pehala shamooel 20:1-42
-
yonatan daavid ka vafadar (1-42)
20 fir daavid raamah ke naayot se bhaag gaya. magar woh yonatan ke paas gaya aur usse kehne laga, “mainne kya kiya hai?+ mera kasoor kya hai? mainne tere pita ka kya bigaada hai jo woh meri jaan ke peechhe pada hai?”
2 yonatan ne kaha, “dekh, aisa hargiz nahin ho sakta!+ tu nahin marega. mera pita mujhe bataye bagair koi kaam nahin karta, fir chahe chhota kaam ho ya bada. agar usne tujhe maar daalne ki sochi hoti to mujhe zaroor batata. yah nahin ho sakta.”
3 magar fir daavid ne shapath khaayi aur kaha, “tera pita achhi tarah jaanta hai ki tu mujh par meharban hai+ aur usne kaha hoga, ‘is baare mein yonatan ko kuch mat batana varna woh gussa ho jaayega.’ main yahova ke jeevan ki shapath aur tere jeevan ki shapath khaakaar kehta hoon, meri maut bahot kareeb hai.”+
4 yonatan ne daavid se kaha, “tu mujhse jo bhi kahega, main tere liye karoonga.”
5 daavid ne yonatan se kaha, “kal naye chaand ka din hai.+ mujhe raja ke saath bhoj mein baithna hai. lekin agar tu ijazat de to main jaakaar maidan mein chhip jaaunga aur teesre din ki shaam tak vahin chhipa rahoonga.
6 agar tera pita poochhe ki main bhoj mein kyon nahin aaya to kehna, daavid ne mujhse kaha ki woh jald-se-jald apne shehar betlehem+ jaana chahta hai, kyonki vahaan uske poore parivar ke liye saalana balidan chadhaya jaayega. usne mujhse bahot minnat ki isliye mainne use jaane ki ijazat de di.+
7 tab agar tera pita kahe, ‘theek hai, koi baat nahin,’ to iska matlab hai ki tere sevak ko koi khatra nahin. lekin agar tera pita gussa ho jaata hai to samajh lena ki usne mera bura karne ki thaan li hai.
8 tu apne is sevak ke saath vafadari* nibhana+ kyonki toone yahova ke saamne apne sevak ke saath karar kiya hai.+ lekin agar main doshi hoon+ to tu khud mujhe maar daal. tu kyon mujhe apne pita ke havale karna chahta hai?”
9 tab yonatan ne kaha, “tu yah soch bhi kaise sakta hai ki main tere saath aisa karoonga? agar mujhe pata chale ki mere pita ne tera bura karne ki thaan li hai, to main tujhe zaroor bataunga.”+
10 daavid ne kaha, “agar tera pita bhadak uthta hai to mujhe kaun batayega?”
11 yonatan ne kaha, “chalo hum donon maidan mein chalte hain.” fir woh donon maidan mein gaye.
12 yonatan ne daavid se kaha, “main israel ke parmeshvar yahova ko gavah maankar tujhse vaada karta hoon ki main kal ya parson is samay tak pata lagaunga ki mere pita ke dil mein kya hai. agar woh tujhse naaraz nahin hai to main tujhe zaroor iski khabar doonga.
13 aur agar mere pita ne tera bura karne ka irada kiya hai to bhi main tujhe bataunga. agar mainne tujhe nahin bataya aur khatre se nahin bachaya to yahova mujh yonatan ko kadi-se-kadi saza de. meri dua hai ki yahova tere saath rahe,+ jaise woh mere pita ke saath tha.+
14 tu bhi yahova ki tarah mere saath vafadari* nibha, mere jeete-ji aur meri maut ke baad bhi.+
15 tu mere gharane ke saath vafadari nibhana,+ tab bhi jab yahova tere sabhi dushmanon ko dharti se mita dega.”
16 yonatan ne daavid ke gharane ke saath ek karar kiya aur kaha, “yahova daavid ke dushmanon se zaroor lekha lega.”
17 tab yonatan ne apne pyar ka vaasta dekar ek baar fir daavid se shapath khilvayi kyonki woh daavid se jaan ke barbar pyar karta tha.+
18 fir yonatan ne daavid se kaha, “kal naye chaand ke din+ jab teri jagah khaali rahegi to sab tujhe dhoondheinge.
19 teesre din woh tere baare mein zaroor poochheinge. tu isi jagah aana jahaan tu us din* chhipa tha aur is patthar ke paas rehna.
20 main patthar ke ek taraf teen baar teer aise chalaunga maano main kisi nishane par maarne ki koshish kar raha hoon.
21 main apne sevak ko teer dhoondhkar laane ke liye kahoonga. agar main sevak se kahoon, ‘dekh, teer tere is taraf hain jaakaar le aa,’ to tu laut aana kyonki yahova ke jeevan ki shapath, iska matlab yah hoga ki teri jaan ko koi khatra nahin hai. tu salamat rahega.
