doosra shamooel 15:1-37
15 iske baad abshalom ne apne liye ek rath aur kuch ghode haasil kiye aur 50 aadmiyon ko apne aage-aage daudne ke kaam par lagaya.+
2 abshalom subah tadke uthta aur shehar ke faatak ki taraf jaanevale raaste ke paas khada ho jaata tha.+ jab bhi koi aadmi aisa mukadma lekar jaa raha hota jiska nyay raja ko karna tha,+ to abshalom use apne paas bula leta. woh usse poochhta, “tu kis shehar ka hai?” woh aadmi kehta, “tera sevak israel ke falaan gotra ka hai.”
3 abshalom usse kehta, “dekh, tera daava sahi hai, tujhe insaf milna chahiye. magar raja ki taraf se tera maamla sunnaevala koi nahin hai.”
4 abshalom kehta, “kaash! mujhe is desh ka nyayi thehraya jaata. fir jiski bhi koi shikayat hoti ya koi maamla hota, woh mere paas aa sakta aur main use zaroor insaf dilata.”
5 aur jab bhi koi aadmi abshalom ke paas aata aur uske saamne jhukne lagta to abshalom apna haath badhakar use jhat-se pakad leta aur choomta.+
6 woh un sabhi israeliyon ke saath aisa karta tha jo insaf ke liye raja ke paas aate. is tarah abshalom israel ke logon ko behkakar unke dilon ko apni taraf khinchne laga.+
7 chaar saal* ke aakhir mein abshalom ne raja se kaha, “meharbani karke mujhe hebron jaane de.+ mainne yahova se jo mannat maani hai woh poori karna chahta hoon.
8 tere sevak ne seeriya ke gashoor mein rehte vakt+ yah mannat maani thi,+ ‘agar yahova mujhe vaapas yarooshalem le jaaye to main yahova ke liye ek chadhava arpit karoonga.’”*
9 raja ne usse kaha, “jaa, meri shubhkamanayen tere saath hain.”* tab abshalom vahaan se nikaal pada aur hebron gaya.
10 fir abshalom ne apne jaasooson ko yah batakar israel ke sabhi gotron ke ilakon mein bheja, “jaise hi tumhein narsinge ki aavaz sunayi de tum yah ailan karna, ‘abshalom hebron mein raja ban gaya hai!’”+
11 jab abshalom hebron gaya to uske saath yarooshalem se 200 aadmi gaye the. un aadmiyon ko uske saath jaane ka nyauta diya gaya tha. woh abshalom ki saazish ke baare mein kuch nahin jaante the aur na hi unhein zara bhi shak hua tha, isliye woh uske saath chal diye.
12 jab abshalom ne hebron mein balidan chadhaye to usne daavid ke salahkar aheetopel+ ko bhi geelo shehar+ se bulvaya. aheetopel geelo shehar ka rehnevala tha. abshalom ki saazish zor pakadti gayi aur uska saath denevalon ki ginti dinon-din badhti gayi.+
13 kuch samay baad ek doot ne daavid ke paas aakaar use yah khabar di: “israel ke log abshalom ki taraf ho gaye hain.”
14 yah sunte hi daavid ne apne sabhi sevkon se, jo uske saath yarooshalem mein the, kaha, “chalo hum sab yahaan se bhaag nikaalte hain,+ varna hammein se koi bhi abshalom ke haath se nahin bach paayega! jaldi karo, kahin aisa na ho ki woh hamein fauran gher le aur hamein aur poore shehar ko talvar se ghaat karke barbad kar de!”+
15 raja ke sevkon ne usse kaha, “hamara maalik raja jo bhi faisla kare hum uske mutabik kaam karne ke liye taiyar hain.”+
16 tab raja apne poore gharane ko lekar nikaal pada, magar usne apni das up-patniyon ko mahal ki dekhbhal karne ke liye chhod diya.+
17 raja apne sab logon ko saath lekar aage badhta gaya aur jab woh bet-merhak pahunche to vahaan ruk gaye.
18 uske saath uske sabhi sevak, sabhi kareti aur paleti log+ aur gat ke 600 aadmi+ bhi the jo gat se uske saath aaye the.+ jab woh raja ke saamne se guzar rahe the to usne unka muayna kiya.
19 fir raja ne gat ke rehnevale ittai+ se kaha, “tu kyon hamare saath aa raha hai? tu vaapas chala jaa aur naye raja ke saath reh. tu ek pardesi hai aur apna desh chhodkar yahaan aaya hai.
