doosra shamooel 11:1-27
11 saal ki shurooat mein* jab raja yuddh ke liye jaaya karte hain, to aise vakt par daavid ne yoab aur apne sevkon aur israel ki poori sena ko ammoniyon se yuddh karne bheja taaki woh unhein dhool chata dein. unhonne jaakaar ammoniyon ke shehar rabbah ko gher liya.+ magar daavid yarooshalem mein hi raha.+
2 ek shaam* daavid apne bistar se utha aur raajmahal ki chhat par tahalne laga. usne chhat se ek aurat ko dekha jo naha rahi thi. woh aurat bahot khoobsoorat thi.
3 daavid ne kisi ko bhejkar pata lagvaya ki woh aurat kaun hai. usne aakaar daavid ko bataya ki us aurat ka naam batsheba+ hai aur woh eleeam ki beti+ aur hitti+ uriyah+ ki patni hai.
4 fir daavid ne us aurat ko laane ke liye apne doot bheje.+ jab woh aurat aayi to daavid ne uske saath sambandh rakhe.+ (us vakt woh aurat apni ashuddhta* door karne ke liye khud ko shuddh kar rahi thi.)+ iske baad woh apne ghar laut gayi.
5 woh aurat garbhvati ho gayi. usne daavid ke paas khabar bheji ki main garbhvati hoon.
6 tab daavid ne yoab ke paas yah sandesh bheja: “hitti uriyah ko mere paas bhej.” yoab ne uriyah ko daavid ke paas bhej diya.
7 jab uriyah daavid ke paas aaya to daavid ne usse poochha ki yoab aur sabhi sainikon ke kya haal-chaal hain aur yuddh kaisa chal raha hai.
8 fir daavid ne uriyah se kaha, “ab tu apne ghar jaa aur aaram kar.”* uriyah raja ke mahal se chala gaya. fir raja ne uske liye tohfe* bheje.
9 magar uriyah apne ghar nahin gaya. woh apne maalik raja ke mahal ke dvar par hi soya jahaan raja ke baaki sabhi sevak sote the.
10 daavid ko bataya gaya ki uriyah apne ghar nahin gaya. tab daavid ne uriyah se kaha, “tu abhi-abhi safar se lauta hai, tu apne ghar kyon nahin chala jaata?”
11 magar uriyah ne kaha, “jab karar ka sandook+ aur israel aur yahooda deron mein reh rahe hain aur mera maalik yoab aur uske sevak khule maidan mein chhaavni daale huye hain, to bhala main kaise apne ghar jaakaar khaaun-peeun aur apni patni ke sang soun?+ main teri aur tere jeevan ki shapath khaakaar kehta hoon, main aisa hargiz nahin kar sakta!”
12 daavid ne uriyah se kaha, “theek hai, tu aaj bhi yahin reh jaa. kal main tujhe bhej doonga.” isliye uriyah us din aur agle din bhi yarooshalem mein hi raha.
13 fir daavid ne use apne saath khaane-peene ke liye bulvaya aur usne uriyah ko itni pilayi ki use nasha ho gaya. fir bhi shaam hone par uriyah apne ghar nahin gaya balki vahin jaakaar soya jahaan uske maalik ke sevak sote the.
14 subah hone par daavid ne yoab ke naam ek chitthi likhi aur uriyah ke haath bhej di.
15 daavid ne chitthi mein yah likha tha: “uriyah ko yuddh mein sabse aage ki kataar mein rakhna jahaan ghamasan ladai ho rahi ho. fir tum sab peechhe hat jaana taaki dushman us par hamla karke use maar daalein.”+
16 yoab rabbah shehar par kadi nazar rakhe huye tha. woh jaanta tha ki dushman ke bade-bade soorma kis jagah tainat hain isliye usne uriyah ko usi jagah tainat kiya.
17 jab shehar ke aadmi aaye aur yoab se yuddh karne lage to daavid ke kuch sevak maare gaye aur unmein hitti uriyah bhi ek tha.+
18 fir yoab ne daavid ko yuddh ki saari khabar bheji.
19 usne apne doot ko yah kehkar bheja: “jab tu raja ko yuddh ki poori khabar sunayega,
20 to raja shaayad gussa ho jaaye aur tujhse kahe, ‘tum logon ko yuddh karne ke liye shehar ke itne kareeb jaane ki kya zaroorat thi? kya tumhein pata nahin tha ki dushman sheharpanah ke oopar se tum par teer chalayenge?
21 bhool gaye, yarubbeshet ke bete abeemelek ke saath tebes mein kya hua tha?+ ek aurat ne sheharpanah ke oopar se chakki ka oopri paat us par feinkkar use maar daala tha. tumhein sheharpanah ke itne kareeb jaane ki kya zaroorat thi?’ tab tu raja se kehna, ‘tera sevak hitti uriyah bhi maara gaya.’”
22 woh doot daavid ke paas gaya aur usne woh saara haal keh sunaya jo yoab ne use sunane ke liye kaha tha.
23 doot ne daavid se kaha, “dushman hum par bhaari padne lage aur maidan mein aakaar hum par toot pade. magar hamne unhein vaapas shehar ke faatak tak khadeda.
24 tab dushman ke teerandaz sheharpanah ke oopar se tere sevkon par teer chalane lage jis vajah se raja ke kuch sevak maare gaye. tera sevak hitti uriyah bhi maara gaya.”+
25 daavid ne doot se kaha, “tu jaakaar yoab se kehna, ‘jo hua hai uski vajah se tu zyada dukhi mat hona. yuddh hai to log mareinge hi. tu hamla aur tez kar de aur shehar par kabza kar le.’+ aisa kehkar tu yoab ki himmat bandhana.”
26 jab uriyah ki patni ne suna ki uska pati uriyah mar gaya hai to woh apne pati ke liye maatam manane lagi.
27 jaise hi uska maatam manane ka samay poora hua daavid ne use apne ghar bulva liya aur woh uski patni ban gayi.+ fir usne daavid ke bete ko janm diya. magar daavid ne jo kiya tha woh yahova ki nazron mein bahot bura tha.+
kai footnote
^ yaani vasant mein.
^ ya “ek din der dopahar ko.”
^ shaayad maahvari ki ashuddhta.
^ shaa., “apne pair dho.”
^ ya “raja ka hissa,” yaani woh hissa jo mezban apne khaas mehman ko bhejta tha.
