doosra shamooel 21:1-22
21 daavid ke dinon mein israel mein akaal pada+ aur yah teen saal tak raha. jab daavid ne yahova se salah ki to yahova ne kaha, “shaaool aur uska gharana khoon ka doshi hai kyonki usne giboniyon ko maar daala tha.”+
2 tab raja ne giboniyon+ ko bulaya aur unse baat ki. (giboni log israeli nahin the balki bache huye emori logon+ mein se the. israeliyon ne unhein zinda chhod dene ki shapath khaayi thi,+ magar shaaool israel aur yahooda ke logon ki khaatir josh mein aakaar sabhi giboniyon ka katla karne par utaroo ho gaya tha.)
3 daavid ne giboniyon se kaha, “batao main tumhare liye kya karoon? jo paap hua hai uske prayashchit ke liye main kya karoon taaki tum yahova ki virasat ke liye dua karo ki us par aasheesh ho?”
4 giboniyon ne kaha, “shaaool aur uske gharane ne hamare saath jo kiya hai uski bharpai sone-chaandi se nahin ho sakti.+ aur hamare paas yah hak bhi nahin ki hum israel mein kisi ko maar daalein.” tab daavid ne kaha, “tum jo bhi kaho main tumhare liye karoonga.”
5 unhonne kaha, “jis aadmi ne hamein naash kar diya tha aur hamein mita dene ki saazish ki thi taaki hum israel desh mein kahin nazar na aayen+—
6 uske vanshajon mein se saat aadmiyon ko hamare havale kar de. hum unki laashein yahova ke saamne giba shehar+ mein latka deinge+ jo yahova ke chune huye jan shaaool+ ka shehar hai.” tab raja ne kaha, “main unko tumhare havale kar doonga.”
7 magar raja ne yonatan ke bete aur shaaool ke pote mapeeboshet par rehm kiya+ kyonki daavid aur yonatan ne yahova ke saamne ek-doosre se shapath khaayi thi.+
8 lekin usne shaaool ke bete armoni aur mapeeboshet ko liya, jo ayya ki beti rispa+ se paida huye the. in donon ke alava, daavid ne shaaool ki beti meekal*+ ke paanch beton ko liya. meekal ke in beton ka pita adriel+ tha, jo maholai barjillai ka beta tha.
9 raja ne un saaton aadmiyon ko giboniyon ke havale kar diya. giboniyon ne unhein maar daala aur unki laashein pahad par le jaakaar yahova ke saamne latka di.+ is tarah woh saaton ek-saath mar gaye. unhein katai ke shurooati dinon mein, yaani jau ki katai ki shurooat mein maara gaya tha.
10 fir ayya ki beti rispa+ ne taat liya aur chattan par bichhakar baith gayi. woh katai ki shurooat se lekar tab tak baithi rahi jab tak aasman se un laashon par paani na barsa. rispa ne na to din ke vakt aakash ke pakshiyon ko laashon par aane diya aur na hi raat ke vakt maidan ke jangli jaanvaron ko paas fatakne diya.
11 daavid ko bataya gaya ki ayya ki beti yaani shaaool ki up-patni rispa ne aisa-aisa kiya hai.
12 tab daavid yaabesh-gilad gaya aur vahaan ke aguvon* se shaaool aur uske bete yonatan ki haddiyaan le aaya.+ palishtiyon ne jis din shaaool ko gilbo mein maara tha us din unhonne shaaool aur yonatan ki laashein betshan ke chauk mein latka di thi. baad mein yaabesh-gilad ke aguve chupke se jaakaar betshan se unki laashein apne yahaan le aaye the.+
13 jab daavid shaaool aur yonatan ki haddiyaan le aaya, to un saat aadmiyon ki haddiyaan bhi ikatthi ki gayin jinhein maut ki saza di gayi thi.+
14 fir log shaaool aur yonatan ki haddiyaan binyameen ke ilake ke sela shehar+ le gaye aur vahaan shaaool ke pita keesh+ ki kabraa mein dafna di. unhonne woh sab kiya jiski raja ne unhein aagya di thi. iske baad parmeshvar ne desh ki khaatir ki gayi unki bintiyaan sunin.+
15 ek baar fir palishtiyon aur israeliyon ke beech yuddh hua.+ tab daavid aur uske sevkon ne jaakaar palishtiyon se ladai ki. daavid ladte-ladte past ho gaya.
16 palishti sena mein yishabee-banob naam ka ek aadmi tha, jo rapai+ ka vanshaj tha. uske tambe ke bhaale ka vazan 300 shekel* tha+ aur uske paas ek nayi talvar thi. yishabee-banob ne daavid ko maar daalne ki koshish ki.
17 magar tabhi sarooyah ka beta abeeshai+ daavid ki madad ke liye aa gaya+ aur usne palishti par vaar karke use maar daala. tab daavid ke aadmiyon ne shapath khaakaar kaha: “hum tujhe fir kabhi apne saath yuddh mein nahin aane deinge.+ aisa na ho ki israel ka deeya bujh jaaye!”+
18 iske baad, palishtiyon aur israeliyon ke beech fir se yuddh chhid gaya.+ gob mein huye is yuddh mein hooshai sibbakai+ ne rapai+ ke ek aur vanshaj sap ko maar daala.
19 palishtiyon aur israeliyon ke beech ek baar fir gob mein ladai chhid gayi.+ is baar betlehem ke rehnevale yaar-yorgeem ke bete elhanan ne gat ke rehnevale goliyat ko maar daala. goliyat ke bhaale ka danda julahe ke latthe jitna bhaari tha.+
20 gat mein ek baar fir yuddh chhida. palishti sena mein ek aadmi tha jo bahot unchi kad-kaathi ka tha. uske haathon aur pairon mein chhe-chhe ungliyaan thi yaani kul milakar uski 24 ungliyaan thi. woh bhi rapai ka vanshaj tha.+
21 woh israel ko lagatar lalkarta tha.+ isliye yonatan ne, jo daavid ke bhaai shimi+ ka beta tha, use maar daala.
22 rapai ke ye chaaron vanshaj gat mein rehte the aur woh daavid aur uske sevkon ke haathon maare gaye.+
kai footnote
^ ya shaayad, “merab.”
^ ya shaayad, “zamindaron.”
^ kareeb 3.42 kilo. ati. kha14 dekhein.