pehala shamooel 17:1-58
17 palishti log+ apni sena ki tukdiyaan lekar israeliyon se yuddh karne sokoh+ mein ikattha huye jo yahooda ke ilake mein hai. unhonne sokoh aur ajeka+ ke beech epes-dammeem+ mein chhaavni daali.
2 shaaool aur israeli aadmi bhi ikattha huye aur unhonne elah ghaati+ mein chhaavni daali. woh palishtiyon se mukabla karne ke liye dal baandhkar tainat ho gaye.
3 palishti log ek taraf ke pahad par tainat the aur israeli doosri taraf ke pahad par. donon ke beech ek ghaati thi.
4 fir palishtiyon ki taraf se ek veer yoddha unki chhaavni se nikaalkar aaya. uska naam goliyat+ tha aur woh gat+ ka rehnevala tha. woh kareeb saadhe nau fut* lamba tha.
5 uske sir par tambe ka top tha aur usne tambe ka bakhtar*+ pehn rakha tha jiska vazan 5,000 shekel* tha.
6 uski taangon par tambe ka kavach tha aur woh apni peeth par tambe ki barchhi+ latkaye huye tha.
7 uske bhaale ka danda julahe ke latthe jaisa bhaari tha+ aur bhaale ke lohe ke fal ka vazan 600 shekel* tha. uske aage-aage uski dhaal dhonevala sainik chalta tha.
8 goliyat saamne aakaar khada ho gaya aur usne israel ke sena-dal ko yah kehkar lalkara,+ “tum log yahaan dal baandhkar kyon aaye ho? main palishtiyon ka maana hua soorma hoon aur tum shaaool ke sevak ho. jaao, apne liye koi aisa aadmi chun lo jo mera mukabla kar sake aur use bhejo mere paas.
9 agar woh mujhse ladkar mujhe maar giraye to hum log tumhare gulam ban jaayenge. lekin agar mainne use maar daala to tum hamare daas ban jaaoge, hamari gulami karoge.”
10 us palishti ne yah bhi kaha, “aaj main israel ki sena ko chunauti deta hoon,+ bhejo kisi aadmi ko mere paas. ho jaaye mukabla!”
11 jab shaaool aur saare israeliyon ne us palishti ki ye baatein sunin to woh bahot dar gaye aur thar-thar kaanpne lage.
12 daavid, yahooda ke betlehem+ eprata+ ke rehnevale yishai ka beta tha. yishai+ ke aath bete the+ aur jab shaaool raja tha tab tak yishai boodha ho chuka tha.
13 yishai ke teen bade bete shaaool ke saath yuddh mein gaye huye the.+ sabse bada eleeab tha,+ doosra abeenadab+ aur teesra shammah tha.+
14 daavid sabse chhota tha.+ uske woh teenon bade bhaai shaaool ke saath yuddh mein gaye huye the.
15 daavid apne pita ki bhedon ko charane+ ke liye shaaool ke yahaan se betlehem aaya-jaaya karta tha.
16 is beech woh palishti aadmi har din subah-shaam yuddh ke maidan mein aakaar israeliyon ko lalkarta tha. aisa woh 40 din tak karta raha.
17 ek din yishai ne apne bete daavid se kaha, “beta, ye epa-bhar* bhuna hua anaj aur ye das rotiyaan lekar fauran apne bhaaiyon ke paas chhaavni mein jaa.
18 aur paneer ke ye das tukde le jaakaar unke sena-adhikari* ko de aa. tu jaakaar apne bhaaiyon ka haal-chaal poochh aur unke paas se koi aisi nishani laa jisse mujhe yakeen ho ki woh sahi-salamat hain.”
19 daavid ke bhaai palishtiyon se ladne+ ke liye shaaool aur baaki israeli aadmiyon ke saath elah ghaati mein the.+
20 daavid agle din subah jaldi utha aur usne apni bhedon ki rakhvali karne ka zimma kisi aur ko saunpa. fir woh saaman baandhkar nikaal pada, theek jaise uske pita yishai ne use aagya di thi. jab daavid chhaavni ke paas pahuncha, to usne dekha ki sena naare lagati hui yuddh ke maidan ki taraf badh rahi hai.
21 israeli aur palishti sena mukable ke liye aamne-saamne tainat ho gayin.
