pehala raja 9:1-28
9 jab sulaiman ne yahova ka bhavan, apna raajmahal aur jo kuch woh banana chahta tha woh sab banane ka kaam poora kiya,+ to iske fauran baad
2 yahova ne use doosri baar darshan diya, jaise usne gibon mein use darshan diya tha.+
3 yahova ne darshan mein usse kaha, “toone mujhse jo prarthna aur kripa ki binti ki hai woh mainne suni hai. mainne is bhavan ke saath, jise toone banaya hai, apna naam hamesha ke liye joda hai aur is tarah ise pavitra thehraya hai.+ meri aankhein hamesha is par lagi raheingi aur yah bhavan sada mere dil ke kareeb rahega.+
4 aur agar tu woh sab karega jiski mainne tujhe aagya di hai+ aur mere niyam aur nyay-siddhaant maanega aur is tarah apne pita daavid ki tarah mere saamne seedhai+ se aur nirdosh man+ se chalega,+
5 to main israel par teri raajgaddi hamesha ke liye kaayam rakhoonga, theek jaise mainne tere pita daavid se yah vaada kiya tha, ‘aisa kabhi nahin hoga ki israel ki raajgaddi par baithne ke liye tere vansh ka koi aadmi na ho.’+
6 lekin agar tu aur tere vanshaj mujhse munh ferkar mere peechhe chalna chhod deinge aur meri aagyaon aur vidhiyon ko maanna chhod deinge jo mainne tujhe di hain aur jaakaar paraye devtaon ki pooja kareinge aur unhein dandvat kareinge,+
7 to main israel ko is desh mein se mita doonga jo mainne use diya hai+ aur is bhavan ko, jise mainne apne naam ki mahima ke liye pavitra thehraya hai, apni nazron se door kar doonga.+ tab israel sab deshon mein mazak* bankar reh jaayega, uski barbadi dekhkar sab hanseinge.+
8 aur yah bhavan malbe ka dher ho jaayega.+ iske paas se guzarnevala har koi ise fati aankhon se dekhta reh jaayega aur mazak udate huye seeti bajayega aur kahega, ‘yahova ne is desh ki aur is bhavan ki aisi haalaat kyon kar di?’+
9 fir woh kaheinge, ‘woh isliye ki unhonne apne parmeshvar yahova ko chhod diya jo unke purkhon ko misra se nikaal laaya tha aur unhonne doosre devtaon ko apna liya aur woh unhein dandvat karke unki seva karne lage. iseeliye yahova un par yah sankat le aaya.’”+
10 sulaiman ko yahova ka bhavan aur raajmahal banane mein poore 20 saal lage.+ iske baad
11 raja sulaiman ne sor ke raja heeram+ ko galeel praant ke 20 shehar tohfe mein diye kyonki heeram ne use devdar aur sanovar ki lakdi di thi aur sulaiman ne usse jitna sona maanga tha utna usne diya tha.+
12 heeram, sor se un shehron ko dekhne gaya jo sulaiman ne use diye the, magar woh shehar use pasand nahin aaye.*
13 usne sulaiman se kaha, “mere bhaai, ye kaise shehar diye hain toone?” isliye un shehron ko kaabool desh* kaha gaya aur aaj tak woh isi naam se jaane jaate hain.
14 heeram ne raja sulaiman ke liye 120 tode* sona bheja tha.+
15 yah un logon ke kaamon ka byaura hai jinhein raja sulaiman ne jabran mazdoori par lagaya tha.+ unhonne yahova ka bhavan,+ sulaiman ka raajmahal, teela,*+ yarooshalem ki sheharpanah, saath hi haasor,+ magiddo+ aur gejer shehar+ banaye.
16 (misra ke raja firaun ne aakaar gejer par kabza kar liya tha aur use aag se foonk diya tha. usne shehar mein rehnevale kanaaniyon+ ko bhi maar daala tha. usne yah shehar apni beti yaani sulaiman ki patni ko vidai ke vakt tohfe* mein diya tha.)+
17 sulaiman ne gejer, nichla bet-horon+ aur
18 baalat,+ saath hi taamar shehar banaya* jo israel desh ke veerane mein aata hai.
19 iske alava, sulaiman ne apne sabhi godamvale shehar, rathon ke shehar+ aur ghudsavaaron ke liye shehar banaye aur yarooshalem aur labanon mein aur apne raajya ke poore ilake mein woh jo-jo banana chahta tha woh sab usne banaya.
20 emoriyon, hittiyon, parijjiyon, hivviyon aur yaboosiyon mein se bache huye log,+ jo israel ki praja nahin the+
21 aur jinhein israeli naash nahin kar paaye the, unke vanshaj israel desh mein rehte the. sulaiman ne in logon ko gulam banakar jabran mazdoori mein laga diya aur aaj tak woh yahi kaam karte hain.+
22 magar sulaiman ne kisi bhi israeli ko gulam nahin banaya.+ woh to uske yoddha, uske adhikari, haakim, sahayak sena-adhikari aur saarthiyon aur ghudsavaaron ke pradhan the.
23 sulaiman ke kaam ki nigrani karnevale adhikariyon ki ginti 550 thi. unhein karamchariyon par adhikar diya gaya tha.+
24 magar firaun ki beti+ daavidpur+ chhodkar us mahal mein rehne lagi jo sulaiman ne uske liye banvaya tha. fir sulaiman ne teela* banvaya.+
25 sulaiman saal mein teen baar+ us vedi par, jo usne yahova ke liye banayi thi, hom-baliyaan aur shaanti-baliyaan chadhaya karta tha.+ saath hi, yahova ke saamne jo vedi thi, us par bhi woh balidan chadhata tha taaki dhuaan uthe. is tarah usne bhavan banane ka kaam poora kiya.+
26 raja sulaiman ne esyon-geber+ mein jahazon ka ek bada lashkar bhi banaya. esyon-geber, edom desh mein laal saagar ke tat par elot ke paas hai.+
27 heeram ne jahazon ke lashkar ke saath apne tajurbekar naavikon ko bheja tha+ taaki woh sulaiman ke sevkon ke saath milkar kaam karein.
28 woh opeer+ gaye aur vahaan se 420 tode sona raja sulaiman ke paas le aaye.
kai footnote
^ shaa., “kahavat.”
^ shaa., “woh uski nazron mein sahi nahin the.”
^ ya shaayad, “na ke barbar desh.”
^ ya “millo.” is ibrani shabd ka matlab “bharna” hai.
^ ya “shaadi ke tohfe; dahej.”
^ ya “mazboot kiya.”
^ ya “millo.” is ibrani shabd ka matlab “bharna” hai.
