ko vahaan jaa laga jahaan kavach aur bakhtar ka doosra hissa juda hua tha. raja ne apne saarthi se kaha, “rath ghumakar mujhe yuddh ke maidan se baahar le jaa, main buri tarah ghaayal ho gaya hoon.”+
35 poore din ghamasan ladai chalti rahi aur raja ko sahara dekar seeriya ke logon ke saamne rath par khada rakhna pada. raja ke ghaav se khoon nikaalkar rath ke farsh par behta raha aur shaam hote-hote woh mar gaya.+
36 jab sooraj dhalne laga to poori chhaavni mein yah ailan kiya gaya, “sab log apne-apne shehar laut jaayen! sab log apne-apne desh laut jaayen!”+
37 is tarah raja ki maut ho gayi aur uski laash saamriya laayi gayi aur vahaan dafna di gayi.
38 jab unhonne uska rath saamriya ke taalab ke paas dhoya to kutton ne uska khoon chaata aur vahaan veshyaon ne nahaya.* is tarah woh baat poori hui jo yahova ne kahi thi.+
39 ahab ki zindagi ki baaki kahani, usne jo-jo kaam kiye, haathi-daant+ ka jo mahal banvaya aur jo shehar banvaye, un sabka byaura israel ke raajaon ke itihas ki kitab mein likha hai.
40 ahab ki maut ho gayi*+ aur uski jagah uska beta ahajyah+ raja bana.
41 jab israel mein ahab ke raaj ka chautha saal chal raha tha, tab yahooda mein aasa ka beta yahoshapat+ raja bana tha.
42 jab yahoshapat raja bana tab woh 35 saal ka tha aur usne yarooshalem mein rehkar 25 saal raaj kiya. uski maa ka naam ajoobah tha jo shilhi ki beti thi.
43 yahoshapat apne pita aasa ke nakshe-kadam par chalta raha.+ woh us raah se nahin bhatka aur usne yahova ki nazar mein sahi kaam kiye.+ fir bhi, uske raaj mein unchi jagah nahin mitayi gayin aur log ab bhi un jagahon par balidan chadhaya karte the taaki unka dhuaan uthe.+
44 yahoshapat ne israel ke raja ke saath shaanti banaye rakhi.+
45 yahoshapat ki zindagi ki baaki kahani, uski badi-badi kaamyabiyaan aur usne kaise yuddh kiye, un sabka byaura yahooda ke raajaon ke itihas ki kitab mein likha hai.
46 usne apne pita aasa ke samay ke bache huye un aadmiyon ko bhi desh se nikaal diya jo mandiron mein doosre aadmiyon ke saath sambhog karte the.+
47 un dinon edom+ mein koi raja nahin tha, sirf ek raajyapal raaj karta tha.+
48 yahoshapat ne tarsheesh ke jahaz* bhi banvaye taaki ye sona laane ke liye opeer jaayen,+ magar ye jahaz vahaan nahin jaa sake kyonki esyon-geber mein ye tootkar tahas-nahas ho gaye.+
49 fir ahab ke bete ahajyah ne yahoshapat se kaha, “mere sevkon ko tu apne sevkon ke saath jahazon par jaane de,” magar yahoshapat raazee nahin hua.
50 fir yahoshapat ki maut ho gayi*+ aur use uske purkhe daavid ke shehar daavidpur mein purkhon ki kabraa mein dafnaya gaya. uski jagah uska beta yahoram+ raja bana.
51 jab yahooda mein yahoshapat ke raaj ka 17vaan saal chal raha tha tab israel mein ahab ka beta ahajyah+ raja bana. ahajyah ne saamriya se israel par do saal raaj kiya.
52 woh yahova ki nazar mein bure kaam karta raha. woh apne maata-pita+ ke nakshe-kadam par aur nabat ke bete yaarobam ke nakshe-kadam par chala, jisne israel se paap karvaya tha.+
53 woh apne pita ki tarah baal devta ki seva karta raha+ aur uske aage dandvat karke israel ke parmeshvar yahova ka krodh bhadkata raha.+
kai footnote
^ ya “dhakelta.”
^ ya shaayad, “jahaan veshyayen nahati thi, vahaan kutton ne uska khoon chaata.”
^ shaa., “apne purkhon ke saath so gaya.”
^ shaa., “apne purkhon ke saath so gaya.”
