doosra raja 1:1-18
-
ahajyah ki maut ki bhavishyavani (1-18)
1 ahab ki maut ke baad moab desh+ ne israel se bagavat ki.
2 usi dauran ahajyah saamriya mein apne mahal ki chhat ke jangle se gir pada aur ghaayal ho gaya. isliye usne apne dooton ko yah kehkar bheja, “tum jaakaar ekron+ ke devta baal-jaboob se poochho ki main bistar se uthoonga ya nahin.”+
3 magar yahova ke ek swargdoot ne tishbe ke rehnevale eliyah*+ se kaha, “tu jaakaar saamriya ke raja ke dooton se mil aur unhein yah sandesh de: ‘kya israel mein koi parmeshvar nahin hai jo tu ekron ke devta baal-jaboob se poochhne ke liye doot bhej raha hai?+
4 isliye yahova ne kaha hai, “tu is bistar se nahin uthega, tu zaroor mar jaayega.”’” tab eliyah un dooton se milne nikaal pada.
5 jab raja ke doot uske paas laut aaye to usne fauran unse poochha, “tum log vaapas kyon aa gaye?”
6 unhonne kaha, “ek aadmi hamse milne aaya aur usne kaha, ‘jis raja ne tumhein bheja hai, uske paas laut jaao aur usse kaho, “tere liye yahova ka yah sandesh hai: ‘kya israel mein koi parmeshvar nahin hai jo tu ekron ke devta baal-jaboob se poochhne ke liye doot bhej raha hai? isliye tu is bistar se nahin uthega, tu zaroor mar jaayega.’”’”+
7 raja ne unse poochha, “jis aadmi ne aakaar tumse yah baat kahi, woh dikhne mein kaisa tha?”
8 unhonne kaha, “woh aadmi royendar kapda+ aur kamar par chamde ka patta pehne huye tha.”+ yah sunte hi raja ne kaha, “woh tishbe ka rehnevala eliyah hai.”
9 tab raja ne 50 sainikon ke ek adhikari ko uske 50 aadmiyon ke saath eliyah ke paas bheja. jab woh adhikari eliyah ke paas gaya to woh ek pahad ki choti par baitha hua tha. adhikari ne eliyah se kaha, “hey sachche parmeshvar ke sevak,+ raja ne kaha hai, ‘neeche utar aa.’”
10 magar eliyah ne usse kaha, “agar main parmeshvar ka sevak hoon, to aasman se aag barse+ aur tujhe aur tere 50 aadmiyon ko bhasm kar de.” tab aasman se aag barsi aur woh adhikari aur uske 50 aadmi bhasm ho gaye.
11 tab raja ne 50 sainikon ke ek aur adhikari ko uske 50 aadmiyon ke saath bheja. usne eliyah ke paas jaakaar kaha, “hey sachche parmeshvar ke sevak, raja ne kaha hai, ‘jaldi neeche aa.’”
12 magar eliyah ne kaha, “agar main sachche parmeshvar ka sevak hoon, to aasman se aag barse aur tujhe aur tere 50 aadmiyon ko bhasm kar de.” tab parmeshvar ne aasman se aag barsayi aur woh adhikari aur uske 50 aadmi bhasm ho gaye.
13 iske baad raja ne teesri baar 50 sainikon ke ek adhikari ko uske 50 aadmiyon ke saath bheja. yah teesra adhikari oopar chadhkar eliyah ke paas gaya aur uske saamne ghutnon ke bal jhuka aur reham ki bheekh maangne laga, “hey sachche parmeshvar ke sevak, meri aur tere in 50 sevkon ki jaan teri nazar mein anmol thahre.
14 jaise un do adhikariyon aur unke 50 aadmiyon par aasman se aag barsi aur unhein bhasm kar diya, vaise mere saath mat hone de. meri aur tere in 50 sevkon ki jaan teri nazar mein anmol thahre.”
15 tab yahova ke swargdoot ne eliyah se kaha, “tu iske saath neeche jaa. usse mat dar.” tab eliyah uthkar adhikari ke saath neeche utra aur raja ke paas gaya.
16 eliyah ne raja se kaha, “tere liye yahova ka yah sandesh hai: ‘kya israel mein koi parmeshvar nahin hai jo toone ekron+ ke devta baal-jaboob se poochhne ke liye doot bheje?+ toone israel ke parmeshvar se kyon nahin poochha? isliye tu jis bistar par pada hai usse kabhi nahin uthega. tu isi par mar jaayega.’”
17 eliyah ne yahova ka jo sandesh sunaya, bilkul vaisa hi hua. ahajyah ki maut ho gayi. uska koi beta nahin tha isliye uski jagah yahoram*+ raja bana. jab yahoram israel ka raja bana tab yahooda mein yahoshapat ke bete yahoram+ ke raaj ka doosra saal chal raha tha.
18 ahajyah+ ki zindagi ki baaki kahani, usne jo-jo kaam kiye un sabka byaura israel ke raajaon ke itihas ki kitab mein likha hai.