22 daavid ne fauran apna saaman us aadmi ke paas chhoda jo saaman ki rakhvali karta tha aur daudkar yuddh ke maidan mein gaya. vahaan usne apne bhaaiyon ki khairiyat poochhi.+
23 daavid unse baat kar hi raha tha ki tabhi palishtiyon ki sena mein se unka soorma goliyat+ nikaalkar saamne aaya, jo gat se tha. usne har din ki tarah israeliyon ko lalkara+ aur daavid ne yah sab suna.
24 jab israeli aadmiyon ne us yoddha ko dekha to woh sab dar ke maare bhaag khade huye.+
25 woh ek-doosre se keh rahe the, “dekha us aadmi ko? kaise israel ko lalkarta hai.+ raja ne kaha hai ki jo us palishti ko maar daalega use woh khoob saari daulat dega, usse apni beti ki shaadi karayega+ aur uske pita ke gharane ko kar aur seva se chhoot de dega.”
26 daavid ne paas khade aadmiyon se poochha, “us palishti ko jo maar daalega aur israel ko badnam hone se bachayega use kya inam milega? us khatnarahit palishti ki yah majal ki woh jeevit parmeshvar ki sena ko lalkare?”+
27 tab un aadmiyon ne daavid ko vahi baat batayi, “jo us aadmi ko maar daalega use ye-ye diya jaayega.”
28 jab daavid ke bade bhaai eleeab+ ne use vahaan khade aadmiyon se baat karte dekha to woh daavid par bhadak utha aur kehne laga, “tu yahaan kyon aaya hai? tu un thodi-si bhedon ko veerane mein kiske paas chhod aaya?+ tu sabkuch chhod-chhaadkar yuddh ka nazara dekhne chala aaya? itni gustakhi! main jaanta hoon, tera dil saaf nahin hai.”
29 tab daavid ne kaha, “mainne kaun-saa bada gunah kar diya? bas ek saval hi to poochha hai!”
30 isliye daavid kisi aur ke paas gaya aur usse bhi vahi saval poochha.+ un logon ne bhi vahi javab diya.+
31 kuch aadmiyon ne daavid ki baat sun li thi aur jaakaar is baare mein shaaool ko bataya. tab shaaool ne daavid ko apne paas bulvaya.
32 daavid ne shaaool se kaha, “us palishti ki vajah se kisi ka man kachcha na ho.* tera yah daas usse ladega.”+
33 magar shaaool ne kaha, “tu us palishti se kaise lad sakta hai? tu bas ek chhota-saa ladka hai+ aur woh ladakpan se sainik* raha hai.”
34 tab daavid ne kaha, “tera yah daas apne pita ki bhedon ka charvaha bhi hai. ek baar jab ek sher+ meri ek bhed ko uthakar le jaane laga aur doosri baar ek bhaaloo ek bhed ko uthakar le jaane laga,
35 to mainne unka peechha kiya aur unhein maara aur bhed ko unke munh se bachaya. jab un jaanvaron ne mujh par hamla kiya to mainne unke baal kaskar pakad liye* aur unhein girakar maar daala.
36 tere daas ne sher aur bhaaloo, donon ko maar daala. is khatnarahit palishti ka bhi vahi anjam hoga kyonki isne jeevit parmeshvar ki sena ko lalkara hai.”+
37 daavid ne yah bhi kaha, “yahova, jisne mujhe sher aur bhaaloo ke panjon se bachaya tha, vahi mujhe is palishti ke haath se bhi bachayega.”+ tab shaaool ne daavid se kaha, “jaa, yahova tere saath rahe.”
38 fir shaaool ne daavid ko apne kapde pehnaye. usne daavid ke sir par tambe ka top rakha aur use ek bakhtar pehnaya.
39 fir daavid ne shaaool ki talvar apne kapdon par baandh li aur chalne ki koshish ki, magar woh chal nahin paaya kyonki woh in sabka aadi nahin tha. daavid ne shaaool se kaha, “main yah sab pehankar nahin chal paa raha hoon, mujhe inki aadat nahin hai.” isliye daavid ne woh sab utar diya.
40 usne haath mein apni laathi li aur ghaati se paanch chikne-chikne patthar chune aur apni charvahe ki thaili mein rakhe. uske haath mein uska gofan tha.+ fir woh us palishti ki taraf badhne laga.
