pehala shamooel 19:1-24
19 baad mein shaaool ne apne bete yonatan aur apne sabhi sevkon se daavid ko maar daalne ke baare mein baat ki.+
2 magar yonatan daavid ko bahot pasand karta tha+ isliye usne daavid ko bataya, “mera pita shaaool tujhe maar daalna chahta hai. kal subah tu zara bachkar rehna. kisi aisi jagah chhip jaana jahaan tu nazar na aaye aur vahin rehna.
3 main apne pita ke saath us maidan mein khada rahoonga jahaan tu chhipa hoga. main usse tere baare mein baat karoonga aur agar mujhe kuch aur pata chalega to tujhe zaroor bataunga.”+
4 fir yonatan ne apne pita shaaool ko daavid ke baare mein achhi baatein batayin.+ usne shaaool se kaha, “hey raja, apne sevak daavid ke khilaf koi paap mat kar, kyonki usne tere khilaf koi paap nahin kiya hai balki hamesha teri bhalai ke liye hi kaam kiya hai.
5 usne apni jaan hatheli par rakhkar us palishti ko maar daala tha+ aur is vajah se yahova ne poore israel ko shaandar jeet dilayi thi.* toone khud apni aankhon se yah sab dekha tha aur us vakt tu khushi se foola nahin samaya tha. fir ab kyon tu bevajah daavid ko maar daalna chahta hai aur ek begunah ka khoon apne sir lena chahta hai?”+
6 shaaool ne yonatan ki baat maan li aur shapath khaakaar kaha, “yahova ke jeevan ki shapath, main uski jaan nahin loonga.”
7 baad mein yonatan ne daavid ko bulaya aur use yah sab bataya. fir yonatan daavid ko shaaool ke paas le gaya aur daavid pehale ki tarah shaaool ki seva karne laga.+
8 kuch samay baad, israeliyon aur palishtiyon ke beech ek baar fir yuddh chhid gaya. daavid palishtiyon se ladne gaya aur usne badi taadad mein palishtiyon ko maar daala. woh uske saamne se bhaag gaye.
9 jab shaaool haath mein bhaala liye apne ghar par baitha tha aur daavid surmandal par sangeet baja raha tha, to shaaool par uski buri fitrat haavi ho gayi aur yahova ne aisa hone diya.+
10 shaaool ne apna bhaala daavid par feinka taaki use deevar par thonk de, magar daavid hat gaya aur bhaala deevar se jaa laga. us raat daavid shaaool se bachkar bhaag gaya.
11 baad mein shaaool ne apne dooton ko daavid ke ghar bheja taaki woh daavid par nazar rakhein aur subah use maar daalein,+ magar daavid ki patni meekal ne usse kaha, “agar aaj raat tu yahaan se nahin bhaagega to kal tak tu zinda nahin bachega.”
12 fir meekal ne fauran daavid ko khidki se neeche utar diya taaki woh bachkar bhaag jaaye.
13 meekal ne kul devta ki moorat li aur use palang par lita diya aur uske sirhane bakri ke baalon se bani ek jaali rakh di aur moorat par ek kapda odha diya.
14 shaaool ne daavid ko pakadkar laane ke liye apne doot bheje, magar meekal ne unse kaha ki woh beemar hai.
15 tab shaaool ne apne dooton ko yah kehkar daavid ke paas bheja, “tum use palang ke saath hi utha laao taaki use maar daala jaaye.”+
16 magar jab woh doot daavid ke kamre mein gaye to unhonne dekha ki palang par moorat litayi gayi hai aur uske sirhane bakri ke baalon se bani ek jaali rakhi hai.
17 shaaool ne meekal se kaha, “toone mujhe kyon dhokha diya? kyon mere dushman+ ko bachkar jaane diya?” meekal ne shaaool se kaha, “usne mujhe dhamki di thi ki agar tu meri madad nahin karegi to main tujhe jaan se maar daaloonga!”
18 daavid apne ghar se bhaagkar shamooel ke paas raamah+ chala gaya tha. usne shamooel ko bataya ki shaaool ne uske saath kya-kya kiya. fir daavid aur shamooel naayot gaye aur vahaan rehne lage.+
19 kuch vakt baad shaaool ko khabar di gayi ki daavid raamah ke naayot mein hai.
20 yah sunte hi shaaool ne daavid ko pakad laane ke liye apne doot bheje. jab doot vahaan gaye to unhonne dekha ki bhavishyavaktaon mein se buzurg jan bhavishyavani kar rahe hain aur shamooel vahaan khada unki aguvai kar raha hai. fir parmeshvar ki pavitra shakti shaaool ke dooton par utri aur woh bhi bhavishyavaktaon jaisa bartav karne lage.
21 jab shaaool ko yah sab bataya gaya to usne fauran kuch aur doot bheje, magar woh bhi vahaan jaakaar bhavishyavaktaon jaisa bartav karne lage. fir shaaool ne kuch aur doot bheje, magar yah teesri toli bhi bhavishyavaktaon jaisa bartav karne lagi.
22 aakhir mein woh khud raamah gaya. jab woh sekoo mein bade kund ke paas pahuncha to usne logon se poochha, “shamooel aur daavid kaha hain?” unhonne kaha, “woh raamah ke naayot mein hain.”+
23 jab shaaool vahaan se raamah ke naayot jaane laga to raaste mein parmeshvar ki pavitra shakti us par utri aur woh bhi bhavishyavaktaon jaisa bartav karne laga aur naayot tak woh aisa hi karta raha.
24 usne bhi apne kapde utar diye aur shamooel ke saamne bhavishyavaktaon jaisa bartav karne laga. woh saara din aur saari raat bin kapdon ke* vahin pada raha. isi ghatna se yah baat chali, “kya shaaool bhi bhavishyavakta ban gaya?”+
