pehala shamooel 29:1-11
-
palishtiyon ne daavid par bharosa nahin kiya (1-11)
29 palishtiyon+ ki saari senayen apek mein ikattha huin aur israeliyon ne apni chhaavni yijrel+ ke sote ke paas daali thi.
2 palishtiyon ke sardar apni sau-sau aur hazar-hazar ki tukdiyaan lekar kadam badhane lage. daavid aur uske aadmi aakeesh ke saath sena mein sabse peechhe chal rahe the.+
3 magar palishtiyon ke haakimon ne poochha, “ye ibri log yahaan kya kar rahe hain?” aakeesh ne haakimon se kaha, “yah daavid hai, israel ke raja shaaool ka sevak. yah ek saal se mere saath rehta hai balki usse bhi zyada samay se.+ jab se yah apne raja ke paas se bhaagkar mere paas aaya hai, tab se lekar aaj tak mainne ismein koi burai nahin paayi.”
4 magar palishtiyon ke haakim aakeesh par gussa ho gaye aur usse kehne lage, “us aadmi ko vaapas bhej de.+ usse keh ki woh usi jagah laut jaaye jo toone use di hai. ise hamare saath yuddh mein mat aane de. aisa na ho ki yuddh ke vakt woh ulta hum par hi hamla karne lage. kya pata, woh hamare aadmiyon ka sir kaatkar apne raja ke paas le jaaye?+ apne raja ko khush karne ka isse badhiya mauka use kahaan milega?
5 yah vahi daavid hai jiske baare mein logon ne naachte-gaate huye kaha tha,
‘shaaool ne maara hazaron ko,daavid ne maara laakhon ko.’”+
6 isliye aakeesh+ ne daavid ko bulaya aur usse kaha, “yahova ke jeevan ki shapath, tu ek seedha-sachcha insan hai. main to bahot khush hoon ki tu meri sena ke saath yuddh karne chala hai,+ kyonki jab se tu mere paas aaya hai tab se lekar aaj tak mainne tujhmein koi burai nahin paayi.+ magar baaki sardaron ko tujh par bharosa nahin hai.+
7 isliye tu shaanti se laut jaa aur aisa koi kaam na kar jisse palishti sardaron ka gussa tujh par bhadak uthe.”
8 lekin daavid ne aakeesh se kaha, “magar kyon? mainne aisa kya kiya hai? jab se tera daas tere paas aaya hai tab se lekar aaj tak kya toone mujhmein koi burai paayi hai? to fir hey raja, mere maalik, main tere dushmanon se ladne tere saath kyon nahin aa sakta?”
9 aakeesh ne daavid se kaha, “mujhe to poora yakeen hai ki tu ek bhala aadmi hai, bilkul parmeshvar ke swargdoot ki tarah.+ lekin palishtiyon ke haakimon ne tere baare mein kaha hai, ‘ise hamare saath yuddh mein mat aane de.’
10 isliye tu kal subah tadke uth aur apne maalik ke daason ke saath, jo tere saath aaye hain, ujala hote hi laut jaa.”
11 isliye daavid aur uske aadmi agle din subah tadke uthe taaki palishtiyon ke desh laut jaayen. aur palishti senayen oopar yijrel+ gayin.