41 woh palishti kadam badhata hua daavid ki taraf aane laga aur uski dhaal dhonevala sainik uske aage-aage chal raha tha.
42 jab us palishti ki nazar daavid par padi to usne daavid ko neechi nazron se dekha. usne daavid ki khilli udayi kyonki woh bas ek sundar-saa ladka tha jisse laali jhalakti thi.+
43 us palishti ne daavid se kaha, “kya main kutta hoon+ jo tu danda lekar mujhe bhagane aaya hai?” fir woh apne devtaon ke naam se daavid ko shaap dene laga.
44 us palishti ne daavid se kaha, “aa jaa, main tujhe maarkar tera maans aakash ke pakshiyon aur maidan ke jaanvaron ko khila doonga.”
45 tab daavid ne us palishti se kaha, “tu talvar, bhaala aur barchhi lekar mujhse ladne aa raha hai,+ magar main senaon ke parmeshvar yahova ke naam se aa raha hoon,+ israel ki sena ke parmeshvar ke naam se jise toone lalkara hai.+
46 aaj hi ke din yahova tujhe mere haath mein kar dega+ aur main tujhe maar daaloonga aur tera sir kaat daaloonga. aaj main sabhi palishti sainikon ki laashein aakash ke pakshiyon aur dharti ke jangli jaanvaron ko khila doonga. tab dharti ke sab log jaan jaayenge ki israel ka parmeshvar hi sachcha parmeshvar hai.+
47 aur yahaan jitne log ikattha hain woh sab jaan jaayenge* ki apne logon ko bachane ke liye yahova ko talvar ya bhaale ki zaroorat nahin,+ kyonki yuddh yahova ka hai+ aur woh tum sabko hamare haath mein kar dega.”+
48 tab woh palishti daavid ka saamna karne ke liye aage badhne laga, magar daavid uska mukabla karne palishti sena ki taraf furti se dauda.
49 daavid ne apni thaili se ek patthar nikaalkar gofan mein rakha aur us palishti ki taraf aisa feinka ki woh seedhe jaakaar uske maathe par laga aur andar dhans gaya. woh palishti vahin munh ke bal zameen par gir pada.+
50 is tarah daavid ne gofan aur ek patthar se us palishti ko haraya. usne bina talvar ke us palishti ka kaam tamam kar diya.+
51 daavid dauda-dauda gaya aur us palishti ke oopar khada ho gaya. usne us aadmi ki myan se talvar nikaali+ aur uska sir kaat daala taaki yah pakka ho jaaye ki woh mar chuka hai. jab palishtiyon ne dekha ki unka soorma mar gaya hai to woh sab bhaag gaye.+
52 yah sab dekhkar israel aur yahooda ke aadmi khushi se chillane lage. woh palishtiyon ka peechha karne lage aur ghaati+ se lekar ekron+ ke faatkon tak unka ghaat karte gaye. shaaraim+ se lekar door gat aur ekron tak, poore raaste par unki laashein bichh gayin.
53 is tarah israeliyon ne palishtiyon ka betahasha peechha kiya aur vaapas aakaar unki chhaavniyaan loot lin.
54 fir daavid us palishti ka sir uthakar yarooshalem le aaya, magar uske hathiyar usne apne tamboo mein rakhe.+
55 jab shaaool ne daavid ko us palishti ka saamna karne ke liye jaate dekha to usne apne senapati abner+ se poochha, “abner, yah kiska ladka hai?”+ abner ne kaha, “hey raja, tere jeevan ki shapath, main nahin jaanta!”
56 raja ne usse kaha, “pata lagao ki yah naujavan kiska beta hai.”
57 isliye jaise hi daavid us palishti ko maar daalne ke baad lauta, abner use shaaool ke paas laaya. daavid ke haath mein us palishti ka sir tha.+
58 shaaool ne usse poochha, “tu kiska beta hai?” daavid ne kaha, “main tere daas yishai ka beta hoon+ jo betlehem ka rehnevala hai.”+
kai footnote
^ yah kavach andar se kapde ya chamde ka bana hota tha. iske oopar dhaatu ke tukde aise lage hote the jaise machhli par chhilkon ki kataarein hoti hain.
^ ya “hazaron ke pradhan.”
^ ya “koi himmat na haare.”
^ ya “ek veer yoddha.”
^ ya “unhein jabde se pakda.”
^ shaa., “yah poori mandli jaan jaayegi.”