doosra itihas 29:1-36
29 hijkiyah+ jab raja bana tab woh 25 saal ka tha aur usne yarooshalem mein rehkar 29 saal raaj kiya. uski maa ka naam abiyah tha jo jakaryah ki beti thi.+
2 hijkiyah yahova ki nazar mein sahi kaam karta raha,+ theek jaise uske purkhe daavid ne kiya tha.+
3 apne raaj ke pehale saal ke pehale maheene, usne yahova ke bhavan ke darvaze khole aur unki marammat ki.+
4 fir usne yaajkon aur leviyon ko bhavan ke poorab ke chauk mein ikattha kiya.
5 usne unse kaha, “leviyo, meri baat suno. ab tum sab khud ko pavitra karo+ aur apne purkhon ke parmeshvar yahova ke bhavan ko pavitra karo. aur pavitra jagah se ashuddh cheezen nikaalkar feink do.+
6 kyonki hamare pitaon ne parmeshvar se vishvasghat kiya aur hamare parmeshvar yahova ki nazron mein bura kaam kiya.+ unhonne use chhod diya, yahova ke pavitra dere se munh fer liya aur use peeth dikhayi.+
7 unhonne bhavan ke baramde ke darvaze bhi band kar diye+ aur deeye bujha diye.+ unhonne pavitra jagah mein israel ke parmeshvar ke liye dhoop jalana+ aur hom-baliyaan chadhana band kar diya.+
8 isliye yahooda aur yarooshalem par yahova ka krodh bhadak utha+ aur jaisa ki tum dekh sakte ho, usne yahooda aur yarooshalem ka aisa hashra kiya ki unki barbadi dekhkar logon ka dil dehal gaya, woh dang reh gaye aur unhonne unka mazak banaya.*+
9 hamare baap-daada talvar se maare gaye,+ hamare bete-betiyonn aur hamari patniyon ko bandi bana liya gaya.+
10 ab yah meri dili tamanna hai ki main israel ke parmeshvar yahova ke saath ek karar karoon+ taaki uske krodh ki aag hamse door ho jaaye.
11 mere beto, ab yah vakt laaparvahi baratne* ka nahin hai kyonki yahova ne tumhein isliye chuna hai ki tum uske saamne khade hokar uski seva karo+ aur uske liye balidan chadhao taaki unka dhuaan uthe.”+
12 tab ye sabhi levi kaam par lag gaye: kahatiyon+ mein se amasai ka beta mahat aur ajaryah ka beta yoel, marariyon+ mein se abdi ka beta keesh aur yahalle-lel ka beta ajaryah, gershoniyon+ mein se jimma ka beta yoah aur yoah ka beta adan,
13 eleesapan ke beton mein se shimri aur yooel, aasap ke beton+ mein se jakaryah aur mattanyah,
14 heman ke beton+ mein se yahiel aur shimi aur yadootoon ke beton+ mein se shamayah aur ujjiel.
15 in leviyon ne apne bhaaiyon ko ikattha kiya. fir sabne khud ko pavitra kiya aur woh yahova ke bhavan ko shuddh karne ke liye aage aaye, theek jaise raja ne yahova ke kehne par aagya di thi.+
16 fir yaajak yahova ke bhavan ko shuddh karne ke liye uske andar gaye aur unhein yahova ke mandir mein jitni bhi ashuddh cheezen milin, woh sab baahar yahova ke bhavan ke aangan+ mein le aaye. fir levi woh cheezen uthakar kidron ghaati+ le gaye.
17 is tarah unhonne pehale maheene ke pehale din yahova ke bhavan ko pavitra karne ka kaam shuroo kiya aur usi maheene ke aathvein din woh bhavan ke baramde+ tak pahunch gaye. unhonne aath din tak yahova ke bhavan ko pavitra kiya aur pehale maheene ke 16vein din yah kaam poora kar liya.
18 iske baad unhonne raja hijkiyah ke paas jaakaar kaha, “hamne yahova ke poore bhavan ko shuddh kar diya hai. hom-bali ki vedi+ aur uske saath istemal honevali saari cheezen,+ rotiyon ka dher* rakhnevali mez+ aur uske saath istemal honevali saari cheezen shuddh kar di hain.
19 aur un saari cheezon ko taiyar karke pavitra kiya hai+ jinhein raja aahaj ne apne raaj ke dauran parmeshvar se vishvasghat karke nikaal diya tha.+ woh cheezen ab yahova ki vedi ke saamne hain.”
