pehala shamooel 13:1-23
13 jab shaaool raja bana tab woh . . .* saal ka tha.+ use israel par raaj karte do saal huye the.
2 shaaool ne israeliyon mein se 3,000 aadmi chune aur baaki logon ko apne-apne tamboo mein bhej diya. un 3,000 aadmiyon mein se 2,000 aadmi shaaool ke saath mikmash mein aur betel ke paas pahadi pradesh mein the aur 1,000 aadmi yonatan+ ke saath binyameen ke giba+ mein the.
3 yonatan ne palishtiyon ki us chauki par fatah haasil ki+ jo giba+ mein thi aur yah khabar palishtiyon ne suni. shaaool ne poore israel desh mein narsinga funkvakar+ yah ailan karvaya, “ibri logo, suno!”
4 tab poore israel ne yah khabar suni, “shaaool ne palishtiyon ki ek chauki par fatah haasil ki hai aur ab palishti, israel se nafrat karne lage hain.” isliye israeli logon ko aadesh diya gaya ki woh gilgal+ mein shaaool ke paas ikattha hon.
5 udhaar palishti bhi israeliyon se ladne ke liye ikattha huye. unki sena mein 30,000 yuddh-rath aur 6,000 ghudsavaar the. unke sainikon ki ginti itni thi ki woh samundar kinare ki baaloo ke kinkon jitne lag rahe the.+ unhonne oopar chadhkar bet-aaven+ ke poorab mein mikmash mein chhaavni daali.
6 israel ke aadmiyon ne dekha ki ab un par bada sankat aa gaya hai. dar aur chinta se unka bura haal ho gaya isliye woh bhaagkar gufaon, gaddhon, chattanon, tahkhanon aur kundon mein jaa chhipe.+
7 kuch ibri log to yardan paar karke gaad aur gilad ke ilake mein bhaag gaye.+ magar shaaool gilgal mein hi raha aur jitne log uske saath the woh sab dar ke maare kaanp rahe the.
8 shaaool shamooel ke tay samay tak saat din intazar karta raha, magar shamooel gilgal nahin pahuncha aur log shaaool ko chhodkar idhar-udhaar jaane lage the.
9 aakhirkar shaaool ne kaha, “hom-bali aur shaanti-baliyaan mere paas laao.” fir usne khud hom-bali chadha di.+
10 magar jaise hi usne hom-bali chadhane ka kaam poora kiya, shamooel aa gaya. tab shaaool jaakaar shamooel se mila aur usse dua-salam kiya.
11 shamooel ne usse kaha, “yah toone kya kiya?” shaaool ne kaha, “log mujhe chhodkar jaane lage the+ aur tu bhi tay samay ke andar nahin aaya aur palishti mikmash mein ikattha hone lage the.+
12 mainne socha ab palishti neeche gilgal utar aayenge aur mujh par hamla kar deinge aur mainne ab tak yahova ki kripa ke liye usse binti nahin ki hai. isliye mujhe majboor hokar hom-bali chadhani padi.”
13 tab shamooel ne shaaool se kaha, “toone badi moorkhta ka kaam kiya hai. toone apne parmeshvar yahova ki aagya nahin maani.+ agar maani hoti, to yahova israel par tera raaj sada kaayam rakhta.
14 magar ab tera raaj kaayam nahin rahega.+ yahova apne liye ek aisa aadmi dhoondh lega jo uske dil ko bhaata hai+ aur yahova use apne logon ka aguva thehrayega+ kyonki toone yahova ki aagya nahin maani.”+
15 iske baad shamooel gilgal se nikala aur binyameen ke giba gaya. shaaool ne apne sainikon ki ginti li aur paaya ki kareeb 600 aadmi uske saath reh gaye hain.+
16 shaaool aur uske bete yonatan ne aur unke saathvale aadmiyon ne binyameen ke geba+ mein chhaavni daali. aur palishti log mikmash mein chhaavni daale huye the.+
17 palishti sena mein se lootmar karnevale sainik teen dal banakar apni chhaavni se nikaalte the. ek dal opra jaanevale raaste se shooaal praant mein jaata tha,
18 doosra dal bet-horon+ jaanevala raasta leta tha aur teesra dal us sarhad ki taraf jaanevala raasta leta tha jiske saamne saboim ghaati hai aur jo veerane ki taraf hai.
19 poore israel desh mein ek bhi dhaatu-kaareegar nahin tha kyonki palishtiyon ne kaha, “taaki ibri log talvar ya bhaala na bana sakein.”
20 sab israeliyon ko hal ke faal, gainti, kulhadi aur hansiye par dhaar lagane palishtiyon ke paas jaana padta tha.
21 hal ke faal, gainti, teen-nonkvale auzar aur kulhadi par dhaar chadhane aur dande par paina lagvane ki keemat ek pim* thi.
22 yahi vajah thi ki yuddh ke din shaaool aur yonatan ke saathvale aadmiyon mein se kisi ke paas bhi talvar ya bhaala nahin tha.+ sirf shaaool aur uske bete yonatan ke paas hathiyar the.
23 palishtiyon ki ek chauki mikmash+ ki tang ghaati mein jaa chuki thi.
kai footnote
^ ibrani paath mein sankhya nahin di gayi hai.
^ ek pracheen baat-patthar, jo ek shekel ka kareeb do-tihai hissa tha.