doosra raja 8:1-29
8 eleesha ne us aurat se, jiske bete ko usne zinda kiya tha,+ kaha, “tu apne gharane ke saath yah desh chhodkar jaa aur jahaan kahin tu reh sakti hai vahaan pardesi ki tarah reh, kyonki yahova ne kaha hai ki is desh mein saat saal tak akaal padega.”+
2 us aurat ne theek vaisa hi kiya jaisa sachche parmeshvar ke sevak ne usse kaha tha. woh apne gharane ko lekar nikaal padi aur palishtiyon ke desh+ chali gayi aur vahaan saat saal rahi.
3 saat saal ke beetne par woh aurat palishtiyon ke desh se apne desh laut aayi. woh raja se fariyad karne gayi ki uska ghar aur khet use lauta diya jaaye.
4 us vakt raja sachche parmeshvar ke sevak eleesha ke sevak gehji se baat kar raha tha. usne gehji se kaha tha, “zara mujhe un sabhi bade-bade kaamon ke baare mein bata jo eleesha ne kiye hain.”+
5 aur gehji jab raja ko suna raha tha ki eleesha ne kaise ek mare huye ladke ko zinda kiya,+ to usi vakt woh aurat vahaan pahunchi. woh raja se apne ghar aur khet ke liye fariyad karne lagi.+ use dekhte hi gehji ne kaha, “mere maalik raja, yahi woh aurat hai aur yahi uska ladka hai jise eleesha ne zinda kiya tha.”
6 raja ne us aurat se kaha ki woh us vaakye ke baare mein use bataye aur us aurat ne use poori kahani sunayi. fir raja ne apne ek darbaari ko yah zimmedari di, “tu is baat ka dhyan rakh ki is aurat ki poori jaaydad ise lauta di jaaye. isne jis din yah desh chhoda tha tab se lekar aaj tak iske khet se jitni paidavar hoti, uski keemat ise ada kar di jaaye.”
7 jab seeriya ka raja ben-hadad+ beemar tha to eleesha damishk+ gaya. ben-hadad ko khabar di gayi ki sachche parmeshvar ka sevak+ aaya hai.
8 raja ne hajael+ se kaha, “tu sachche parmeshvar ke sevak ke liye kuch tohfa lekar usse milne jaa.+ usse keh ki woh yahova se poochhkar bataye ki meri yah beemari door hogi ya nahin.”
9 hajael eleesha se milne nikala. usne eleesha ko tohfe mein dene ke liye damishk ki har tarah ki achhi cheezon se 40 unt ladvaye. yah sab lekar woh eleesha ke paas aaya aur uske saamne khade hokar kehne laga, “tere sevak seeriya ke raja ben-hadad ne mujhe tere paas bheja hai. woh jaanna chahta hai ki uski beemari theek hogi ya nahin.”
10 eleesha ne kaha, “jaakaar usse keh, ‘tu zaroor theek ho jaayega.’ magar yahova ne mujh par zahir kiya hai ki woh zaroor mar jaayega.”+
11 yah kehne ke baad eleesha hajael ko aise ghoorne laga ki woh jhijhak mehsoos karne laga. fir sachche parmeshvar ka sevak rone laga.
12 hajael ne poochha, “kya hua maalik? tu kyon ro raha hai?” eleesha ne kaha, “kyonki main jaanta hoon ki tu israel ke logon par kya-kya kehar dhaanevala hai.+ tu unke kileband shehron ko aag se foonk dega, unke veer yoddhaon ko talvar se maar daalega, unke bachchon ko patak-patakkar maar daalega aur unki garbhvati aurton ka pet cheer dega.”+
13 hajael ne kaha, “magar tere sevak ki aukat hi kya hai ki yah kaam kar sake? main to sirf ek kutta hoon.” magar eleesha ne kaha, “yahova ne mujh par zahir kiya hai ki tu seeriya ka raja banega.”+
14 tab hajael eleesha ke yahaan se chala gaya aur apne maalik raja ke paas laut aaya. raja ne usse poochha, “eleesha ne tujhse kya kaha?” hajael ne kaha, “usne kaha ki tu zaroor theek ho jaayega.”+
15 magar agle din hajael ne ek chaadar paani mein dubokar raja ke munh par rakhi aur use dabakar maar daala.+ iske baad hajael raja ban gaya.+
16 jab israel mein ahab ke bete yahoram+ ke raaj ka paanchvaan saal chal raha tha, tab yahooda mein yahoshapat raja tha aur usi dauran uska beta yahoram+ yahooda ka raja bana.
17 yahoshapat ka beta yahoram 32 saal ki umra mein raja bana aur usne yarooshalem mein rehkar aath saal raaj kiya.
18 yahoram ne israel ke raajaon ke taur-tareeke apna liye,+ theek jaise ahab ke gharane ne kiya tha+ kyonki uski shaadi ahab ki beti se hui thi.+ woh yahova ki nazar mein bure kaam karta raha.+
19 fir bhi yahova ne apne sevak daavid ki khaatir yahooda raaj ka naash nahin karna chaha.+ usne daavid se vaada kiya tha ki uska aur uske beton ka deeya hamesha jalta rahega.+
20 yahoram ke dinon mein edom ne yahooda se bagavat ki+ aur fir apna ek raja khada kiya.+
21 isliye yahoram apne sabhi rath lekar us paar saair gaya. usne raat ke vakt jaakaar edomiyon par hamla kiya, jo use aur rath-sena ke adhikariyon ko ghere huye the. usne edomiyon ko hara diya aur unki senayen apne tambuon mein bhaag gayin.
22 iske baad bhi edom ne yahooda se bagavat karna nahin chhoda aur aaj tak woh bagavat kar raha hai. unhin dinon libna+ ne bhi yahooda se bagavat ki.
23 yahoram ki zindagi ki baaki kahani, uske sabhi kaamon ka byaura yahooda ke raajaon ke itihas ki kitab mein likha hai.
24 fir yahoram ki maut ho gayi* aur use daavidpur mein uske purkhon ki kabraa mein dafnaya gaya.+ yahoram ki jagah uska beta ahajyah+ raja bana.
25 jab raja yahoram ka beta ahajyah yahooda ka raja bana, tab israel mein ahab ke bete yahoram ke raaj ka 12vaan saal chal raha tha.+
26 ahajyah 22 saal ki umra mein raja bana aur usne yarooshalem mein rehkar ek saal raaj kiya. uski maa ka naam atalyah+ tha jo israel ke raja omri+ ki poti* thi.
27 ahajyah ne ahab ke gharane ke taur-tareeke apna liye+ aur woh us gharane ki tarah yahova ki nazar mein bure kaam karta raha, kyonki woh ahab ke gharane ka rishtedar tha.+
28 isliye woh ahab ke bete yahoram ke saath seeriya ke raja hajael se yuddh karne raamot-gilad+ gaya, magar seeriya ke sainikon ne yahoram ko ghaayal kar diya.+
29 raja yahoram theek hone ke liye yijrel+ lauta kyonki raamah mein seeriya ke raja hajael ke sainikon ne use ghaayal kar diya tha.+ ahab ka beta yahoram zakhmi ho gaya tha,* isliye use dekhne ke liye yahooda ka raja ahajyah, jo yahoram ka beta tha, yijrel gaya.
