pehala shamooel 6:1-21
-
palishtiyon ne sandook lautaya (1-21)
6 yahova ka sandook+ saat maheene tak palishtiyon ke ilake mein hi raha.
2 palishtiyon ne pujariyon aur jyotishiyon+ ko bulakar poochha, “hum yahova ke sandook ka kya karein? hamein batao ki hum use vaapas uski jagah kaise bhejein.”
3 unhonne kaha, “agar tum israel ke parmeshvar yahova ke karar ka sandook vaapas bhejna chahte ho, to uske saath chadhava zaroor bhejna. tum us parmeshvar ko sandook lautate vakt ek dosh-bali zaroor bhejna.+ tab jaakaar tumhari beemari theek hogi aur tumhein pata chalega ki usne kyon tum par kehar dhaana band nahin kiya.”
4 fir palishtiyon ne poochha, “hum dosh-bali mein use kya bhejein?” unhonne kaha, “palishtiyon ke sardaron ki ginti+ ke hisab se tum bavaseer ke aakaar mein sone ki paanch pratimayen aur sone ke paanch choohe bhejna, kyonki tumhare sardar aur tum sab ek hi tarah ke kehar se peedit ho.
5 tum bavaseer aur un choohon ki pratimayen banana+ jo tumhare desh ko ujaad rahe hain. is tarah tum israel ke parmeshvar ka aadar karna. ho sakta hai isse woh tum par aur tumhare devta aur tumhare desh par kehar dhaana band kar de.+
6 tum firaun aur misra ke logon ki tarah apna dil kathor mat karna.+ jab parmeshvar ne unhein kadi saza di thi,+ to unhein israeliyon ko chhodna pada aur woh misra chhodkar chale gaye.+
7 tum ek nayi gaadi taiyar karna aur aisi do gaayein lena jinke bachhde hon aur jo kabhi juye mein na joti gayi hon. un gaayon ko gaadi mein jotna, magar unke bachhdon ko unse alag karke ghar par hi rakhna.
8 yahova ka sandook lekar gaadi par rakhna aur uske saath ek bakse mein sone ki pratimayen rakhna, jo tum dosh-bali ke liye doge.+ fir us gaadi ko ravana kar dena.
9 aur tum dekhna ki gaadi kidhar jaati hai. agar woh bet-shemesh+ jaanevali sadak par jaaye jahaan se sandook laaya gaya hai, to jaan lena ki hum par yah badi museebat israel ka parmeshvar hi laaya hai. lekin agar gaadi udhaar nahin jaati, to hum jaan jaayenge ki yah kehar uski vajah se nahin hai balki yah ek ittafak hai.”
10 tab un aadmiyon ne vaisa hi kiya. unhonne do aisi gaayein lin jinke bachhde the aur unhein gaadi mein jot diya aur bachhdon ko ghar mein band kar diya.
11 fir unhonne gaadi par yahova ka sandook aur woh baksa rakha jismein unhonne bavaseer aur choohe ki sone ki pratimayen rakhi thi.
12 tab gaayein seedhe bet-shemesh jaanevali sadak par chal di.+ woh rambhati hui seedhe badi sadak par hi chalti rahin, woh na to daayen mudin na baayen. aur palishtiyon ke sardar poore raaste gaadi ke peechhe-peechhe chalte rahe aur woh door bet-shemesh ki sarhad tak aaye.
13 bet-shemesh ke log us samay ghaati ke maidan mein gehoon ki katai kar rahe the. jab unhonne aankhein uthakar dekha ki gaadi par parmeshvar ka sandook aa raha hai, to unki khushi ka thikana na raha.
14 woh gaadi bet-shemesh ke rehnevale yahoshoo ke khet mein aayi aur ek bade patthar ke paas ruk gayi. tab logon ne gaadi ki lakdiyaan nikaalkar cheerin aur unmein aag lagakar gaayon+ ki hom-bali yahova ko chadhayi.
15 tab leviyon+ ne gaadi se yahova ka sandook aur woh baksa utara jismein sone ki pratimayen thi aur unhein us bade patthar par rakh diya. us din bet-shemesh ke logon+ ne yahova ke liye hom-baliyaan aur doosre balidan bhi chadhaye.
16 palishtiyon ke paanchon sardaron ne yah sab dekha aur woh usi din ekron laut gaye.
17 palishtiyon ne bavaseer ki sone ki jo pratimayen yahova ko dosh-bali chadhane ke liye bheji thi,+ unmein se ek ashdod+ ki taraf se, ek gaaza, ek ashkalon, ek gat+ aur ek ekron+ ki taraf se thi.
18 unhonne sone ke jo paanch choohe bheje the, woh paanch sardaron ke sabhi kileband shehron aur unke aas-paas ki khuli bastiyon ke hisab se the.
woh bada patthar jis par yahova ka sandook rakha gaya tha, aaj tak bet-shemesh ke yahoshoo ke khet mein hai aur is ghatna ka gavah hai.
19 magar parmeshvar ne bet-shemesh ke aadmiyon ko maar daala kyonki unhonne yahova ka sandook dekh liya tha. usne 50,070 aadmiyon* ko maar daala. vahaan ke log maatam manane lage kyonki yahova ne itni badi taadad mein logon ka ghaat kar diya.+
20 tab bet-shemesh ke aadmi kehne lage, “yahova jaise pavitra parmeshvar ke saamne kaun khada reh sakta hai?+ achha hoga agar woh hamare yahaan se kahin aur chala jaaye.”+
21 tab unhonne kiryat-yaareem+ ke logon ke paas apne doot bheje aur unse kaha, “palishtiyon ne yahova ka sandook vaapas kar diya hai. tum log aakaar use le jaao.”+
kai footnote
^ shaa., “70 aadmiyon, 50,000 aadmiyon.”