22 lekin agar main sevak se kahoon, ‘dekh, teer bahot door jaa gire hain’ to tu chala jaana kyonki yahova tujhe bhej raha hoga.
23 aur yahova sada ke liye is baat ka gavah ho+ ki hum donon ne aapas mein dosti ka karar kiya hai.”+
24 isliye daavid jaakaar maidan mein chhip gaya. fir naye chaand ke din shaaool bhoj mein apne khaane ki jagah par baitha.+
25 woh deevar ke paas us jagah baitha jahaan woh hamesha baitha karta tha. yonatan uske saamne tha aur abner+ uski bagal mein baitha tha, magar daavid ki jagah khaali thi.
26 us din shaaool ne daavid ke baare mein kuch nahin poochha kyonki usne socha ki zaroor woh kisi vajah se ashuddh+ ho gaya hoga iseeliye nahin aaya.
27 lekin naye chaand ke doosre din bhi jab daavid ki jagah khaali rahi to shaaool ne apne bete yonatan se poochha, “kya baat hai, yishai ka beta+ bhoj mein nahin aaya? kal bhi nahin aaya tha aur aaj bhi nahin aaya?”
28 yonatan ne kaha, “daavid ne mujhse betlehem jaane ki ijazat maangi thi. usne mujhse bahot minnat ki+
29 aur kaha, ‘meharbani karke mujhe jaane ki ijazat de, kyonki mere shehar mein mera parivar balidan chadha raha hai aur mere apne bhaai ne mujhe bulaya hai. agar teri ijazat ho to main chupke se jaakaar apne bhaaiyon se mil aaunga.’ yahi vajah hai ki woh raja ki mez par nahin aaya.”
30 yah sunte hi shaaool yonatan par aag-baboola ho gaya aur usse kaha, “baagi kahin ka!* tujhe kya lagta hai, mujhe nahin pata ki tu yishai ke us bete ka saath de raha hai? tu aisa karke khud ki aur apni maa ki beizzati kar raha hai.
31 jab tak yishai ka woh beta zinda rahega tu raja nahin ban paayega aur tera raaj kaayam nahin rahega.+ isliye jaldi se bhej kisi ko aur use vaapas le aa. use marna hi hoga.”*+
32 magar yonatan ne apne pita shaaool se kaha, “tu kyon uski jaan ke peechhe pada hai?+ usne aisa kya kiya hai?”
33 tab shaaool ne yonatan par zor se bhaala feinka.+ yonatan samajh gaya ki uske pita ne daavid ko maar daalne ki thaan li hai.+
34 yonatan ko bahot gussa aaya aur woh fauran mez se uth gaya. usne naye chaand ke us doosre din kuch nahin khaaya kyonki use yah dekhkar bahot dukh hua ki uske pita ne daavid ki kitni beizzati ki.+
35 agli subah yonatan daavid se milne maidan mein gaya, theek jaise usne vaada kiya tha aur uska javan sevak bhi uske saath tha.+
36 yonatan ne apne sevak se kaha, “main teer maarta hoon aur tu daudkar jaa aur unhein dhoondh laa.” sevak bhaagkar gaya aur yonatan ne aisa teer maara ki woh usse bahot aage nikaal gaya.
37 jab sevak yonatan ke chhode huye teer ke paas pahuncha, to yonatan ne chillakar kaha, “teer bahot door jaa gira hai,
38 jaldi bhaag! der mat kar!” sevak ne jaakaar teer uthaye aur vaapas apne maalik ke paas aaya.
39 yonatan aur daavid yah ishara samajh gaye magar sevak ko iska koi andaza nahin tha.
40 fir yonatan ne apne hathiyar sevak ko diye aur usse kaha, “tu inhein lekar shehar chala jaa.”
41 jab sevak chala gaya to daavid paas ki us jagah se utha jo dakshin ki taraf thi. woh munh ke bal girkar teen baar jhuka. fir unhonne ek-doosre ko chooma aur woh ek-doosre ke liye rone lage. daavid zyada roya.
42 yonatan ne daavid se kaha, “tu itmeenan se jaa kyonki hum donon ne yahova ke naam se shapath khaakaar yah karar kiya hai,+ ‘yahova mere aur tere beech aur mere vanshajon aur tere vanshajon ke beech sada tak gavah bana rahe.’”+
fir daavid vahaan se chala gaya aur yonatan shehar laut gaya.
kai footnote
^ ya “atal pyar.”
^ ya “atal pyar.”
^ shaa., “kaam ke din.”
^ ya “baagi aurat ki aulad.” ye shabd yonatan ko beizzat karne ke liye kahe gaye the.
^ shaa., “woh maut ka beta hai.”
