doosra shamooel 6:1-23
6 daavid ne ek baar fir israel ki sena se sabhi achhe-achhe sainikon ki tukdiyaan ikatthi kin. un aadmiyon ki ginti 30,000 thi.
2 fir daavid aur woh sabhi aadmi baale-yahooda ki taraf nikaal pade taaki vahaan se sachche parmeshvar ka sandook le aayen,+ jo karoobon par* virajman hai. usi sandook ke saamne log senaon ke parmeshvar yahova ka naam pukarte hain.+
3 magar daavid aur uske aadmiyon ne vahaan se sandook laane ke liye use ek nayi bail-gaadi par rakha.+ sandook pahadi par abeenadab ke ghar mein tha.+ jab sandook le jaaya jaa raha tha to abeenadab ke bete ujjah aur ahyo gaadi ke aage-aage chal rahe the.
4 is tarah woh pahadi par abeenadab ke ghar gaye aur vahaan se sachche parmeshvar ka sandook lekar chal diye. ahyo sandook ke aage-aage chal raha tha.
5 daavid aur israel ka poora gharana yahova ke saamne jashna mana raha tha. woh sanovar ki lakdi se bane tarah-tarah ke saaz, surmandal, taaronvale doosre baaje,+ dafli,+ jheeka aur jhaanjh bajate huye khushiyaan mana rahe the.+
6 magar jab woh naakon naam ke khalihan pahunche to aisa hua ki bail-gaadi palatne par ho gayi. tabhi ujjah ne haath badhakar sachche parmeshvar ka sandook pakad liya.+
7 is par yahova ka krodh ujjah par bhadak utha aur sachche parmeshvar ne use vahin maar daala+ kyonki usne parmeshvar ke kaanoon ka anadar kiya tha.+ ujjah sachche parmeshvar ke sandook ke paas hi mar gaya.
8 magar yah dekhkar ki yahova ka krodh ujjah par bhadak utha, daavid bahot gussa* hua. isi ghatna ki vajah se woh jagah aaj tak peres-ujjah* ke naam se jaani jaati hai.
9 fir us din daavid yahova se bahot dar gaya+ aur usne kaha, “yahova ka sandook mere yahaan kaise aa paayega?”+
10 daavid yahova ke sandook ko apne shehar daavidpur laane se jhijhak raha tha.+ isliye usne woh sandook gat ke rehnevale obed-edom ke ghar pahuncha diya.+
11 yahova ka sandook teen maheene tak gat ke rehnevale obed-edom ke ghar mein hi raha. is dauran yahova obed-edom aur uske poore gharane ko aasheeshein deta raha.+
12 raja daavid ko bataya gaya ki yahova ne obed-edom ke ghar par aur uska jo kuch hai us par aasheesh di hai kyonki sachche parmeshvar ka sandook uske ghar mein hai. isliye daavid obed-edom ke ghar gaya taaki sachche parmeshvar ka sandook khushiyaan manate huye daavidpur le aaye.+
13 jab yahova ka sandook dhonevalon+ ne chhe kadam aage badhaye to daavid ne ek bail aur ek mote kiye huye jaanvar ki bali chadhayi.
14 daavid malmal ka epod pehne* yahova ke saamne poore josh aur umang se naach raha tha.+
15 woh aur israel ke gharane ke sab log jayjaykar karte huye+ aur narsinga foonkte huye+ yahova ka sandook+ laa rahe the.
16 magar jab yahova ka sandook daavidpur pahuncha aur shaaool ki beti meekal+ ne khidki se neeche jhaankkar dekha ki raja daavid yahova ke saamne jhoom-jhoomkar naach raha hai to woh man-hi-man daavid ko tuchh samajhne lagi.+
17 fir woh yahova ka sandook us tamboo mein le aaye jo daavid ne uske liye khada kiya tha. unhonne use tamboo ke andar thehrayi gayi jagah par rakh diya.+ iske baad daavid ne yahova ke saamne hom-baliyaan aur shaanti-baliyaan chadhayin.+
18 jab daavid ye baliyaan chadha chuka, to usne senaon ke parmeshvar yahova ke naam se logon ko aasheervad diya.
19 aur usne poore israel mein se har aadmi aur har aurat ko ek chhalle jaisi roti, ek khajoor ki tikiya aur ek kishmish ki tikiya di. fir sab log apne-apne ghar laut gaye.
20 jab daavid apne gharane ko aasheervad dene lauta to shaaool ki beti meekal+ usse milne baahar aayi. woh kehne lagi, “vaah! aaj israel ke raja ne kya shaan dikhayi! apne sevkon ki daasiyon ke saamne adhnanga hokar woh aise naach raha tha jaise koi nikamma aadmi khuleaam adhnanga ghoomta hai.”+
21 daavid ne meekal se kaha, “main yahova ke saamne jashna mana raha tha, jisne tere pita aur uske poore gharane ke badle mujhe chuna. yahova ne mujhe apni praja israel ka aguva thehraya hai.+ isliye main yahova ke saamne zaroor jashna manaunga
22 aur main khud ko isse bhi neecha karoonga aur apni nazron mein khud ko aur bhi deen karoonga. main chahe deen ho jaaun, fir bhi woh daasiyaan jinke baare mein toone kaha hai, meri shaan ki badai kareingi.”
23 isliye shaaool ki beti meekal+ saari zindagi beaulad rahi.
kai footnote
^ ya shaayad, “ke beech.”
^ ya “naaraz.”
^ matlab “ujjah par bhadak utha.”
^ shaa., “kamar mein kase huye.”