doosra raja 3:1-27
3 jab ahab ka beta yahoram+ israel ka raja bana, tab yahooda mein raja yahoshapat ke raaj ka 18vaan saal chal raha tha. yahoram ne saamriya mein rehkar 12 saal raaj kiya.
2 woh yahova ki nazar mein bure kaam karta raha. magar woh us had tak nahin gaya jis had tak uske maata-pita ne bure kaam kiye the, kyonki usne baal ka woh pooja-stambh hata diya jo uske pita ne banvaya tha.+
3 lekin woh aise paap karne mein laga raha jo nabat ke bete yaarobam ne israel se karvaye the.+ woh unse baaz nahin aaya.
4 moab ka raja mesha badi taadad mein bhedein rakhta tha. woh israel ke raja ko nazrane mein 1,00,000 memne aur aise 1,00,000 medhe deta tha jinka oon na katra gaya ho.
5 jaise hi ahab ki maut ho gayi,+ moab ka raja israel ke raja se bagavat karne laga.+
6 isliye raja yahoram saamriya se nikala aur usne yuddh ke liye saare israel ko ikattha kiya.
7 saath hi usne yahooda ke raja yahoshapat ko yah sandesh bheja: “moab ke raja ne mujhse bagavat ki hai. kya tu usse yuddh karne mere saath chalega?” yahoshapat ne kaha, “main zaroor chaloonga.+ hum donon ek hain. mere log tere hi log hain. mere ghode tere ghode hain.”+
8 tab yahoshapat ne poochha, “hamein kis raaste se jaana chahiye?” yahoram ne kaha, “edom ke veerane ke raaste se.”
9 tab israel ka raja, yahooda aur edom+ ke raja ke saath nikaal pada. saat din tak ghumavdar raaste se safar karne ke baad, unke peechhe-peechhe chalnevale sainikon aur paaltoo jaanvaron ke liye paani nahin bacha.
10 israel ke raja ne kaha, “yah kaisi museebat hai! lagta hai yahova ne hum teenon raajaon ko iseeliye ikattha kiya ki hamein moab ke haath mein kar de!”
11 yahoshapat ne kaha, “kya yahaan yahova ka koi bhavishyavakta nahin hai jisse hum yahova ki marzee jaan sakein?”+ israel ke raja ke ek sevak ne kaha, “ek bhavishyavakta hai, shaapat ka beta eleesha+ jo eliyah ke haath dhulane ke liye paani daalta tha.”*+
12 yahoshapat ne kaha, “woh hamein yahova ki marzee bata sakta hai.” tab israel ka raja aur yahoshapat aur edom ka raja, eleesha ke paas gaye.
13 eleesha ne israel ke raja se kaha, “tera mujhse kya kaam?+ jaa, apne pita ke bhavishyavaktaon aur apni maa ke bhavishyavaktaon ke paas jaa.”+ magar israel ke raja ne kaha, “nahin, main nahin jaaunga kyonki hum teenon raajaon ko yahova ne ikattha kiya hai taaki woh hamein moab ke haath mein kar de.”
14 eleesha ne kaha, “senaon ke parmeshvar yahova ke jeevan ki shapath jiski main seva karta hoon,* agar main yahooda ke raja yahoshapat+ ka aadar nahin karta, to main teri taraf koi dhyan nahin deta,+ tujhe dekhta tak nahin.
15 ab jaao, jaakaar ek surmandal bajanevale* ko laao.”+ jab surmandal bajanevala aakaar saaz bajane laga, to yahova ki shakti* eleesha par aayi.+
16 eleesha ne kaha, “yahova kehta hai, ‘is ghaati mein jagah-jagah khaai khodo.
17 main yahova kehta hoon, “tumhein na aandhi chalti dikhayi degi aur na baarish hoti nazar aayegi, fir bhi yah ghaati paani se bhar jaayegi.+ tum aur tumhare sabhi jaanvar usse peeyenge.”’
18 aisa karna yahova ke liye koi badi baat nahin hai.+ woh to moab ko bhi tumhare haath mein kar dega.+
19 tum unke har kileband shehar+ ko aur har badhiya shehar ko naash kar dena. tum har achhe ped ko kaat daalna, unke sabhi sote band kar dena aur unka har upjaoo khet pattharon se bharkar barbad kar dena.”+
20 agle din subah anaj ke chadhave ke samay,+ edom desh ki disha se achanak paani behta hua aaya aur poori ghaati paani se bhar gayi.
21 jab sabhi moabiyon ne suna ki raja unse ladne aaye hain, to unhonne apne un sabhi aadmiyon ko ikattha kiya jo hathiyar chala sakte the.* woh desh ki seema par tainat huye.
22 jab woh subah jaldi uthe, to us vakt sooraj ki raushni se ghaati ka paani chamak raha tha. us paar jo moabee the, unhein yah paani khoon jaisa laal dikhayi diya.
23 unhonne kaha, “yah to khoon hai! zaroor un raajaon ne ek-doosre ko talvar se maar daala hoga. moabiyo, chalo unhein lootkar aate hain!”+
24 jab moabee israel ki chhaavni mein aaye, to israeli unhein ghaat karne lage. moabee unse bhaagne lage,+ magar israeliyon ne unka peechha kiya. israeli moab ki taraf badhne lage aur poore raaste unko ghaat karte gaye.
25 unhonne vahaan ke shehron ko dhaa diya aur unka har upjaoo khet pattharon se bhar diya. unhonne unke paani ke sabhi sote band kar diye+ aur unke sabhi achhe-achhe ped kaat daale.+ aakhir mein sirf keer-harasat+ shehar ki patthar ki deevarein bach gayin. fir gofan chalanevale sainikon ne use gher liya aur dhaa diya.
26 jab moab ke raja ne dekha ki woh yuddh haar gaya hai, to usne talvaron se lais 700 aadmi liye aur dushman sena ko cheerkar edom ke raja tak pahunchne ki koshish ki.+ magar woh naakam raha.
27 aakhirkar usne apne pehalauthe ko liya, jo uski raajgaddi ka vaaris tha aur sheharpanah par aag mein uski bali chadha di.+ tab israel par moabiyon ka krodh bhadak utha. isliye israel ne moab ke raja par hamla karna chhod diya aur apne desh laut gaya.
kai footnote
^ ya “jo eliyah ka sevak tha.”
^ shaa., “jiske saamne main khada rehta hoon.”
^ shaa., “haath.”
^ ya “sangeetkar.”
^ ya “jo kamarband baandhe huye the.”
