ester 9:1-32
9 ab adaar* naam ke 12vein maheene ka 13vaan din aaya.+ yah vahi din tha jab raja ka hukm aur kaanoon laagoo hona tha+ aur dushman bhi aas lagaye baithe the ki woh yahoodiyon par jeet haasil kar leinge. magar ulta yahoodiyon ne un sab par jeet haasil kar li jo unse nafrat karte the.+
2 us din raja ahash-verosh ke sabhi zilon mein+ rehnevale yahoodi apne-apne shehar mein ikattha huye aur un logon ko maarne ke liye taiyar ho gaye jo unhein khatm karna chahte the. ek bhi dushman unke saamne tik na saka kyonki logon mein yahoodiyon ka khauf sama gaya tha.+
3 sabhi zilon ke haakimon, soobedaron,+ raajyapalon aur raja ka kaam-kaaj sambhalnevalon ne yahoodiyon ka saath diya kyonki woh mordakai se darne lage the.
4 mordakai shaahi bhavan* ka ek bada adhikari ban gaya.+ jaise-jaise use aur bhi adhikar milte gaye, sabhi zilon mein uske charche hone lage.
5 us din yahoodiyon ne apne sabhi dushmanon ko talvar se maar daala aur unka poori tarah safaya kar diya. unhonne apne dushmanon ke saath vaisa hi salook kiya jaisa unhonne chaha.+
6 shooshan*+ naam ke kile* mein yahoodiyon ne 500 aadmiyon ko maut ke ghaat utar diya.
7 unhonne in aadmiyon ko bhi maar daala: parshandata, dalpon, aspata,
8 porata, adalya, areedata,
9 parmashta, areesai, areedai aur vaijata.
10 ye das aadmi haaman ke bete the, vahi haaman jo hammadata ka beta aur yahoodiyon ka dushman tha.+ lekin apne dushmanon ko maarne ke baad yahoodiyon ne loot mein unki koi bhi cheez nahin li.+
11 us din shooshan* naam ke kile* mein jitne log maare gaye uski khabar raja ko di gayi.
12 raja ne raani ester se kaha, “shooshan* naam ke kile* mein yahoodiyon ne 500 aadmiyon ko aur haaman ke das beton ko maut ke ghaat utar diya hai. agar yahaan yah haal hai, to baaki zilon mein to aur bhi log maare gaye honge!+ raani ester maang tujhe aur kya chahiye? teri khvahish poori ki jaayegi. tu bas hukm de.”
13 ester ne kaha, “agar raja ko yah manzoor ho+ to woh shooshan* mein rehnevale yahoodiyon ko ijazat de ki woh kal bhi apne dushmanon ko maar sakein, theek jaise raja ke farman par unhonne aaj maara hai.+ raja se meri yah bhi binti hai ki haaman ke das beton ki laashein kaath par latkayi jaayen.”+
14 raja ne hukm diya ki ester ne jaisa kaha hai vaisa hi kiya jaaye. tab shooshan* mein ek kaanoon nikaala gaya ki haaman ke das beton ki laashein latkayi jaayen aur yahoodiyon ko ek aur din ki mohlat di jaaye.
15 adaar maheene ke 14vein din shooshan* mein rehnevale yahoodi ek baar fir ikattha huye.+ unhonne vahaan 300 aadmiyon ko maar daala lekin loot mein unki koi bhi cheez nahin li.
16 raja ke baaki zilon mein rehnevale yahoodi bhi ikattha huye aur apni jaan bachane ke liye lade.+ unhonne apne dushmanon ka, un 75,000 aadmiyon ka safaya kar diya+ jo unse nafrat karte the. magar loot mein unki koi bhi cheez nahin li.
17 yah adaar maheene ka 13vaan din tha. aur 14vein din unhonne aaram kiya, badi-badi daavtein rakhin aur khushiyaan manayin.
18 jo yahoodi shooshan* mein the, woh apne dushmanon se ladne ke liye 13vein aur 14vein din ikattha huye+ aur 15vein din unhonne aaram kiya, badi-badi daavtein rakhin aur khushiyaan manayin.
