doosra itihas 28:1-27
28 aahaj+ jab raja bana tab woh 20 saal ka tha aur usne yarooshalem mein rehkar 16 saal raaj kiya. usne aise kaam nahin kiye jo yahova ki nazar mein sahi the, jaise uske purkhe daavid ne kiye the.+
2 iske bajay usne israel ke raajaon ke taur-tareeke apna liye,+ yahaan tak ki baal devtaon ki dhaatu ki moortein* banvayin.+
3 aur usne ‘hinnom ke vanshajon ki ghaati’* mein balidan chadhaye taaki unka dhuaan uthe aur aag mein apne beton ko hom kar diya.+ is tarah usne un raashtron ke jaise ghinaune kaam kiye,+ jinhein yahova ne israeliyon ke saamne se khaded diya tha.
4 itna hi nahin, woh unchi jagahon+ aur pahadiyon par aur har ghane ped ke neeche balidan chadhata tha+ taaki unka dhuaan uthe.
5 isliye uske parmeshvar yahova ne use seeriya ke raja ke haath mein kar diya.+ unhonne use hara diya aur bahot-se logon ko bandi banakar damishk+ le gaye. aahaj ko israel ke raja ke haath mein bhi kar diya gaya, jisne uske yahaan aakaar bahot maar-kaat machayi.
6 ramalyah ke bete pekah+ ne ek hi din mein yahooda ke 1,20,000 diler aadmiyon ko maar daala, kyonki unhonne apne purkhon ke parmeshvar yahova ko chhod diya tha.+
7 ek epraimi yoddha jikri ne raja ke bete maanseyah ko aur ajreekam ko maar daala, jise raajmahal* ka zimma saunpa gaya tha. usne elkana ko bhi maar daala jo raja ke baadvale ohde par tha.
8 aur israeliyon ne yahooda se apne 2,00,000 bhaaiyon ko bandi bana liya, jinmein aurtein, ladke aur ladkiyaan bhi thi. unhonne khoob saara maal loota aur saamriya+ le gaye.
9 magar vahaan yahova ka ek bhavishyavakta tha jiska naam oded tha. woh saamriya aanevali sena ke saamne gaya aur sainikon se kaha, “dekho! tumhare purkhon ke parmeshvar yahova ka krodh yahooda par bhadka hua tha, isliye usne yahooda ke logon ko tumhare haath mein kar diya.+ aur tumne aisi jaljalahat se yahooda mein maar-kaat machayi hai ki unki cheekh-pukar swarg tak pahunch gayi hai.
10 aur ab tum yahooda aur yarooshalem ke logon ko apne daas-daasi banana chahte ho.+ magar kya tum bhi apne parmeshvar yahova ke saamne doshi nahin ho?
11 isliye meri suno aur in bandiyon ko lauta do jinhein tum apne bhaaiyon ke yahaan se le aaye ho, kyonki yahova ke krodh ki aag tum par bhadak uthi hai.”
12 tab epraimiyon ke kuch mukhiyaon ne yaani yahohanan ke bete ajaryah, mashillemot ke bete berekyah, shalloom ke bete yahijkiyah aur hadlai ke bete amasa ne yuddh se lautnevalon ka saamna kiya
13 aur unse kaha, “tum bandiyon ko hamare yahaan mat laana, varna hum yahova ke saamne doshi thehreinge. tum jo karne ki soch rahe ho, usse hamara paap aur dosh aur badh jaayega, kyonki hum pehale hi bahot doshi hain aur israel par parmeshvar ka krodh bhadak utha hai.”
14 tab hathiyarband sainikon ne bandiyon aur loot ke maal+ ko haakimon aur poori mandli ke havale kar diya.
15 fir jin aadmiyon ko naam se chuna gaya tha, unhonne aakaar bandiyon ko liya. unhonne bandiyon mein se unhein loot ke maal se kapde diye jinke paas kapde nahin the. saath hi unhein pairon ke liye jootiyaan di, khaane-peene ki cheezen di aur shareer ke liye tel diya. aur unhonne kamzoron ko gadhon par chadhaya aur unke bhaaiyon ke paas yareeho le aaye, jo khajoor ke pedon ka shehar hai. iske baad, woh saamriya laut gaye.
16 unhin dinon raja aahaj ne ashshoor ke raajaon se madad maangi.+
17 ek baar fir edomiyon ne yahooda par hamla karke use hara diya aur bandiyon ko uthakar le gaye.
18 palishtiyon+ ne bhi yahooda ke shafelah+ aur negeb ke ilake par dhaava bol diya aur in shehron par kabza kar liya: bet-shemesh,+ ayyalon,+ gaderot, soko aur uske aas-paas ke nagar, timna+ aur uske aas-paas ke nagar aur gimjo aur uske aas-paas ke nagar. aur woh in shehron mein bas gaye.
19 yahova ne israel ke raja aahaj ki vajah se yahooda ko neecha dikhaya, kyonki aahaj ne yahooda ko paap karne ki poori chhoot de di jis vajah se logon ne yahova se vishvasghat karne mein had kar di thi.
20 aakhirkar ashshoor ke raja tilgat-pilneser+ ne aahaj par hamla kar diya aur woh use mazboot karne ke bajay us par museebat le aaya.+
21 aahaj ne yahova ka bhavan, raajmahal aur haakimon ke bhavnon ko poori tarah khaali karke+ ashshoor ke raja ko tohfa diya tha, magar isse koi faayda nahin hua.
22 aur museebat ke vakt raja aahaj ne yahova se aur bhi vishvasghat kiya.
23 jis damishk ne use hara diya tha, woh usi ke devtaon ke aage balidan chadhane laga+ kyonki usne kaha, “seeriya ke raajaon ke devta unki madad kar rahe hain, isliye main bhi un devtaon ke aage balidan chadhaunga taaki woh meri madad karein.”+ magar unhonne use aur poore israel ko barbad kar diya.
24 yahi nahin, aahaj ne sachche parmeshvar ke bhavan ki cheezen ikatthi kin aur unke tukde-tukde kar daale,+ yahova ke bhavan ke darvaze band kar diye+ aur yarooshalem ke har kone mein apne liye vediyaan khadi kar di.
25 usne yahooda ke sabhi shehron mein unchi jagah banayin taaki vahaan doosre devtaon ke liye balidan chadhaya jaaye jisse dhuaan uthe.+ usne apne purkhon ke parmeshvar yahova ka krodh bhadkaya.
26 uski zindagi ki baaki kahani, uske sabhi kaamon ke baare mein shuroo se lekar aakhir tak ka byaura yahooda aur israel ke raajaon ki kitab mein likha hai.+
27 fir aahaj ki maut ho gayi* aur use yarooshalem mein dafnaya gaya. use israel ke raajaon ki kabraa mein nahin dafnaya gaya.+ uski jagah uska beta hijkiyah raja bana.
