pehala shamooel 24:1-22
24 jaise hi shaaool palishtiyon ka peechha karke lauta, use logon ne bataya ki daavid engadi veerane mein hai.+
2 isliye shaaool ne poore israel mein se chune huye 3,000 aadmiyon ko liya aur daavid aur uske aadmiyon ko dhoondhne nikaal pada. woh un sabko lekar un pathreeli chattanon ki taraf jaane laga jahaan pahadi bakriyaan ghooma karti hain.
3 raaste mein unhein pattharon se bani bhedshalayen milin aur vahin ek gufa thi. shaaool gufa ke andar halka hone* gaya. usi gufa ke bilkul kone mein daavid aur uske aadmi chhipe baithe the.+
4 tab daavid ke aadmiyon ne usse kaha, “aaj yahova tujhse keh raha hai, ‘dekh! mainne tere dushman ko tere haath mein kar diya hai.+ tujhe jo sahi lage woh kar.’” tab daavid utha aur chupke se shaaool ke paas gaya aur uske bin aasteen ke baage ka chhor kaat liya.
5 magar fir daavid ka man* use kachotne laga+ kyonki usne shaaool ke baage ka chhor kaat liya tha.
6 usne apne aadmiyon se kaha, “main apne maalik par haath uthane ki soch bhi nahin sakta, woh yahova ka abhishikt jan hai. yahova ki nazar mein yah bilkul galat hoga ki main yahova ke abhishikt jan par haath uthaun.”+
7 yah kehkar daavid ne apne aadmiyon ko rok diya* aur unhein shaaool par hamla karne nahin diya. fir shaaool uthkar gufa se nikaal gaya aur apne raaste chala gaya.
8 fir daavid uthkar gufa se baahar aaya aur usne zor se shaaool ko aavaz di, “hey mere maalik, hey raja!”+ shaaool ne peechhe mudkar dekha aur daavid ne munh ke bal zameen par girkar pranam kiya.
9 usne shaaool se kaha, “tu kyon aise aadmiyon ki baatein sunta hai jo kehte hain ki daavid tera bura karna chahta hai?+
10 aaj toone khud apni aankhon se dekha ki jab tu gufa mein tha to yahova ne tujhe mere haath mein kar diya tha. aur kisi ne mujhse kaha bhi tha ki main tujhe maar daaloon+ magar mainne tujh par taras khaaya. mainne kaha, ‘main apne maalik par haath nahin uthaunga kyonki woh yahova ka abhishikt jan hai.’+
11 mere pita, yah dekh, tere baage ke chhor ka ek tukda mere haath mein hai. jab mainne yah chhor kaata tab main tujhe jaan se maar bhi sakta tha. magar mainne aisa nahin kiya. isse tu samajh sakta hai ki tera bura karne ya tujhse bagavat karne ka mera koi irada nahin. mainne tere khilaf koi paap nahin kiya,+ fir bhi tu meri jaan lene par tula hua hai.+
12 ab yahova hi hum donon ka nyay kare+ aur yahova hi tujhse mera badla le,+ magar main apna haath tujh par nahin uthaunga.+
13 ek purani kahavat hai, ‘dusht hi dushtata ke kaam karta hai.’ isliye main tujh par haath nahin uthaunga.
14 hey israel ke raja, tu kiska peechha kar raha hai? kise pakadne ki koshish kar raha hai? mujh mare huye kutte ko? ek pissoo ko?+
15 yahova nyayi bankar hum donon ka faisla kare. vahi is mukadme ki jaanch karega, meri taraf se pairvi karega+ aur mera nyay karega aur mujhe tere haath se bachayega.”
16 jab daavid ye saari baatein keh chuka to shaaool ne poochha, “mere bete daavid, kya yah teri aavaz hai?”+ fir shaaool fut-futkar rone laga.
17 usne daavid se kaha, “tu mujhse zyada nek hai. toone hamesha mere saath bhalai ki hai aur badle mein mainne tera bura hi kiya hai.+
18 aur jaise toone mujhe bataya, aaj jab yahova ne mujhe tere haath mein kar diya tab meri jaan bakhshkar toone mera bhala kiya.+
19 kaun aisa hoga jo mauka milne par apne dushman ko yoon hi chhod de? aaj toone meri jaan na lekar jo bhalai ki hai, uske liye yahova tujhe inam dega.+
20 main jaanta hoon ki tu zaroor raja banega+ aur israel par tera raaj sada kaayam rahega.
21 ab tu yahova ki shapath khaakaar keh+ ki tu meri maut ke baad mere vanshajon ka naash nahin karega aur mere pita ke gharane se mera naam nahin mitayega.”+
22 tab daavid ne shapath khaakaar shaaool se aisa hi kaha, jiske baad shaaool apne ghar laut gaya.+ magar daavid aur uske aadmi oopar mehfooz jagah chale gaye.+