19 baaki zilon ke shehron mein rehnevale yahoodiyon ne adaar maheene ke 14vein din jashna manaya.+ unhonne badi-badi daavtein rakhin, khushiyaan manayin aur ek-doosre ko khaane-peene ki cheezen bhejin.+
20 mordakai+ ne in saari ghatnaon ko likha. aur usne raja ahash-verosh ke sabhi zilon mein rehnevale yahoodiyon ko khat bheje.
21 khat mein mordakai ne yahoodiyon ko aadesh diya ki woh ab se har saal, adaar maheene ke 14vein aur 15vein din tyohar manaya karein.
22 kyonki in dinon mein yahoodiyon ko apne dushmanon se chhutkara mila aur isi maheene unka gam khushi mein badal gaya, woh maatam manana+ chhodkar jashna manane lage. isliye yahoodi donon din badi-badi daavtein rakhein, khushiyaan manayen, ek-doosre ko khaane-peene ki cheezen bhejein aur gareebon mein khairat baantein.
23 yahoodi is jashna ko har saal manane ke liye raazee huye jiski shurooat khud unhonne ki thi. unhonne yah bhi kaha ki mordakai ne apne khat mein jo kuch bataya hai hum kareinge.
24 agagi+ hammadata ke bete aur yahoodiyon ke dushman haaman+ ne unke khilaf saazish rachi thi. usne unmein aatank failane aur unka sarvanash karne ke liye+ poor yaani chitthi daali thi+ aur unke khaatme ka din tay kiya tha.
25 lekin fir raani ester raja ke saamne gayi aur raja ne yah hukm likhvaya,+ “haaman ne ghinauni saazish rachkar yahoodiyon par jo museebat laani chahi,+ woh museebat khud usi ke sir aa pade.” tab haaman aur uske beton ko kaath par latkaya gaya.+
26 is tarah poor*+ shabd se is tyohar ka naam pooreem pada. khat mein jo kuch likha tha aur jo unhonne hote dekha aur jo un par beeta, unki vajah se
27 yahoodiyon ne thaan liya ki ab se woh, unke vanshaj aur unke saath judnevale baaki log+ donon din yah tyohar manayenge. woh har saal usi tareeke se ise manayenge jaisa unhein khat mein bataya gaya hai.
28 pooreem ka yah tyohar har zile, har shehar aur har parivar mein peedhi-dar-peedhi yaad kiya jaana aur manaya jaana tha taaki yahoodiyon mein yah dastoor hamesha chalta rahe aur iski yaad unke vanshajon ke man se kabhi na mite.
29 fir pooreem ke baare mein doosra khat likha gaya aur abeehail ki beti raani ester aur yahoodi mordakai ko jo adhikar diya gaya tha, us adhikar se unhonne hukm diya ki is khat mein likhi baaton ka paalan kiya jaaye.
30 yah khat raja ahash-verosh ke 127 zilon+ mein sabhi yahoodiyon ko bheja gaya. ismein sachchi aur shaanti ki baatein likhi hui thi
31 ki sabhi yahoodi thehraye gaye dinon mein pooreem ka tyohar manayen, theek jaise yahoodi mordakai aur raani ester ne hukm diya tha.+ aur jaisa khud yahoodiyon ne bhi thaana tha ki woh aur unke vanshaj un dinon ki yaad mein yah tyohar manayenge,+ upvas+ aur minnatein kareinge.+
32 pooreem+ ke baare mein ye baatein ester ke hukm se aur bhi pakki ho gayin aur inhein ek kitab mein likha gaya.
kai footnote
^ ati. kha15 dekhein.
^ ya “mahal.”
^ ya “soosa.”
^ ya “mahal.”
^ ya “soosa.”
^ ya “mahal.”
^ ya “soosa.”
^ ya “mahal.”
^ ya “soosa.”
^ ya “soosa.”
^ ya “soosa.”
^ ya “soosa.”
^ “poor” ka matlab hai “chitthi.” iska bahuvachan “pooreem” yahoodiyon ke tyohar ke liye istemal hone laga, jise woh apne pavitra calendar ke mutabik 12vein maheene mein manate the. ati. kha15 dekhein.