20 raja hijkiyah subah jaldi utha aur usne shehar ke haakimon ko ikattha kiya aur woh yahova ke bhavan mein gaye.
21 woh saat bail, saat medhe, saat nar memne aur saat bakre le aaye taaki raaj, pavitra-sthan aur yahooda ki khaatir unki paap-bali chadha sakein.+ raja ne haaroonvanshi yaajkon se kaha ki woh yahova ki vedi par in jaanvaron ki bali chadhayen.
22 unhonne bail halal kiye+ aur yaajkon ne unka khoon le jaakaar vedi par chhidka.+ iske baad unhonne medhe halal kiye aur unka khoon vedi par chhidka, fir nar memne halal kiye aur unka khoon vedi par chhidka.
23 fir woh paap-bali ke bakron ko raja aur mandli ke saamne le aaye aur apna haath un jaanvaron par rakha.
24 yaajkon ne poore israel ke paapon ka prayashchit karne ke liye jaanvar halal kiye aur unka khoon vedi par chhidakkar paap-bali chadhayi kyonki raja ne kaha tha ki hom-bali aur paap-bali poore israel ki khaatir chadhayi jaaye.
25 is dauran raja ne leviyon ko aagya di ki woh jhaanjh, taaronvale baaje aur surmandal haath mein liye yahova ke bhavan mein khade rahein,+ theek us kram mein jo daavid, raja ke darshi gaad+ aur bhavishyavakta naatan+ ne thehraya tha.+ yahova ne apne bhavishyavaktaon ke zariye yah aagya di thi.
26 isliye levi daavid ke banaye saaz haath mein liye khade rahe aur yaajak turhiyaan liye khade rahe.+
27 fir hijkiyah ne aadesh diya ki vedi par hom-bali chadhayi jaaye.+ jab hom-bali chadhana shuroo hua, to yahova ke liye geet gaaya jaane laga aur israel ke raja daavid ke banaye saazon ki dhun par turhiyaan foonki jaane lagin.
28 jab geet gaaya jaa raha tha aur turhiyaan foonki jaa rahi thi to poori mandli ke logon ne apna sir jhukaye rakha. aisa tab tak hota raha jab tak ki hom-bali chadhane ka kaam poora na hua.
29 jaise hi unhonne bali chadhana poora kiya, raja aur uske saathvale sabhi logon ne munh ke bal zameen par girkar dandvat kiya.
30 fir raja hijkiyah aur haakimon ne leviyon se kaha ki woh daavid aur aasap darshi ke geet gaakaar yahova ki taareef karein.+ isliye unhonne aanand-magan hokar parmeshvar ki taareef ki aur munh ke bal zameen par girkar dandvat kiya.
31 fir hijkiyah ne kaha, “tum ab yahova ke liye alag kiye gaye ho,* isliye yahova ke bhavan mein balidan aur dhanyavad-baliyaan le aao.” tab poori mandli balidan aur dhanyavad-baliyaan lekar aayi aur har koi jo apni ichha se dena chahta tha woh hom-baliyaan le aaya.+
32 mandli hom-bali ke liye 70 bail, 100 medhe aur 200 nar memne le aayi. yah sab yahova ke liye hom-bali chadhane ke liye tha.+
33 aur pavitra bali ke liye 600 bail aur 3,000 bhedein laayi gayin.
34 magar hom-bali ke in sabhi jaanvaron ki khaal utarne ke liye kaafi yaajak nahin the, isliye unke levi bhaaiyon ne unki madad ki.+ woh tab tak unki madad karte rahe jab tak kaam poora nahin ho gaya aur yaajkon ne khud ko pavitra na kar liya.+ yaajkon se kahin zyada leviyon ne khud ko pavitra karne par dhyan diya tha.*
35 iske alava, hom-bali ke liye bahot-se jaanvar,+ shaanti-baliyon ke charbivale hisse+ aur hom-bali ke saath bahot-saa argh chadhaya gaya.+ is tarah yahova ke bhavan mein sevayen fir se shuroo ki gayin.*
36 sachche parmeshvar ne logon ki khaatir jo kiya tha, uski vajah se hijkiyah aur logon ne bahot khushiyaan manayin+ kyonki yah sab itni jaldi ho gaya tha.
kai footnote
^ shaa., “seeti bajayi.”
^ ya “aaram karne.”
^ yaani nazrane ki roti.
^ shaa., “ab tumne apna haath bhar liya hai.”
^ shaa., “levi khud ko pavitra karne mein man ke seedhe-sachche the.”
^ ya “sevaon ki taiyari ki gayi.”