20 tu kal hi to aaya tha aur aaj main tujhe kaise majboor karoon ki tu bhi hamare saath jagah-jagah bhatakta rahe? main tujhse kaise keh sakta hoon ki main jab jahaan jaaun tu bhi hamare saath aa? tu laut jaa aur apne bhaaiyon ko bhi saath le jaa. yahova tujhe apne atal pyar ka saboot de aur tera vishvasyogya bana rahe!”+
21 magar ittai ne raja se kaha, “yahova ke jeevan ki shapath aur mere maalik raja ke jeevan ki shapath, mera maalik raja jahaan kahin jaaye vahaan tera yah sevak bhi jaayega, fir chahe mujhe maut ko hi kyon na gale lagana pade!”+
22 daavid ne ittai+ se kaha, “theek hai, tu bhi ghaati paar kar.” tab gat ke rehnevale ittai ne apne sabhi aadmiyon aur bachchon ke saath ghaati paar ki.
23 jab ye sab log ghaati paar kar rahe the to yarooshalem aur aas-paas ke sabhi log zor-zor se ro rahe the. raja kidron ghaati+ ke paas khada tha aur sab log ghaati paar karke us raaste par jaane lage jo veerane ki taraf jaata hai.
24 saadok+ bhi vahaan tha aur uske saath sabhi levi the+ jo sachche parmeshvar ke karar ka sandook+ uthaye huye the.+ jab sab log shehar se nikaalkar ghaati paar kar rahe the, to unhonne sandook neeche rakh diya aur abiyatar+ bhi vahaan tha.
25 magar raja ne saadok se kaha, “sachche parmeshvar ka sandook vaapas shehar le jaa.+ agar yahova ne mujh par kripa ki hai to woh mujhe zaroor vaapas laayega aur mujhe yah sandook aur iska nivas dekhne ka mauka dega.+
26 lekin agar woh kahe ki main tujhse khush nahin hoon to use jo sahi lage woh mere saath kare.”
27 fir raja ne saadok yaajak se kaha, “kya tu ek darshi+ nahin hai? tu shaanti se shehar laut jaa. abiyatar, tu bhi chala jaa. saadok, tu apne saath apne bete aheemas aur abiyatar ke bete yonatan ko le jaa.+
28 dekh, main veerane ke paasvale ghaaton mein tab tak rahoonga jab tak mujhe tere yahaan se koi khabar nahin milti.”+
29 tab saadok aur abiyatar sachche parmeshvar ka sandook vaapas yarooshalem le gaye aur vahin rahe.
30 fir daavid jaitoon pahad*+ chadhne laga. woh apna sir dhaanpe aur rote huye nange paanv chal raha tha. uske saath jitne log the woh bhi apna sir dhaanpe huye the aur rote huye chadh rahe the.
31 tabhi daavid ko bataya gaya ki aheetopel bhi abshalom ke saath saazish karnevalon mein se hai.+ yah sunkar daavid ne binti ki, “hey yahova, tu aisa kar ki aheetopel ki salah moorkhon ki salah lage!”+
32 jab daavid pahad ki us choti par pahuncha jahaan log jhukkar parmeshvar ko dandvat karte the, to vahaan ereki+ hooshai+ usse milne aaya. woh apna choga faade aur sir par dhool daale huye tha.
33 magar daavid ne usse kaha, “agar tu mere saath ghaati paar karega to mujh par ek bojh ban jaayega.
34 lekin agar tu shehar laut jaaye aur abshalom se kahe, ‘hey raja main tera sevak hoon. kal tak main tere pita ka sevak tha, magar aaj main tera sevak hoon,’+ tab tu aheetopel ki salah naakam kar paayega.+
35 saadok aur abiyatar yaajak bhi vahaan tere saath honge. raajmahal se tujhe jo bhi khabar mile woh yaajak saadok aur yaajak abiyatar ko bataya karna.+
36 dekh, vahaan unke bete bhi hain, saadok ka beta aheemas+ aur abiyatar ka beta yonatan.+ tumhein jo bhi khabar mile unke zariye mujh tak pahunchate rehna.”
37 isliye daavid ka dost* hooshai+ shehar chala gaya. us samay abshalom yarooshalem ke andar jaa raha tha.
kai footnote
^ ya shaayad, “40 saal.”
^ ya “ki upasna karoonga.”
^ shaa., “shaanti se jaa.”
^ ya “ki chadhai.”
^ ya “raazdar.”
