doosra shamooel 24:1-25
24 yahova ka krodh israel par fir se bhadak utha+ jab kisi ne daavid ko israeliyon ke khilaf kaam karne ke liye uksaya aur* kaha, “jaa, israel aur yahooda ke logon ki ginti le.”+
2 isliye raja daavid ne apne senapati yoab+ se, jo uske saath tha, kaha, “daan se bersheba+ tak israel ke sab gotron mein jaa aur logon ka naam likh. main logon ki ginti jaanna chahta hoon.”
3 magar yoab ne raja se kaha, “maalik, tera parmeshvar yahova logon ki ginti 100 guna badhaye aur tu apni aankhon se unki badhti dekhe. magar mera maalik raja yah kaam kyon karna chahta hai?”
4 lekin daavid nahin maana aur yoab aur sabhi senapatiyon ko raja ki baat ke aage jhukna pada. isliye woh israel ke logon ki naam-likhai ke liye raja ke saamne se chale gaye.+
5 unhonne yardan paar ki aur aroer shehar+ mein dera daala aur ghaati ke beechvale shehar ke daayin taraf* dera daala. fir woh gaadiyon ke ilake aur yaajer+ ki taraf badhe.
6 vahaan se woh gilad+ aur tahteem-hodshi desh gaye aur aage badhte huye daan-yaan gaye aur fir ghoomkar seedon+ gaye.
7 iske baad woh sor ke kile+ mein aur hivviyon+ aur kanaaniyon ke sabhi shehron mein gaye. sabse aakhir mein woh bersheba+ gaye jo yahooda ke negeb mein tha.+
8 is tarah unhonne poore desh ka daura kiya aur nau maheene 20 din beetne par yarooshalem laute.
9 fir yoab ne raja ko un logon ki ginti batayi jinka naam likha gaya tha. israel mein talvaron se lais sainik 8,00,000 the aur yahooda ke sainik 5,00,000.+
10 magar logon ki ginti lene ke baad daavid ka man* use buri tarah kachotne laga.+ daavid ne yahova se kaha, “mainne logon ki ginti lekar bahot bada paap kiya hai.+ hey yahova, daya karke apne sevak ko maaf kar de.+ mainne badi moorkhta ka kaam kiya hai.”+
11 jab subah daavid utha to yahova ka sandesh bhavishyavakta gaad+ ke paas pahuncha, jo daavid ka darshi tha.
12 parmeshvar ne usse kaha, “daavid ke paas jaa aur usse keh, ‘yahova tujhse kehta hai, “main tujhe teen tarah ke kehar batata hoon. tu chun le ki main tujh par kaun-saa kehar dhaaun.”’”+
13 tab gaad ne daavid ke paas jaakaar kaha, “tu kya chahta hai, tere desh par saat saal tak akaal pade+ ya teen maheene tak tere dushman tera peechha karte rahein aur tu unse bhaagta fire+ ya teen din tak tere desh mein mahamari faile?+ achhi tarah sochkar bata ki main apne bhejnevale ko kya javab doon.”
14 daavid ne gaad se kaha, “main bade sankat mein hoon. achha hai ki hum yahova hi ke haath pad jaayen+ kyonki woh bada dayalu hai.+ magar mujhe insan ke haath na padne de.”+
15 fir yahova ne israel par mahamari ka kehar dhaaya,+ jo subah se lekar tay samay tak faili rahi. is mahamari ki vajah se daan se lekar bersheba+ tak 70,000 log maare gaye.+
16 jab swargdoot ne yarooshalem ke logon ka naash karne ke liye apna haath badhaya to yahova ko is tabahi par bada dukh hua*+ aur usne logon ka naash karnevale swargdoot se kaha, “bas, ab ruk jaa! apna haath rok le.” us vakt yahova ka swargdoot yaboosi+ arauna ke khalihan+ ke bilkul paas tha.
17 jab daavid ne us swargdoot ko dekha jo logon ko ghaat kar raha tha, to usne yahova se kaha, “paap to mainne kiya hai, galti meri hai. fir tu in logon ko kyon maar raha hai? in bhedon+ ka kya kasoor hai? daya karke inhein chhod de aur mujhe aur mere pita ke gharane ko saza de.”+
18 isliye us din gaad daavid ke paas aaya aur usse kaha, “oopar jaa aur yaboosi arauna ke khalihan mein yahova ke liye ek vedi khadi kar.”+
19 tab daavid oopar gaya, theek jaise yahova ne gaad ke zariye use aagya di thi.
20 jab arauna ne raja aur uske sevkon ko apni taraf aate dekha, to woh fauran unke paas gaya aur raja ke saamne munh ke bal zameen par girkar use pranam kiya.
21 fir arauna ne poochha, “main apne maalik raja ki kya seva kar sakta hoon?” daavid ne kaha, “main tujhse yah khalihan khareedne aaya hoon kyonki main yahaan yahova ke liye ek vedi banana chahta hoon taaki logon par jo kehar aa pada hai woh band ho jaaye.”+
22 arauna ne kaha, “mera maalik raja yah khalihan le le aur balidan ke liye bhi use jo kuch achha lage* woh le le. dekh, yahaan hom-bali ke liye bail hain aur jalane ki lakdi ke liye daanvne ki patiya aur jua bhi hai.
23 arauna ye sab raja ko deta hai.” iske baad arauna ne raja se kaha, “tera parmeshvar yahova tujh par kripa kare.”
24 magar raja ne arauna se kaha, “nahin, main aise nahin loonga. main daam dekar tujhse yah khareedoonga. main apne parmeshvar yahova ko aisi hom-baliyaan nahin chadhaunga jinki mainne koi keemat na chukayi ho.” tab daavid ne 50 shekel* chaandi mein khalihan aur bail khareed liye.+
25 fir daavid ne us jagah yahova ke liye ek vedi khadi ki+ aur us par hom-baliyaan aur shaanti-baliyaan chadhayin. tab yahova ne desh ki khaatir ki gayi binti suni+ aur israel se mahamari door ho gayi.
kai footnote
^ ya “jab daavid uksaya gaya tha aur usne.”
^ ya “ke dakshin mein.”
^ ya “zameer.”
^ ya “pachhtava mehsoos hua.”
^ shaa., “jo uski nazron mein achha hai.”
^ ek shekel ka vazan 11.4 g. tha. ati. kha14 dekhein.
