ginti 15:1-41
15 fir yahova ne moosa se kaha,
2 “tu israeliyon se kehna, ‘jab tum aakhirkar us desh mein bas jaaoge jo main tumhein denevala hoon+
3 aur tum gaay-bailon ya bhed-bakriyon ke jhund mein se kisi jaanvar ko aag mein jalakar yahova ke liye uski bali chadhaoge taaki uski sugandh paakaar yahova khush ho,+ fir chahe woh hom-bali ke liye ho+ ya koi khaas mannat poori karne ki bali ke liye ya fir saal ke alag-alag vakt par tyoharon ke mauke+ par ho ya swechha-bali ke liye ho,+
4 tumhein jaanvar ki bali ke saath anaj ka chadhava bhi yahova ke liye chadhana chahiye. is chadhave mein epa ka dasvaan bhaag* maida hona chahiye+ jismein ek-chauthai heen* tel mila ho.
5 jab bhi tum hom-bali chadhate ho ya ek nar memne ki bali chadhate ho, to uske saath ek-chauthai heen daakh-madira ka argh bhi chadhana.+
6 ya jab tum ek medha chadhate ho to uske saath anaj ke chadhave mein epa ka do-dahai bhaag maida bhi dena jismein ek-tihai heen tel mila ho.
7 uske saath tum ek-tihai heen daakh-madira ka argh bhi chadhana taaki uski sugandh paakaar yahova khush ho.
8 lekin agar tum hom-bali ke liye ya apni khaas mannat poori karne ki bali ke liye+ ya shaanti-bali ke liye yahova ko ek bail arpit karte ho,+
9 to bail ke saath anaj ke chadhave+ mein epa ka teen-dahai bhaag maida dena jismein aadha heen tel mila ho.
10 saath hi, tum aadha heen daakh-madira ka argh bhi chadhana.+ ise aag mein jalakar yahova ke liye arpit karna taaki uski sugandh paakaar woh khush ho.
11 jab bhi tum ek bail ya medhe ya nar memne ya bakre ki bali chadhate ho to uske saath-saath tum ye chadhave bhi dena.
12 chahe tum kitne bhi jaanvar chadhao, tumhein har jaanvar ke saath ye chadhave bhi dene chahiye.
13 har paidaishi israeli ko chahiye ki woh isi tarah jaanvar ko aag mein jalakar yahova ke liye arpit kare taaki uski sugandh paakaar woh khush ho.
14 agar koi pardesi, jo tumhare beech rehta hai ya jiska parivar purkhon ke zamane se tumhare desh mein bas gaya hai, apna balidan aag mein jalakar yahova ke liye arpit karta hai taaki uski sugandh paakaar woh khush ho, to use bhi bali usi tareeke se chadhani hogi jaise tum israeli chadhate ho.+
15 tum jo israel ki mandli ke ho, tumhare liye aur tumhare beech rehnevale pardesiyon ke liye ek hi vidhi rahegi. yah vidhi tum par aur tumhari aanevali peedhiyon par sada laagoo rahegi. yahova ke saamne pardesi bhi tumhare barbar hain.+
16 tumhare liye aur tumhare beech rehnevale pardesiyon ke liye ek hi kaanoon aur ek hi nyay-siddhaant hoga.’”
17 yahova ne moosa se yah bhi kaha,
18 “tu israeliyon se kehna, ‘jab tum us desh mein bas jaaoge jo main tumhein denevala hoon
19 aur vahaan ki upaj* khaaoge ,+ to tum us upaj mein se kuch lekar yahova ke liye daan karna.
20 tum pehale fal mein se kuch anaj dardara kootna aur usse chhalle jaisi rotiyaan banakar daan karna.+ yah tum usi tareeke se daan karna jaise tum khalihan se laaya hua anaj daan karoge.
21 is tarah pehale fal mein se kuch anaj ko dardara kootkar taiyar ki gayi rotiyaan tum peedhi-dar-peedhi yahova ke liye daan mein diya karna.
22 agar tum logon se koi galti ho jaati hai aur tum in saari aagyaon ko maanne se chook jaate ho jo yahova ne moosa ko di hain,
23 yaani yahova ki woh saari aagyayen jo us din se laagoo hain jis din yahova ne moosa ke zariye di thi aur jo tum par aur tumhari aanevali peedhiyon par sada ke liye laagoo raheingi, to tumhein yah karna hoga:
24 agar mandli ko nahin maaloom ki usse yah galti hui hai, to baad mein jab use pata chalta hai tab poori mandli ko ek bail ki hom-bali chadhani chahiye taaki uski sugandh paakaar yahova khush ho. is hom-bali ke saath anaj ka chadhava aur argh bhi chadhana chahiye. yah sab usi tareeke se chadhana chahiye jaise niyamit taur par chadhaya jaata hai.+ iske alava, mandli ko bakri ke ek bachche ki paap-bali bhi chadhani chahiye.+
25 tab yaajak israeliyon ki poori mandli ke liye prayashchit karega. unki galti maaf kar di jaayegi,+ kyonki unhonne yah anjane mein ki thi aur unhonne apna balidan aag mein jalakar yahova ko arpit kiya hai aur apni galti ke liye yahova ke saamne paap-bali bhi chadhayi hai.
26 israeliyon ki poori mandli aur unke beech rehnevale pardesiyon ki galti maaf kar di jaayegi, kyonki yah unse anjane mein ho gayi thi.
27 agar kisi insan se anjane mein paap ho jaata hai, to use paap-bali ke liye ek saal ki bakri laakaar deni hogi.+
28 tab yaajak us insan ke liye, jisne anjane mein paap kiya hai, yahova ke saamne prayashchit karega aur uska paap maaf kar diya jaayega.+
29 anjane mein paap karnevala chahe paidaishi israeli ho ya unke beech rehnevala koi pardesi, is maamle mein donon par ek hi kaanoon laagoo hoga.+
30 lekin agar ek insan jaanboojhkar paap karta hai,+ fir chahe woh paidaishi israeli ho ya unke beech rehnevala koi pardesi, to woh yahova ki ninda karta hai. use maut ki saza di jaaye.
31 usne yahova ke vachan ko tuchh jaana hai aur uski aagya todi hai, isliye use har haal mein maut ki saza di jaaye.+ uska gunah usi ke sir padega.’”+
32 jab israeli veerane mein the, to unhonne sabt ke din ek aadmi ko lakdiyaan beente dekha.+
33 woh use pakadkar moosa, haaroon aur poori mandli ke paas le aaye.
34 fir us aadmi ko hirasat mein rakha gaya,+ kyonki kaanoon mein yah saaf-saaf nahin bataya gaya tha ki aise aadmi ke saath kya kiya jaana chahiye.
35 yahova ne moosa se kaha, “us aadmi ko har haal mein maut ki saza di jaaye.+ poori mandli use chhaavni ke baahar pattharon se maar daale.”+
36 tab mandli ke sab logon ne theek vaise hi kiya jaise yahova ne moosa ko aagya di thi. woh use chhaavni ke baahar le gaye aur use pattharon se maar daala.
37 yahova ne moosa se kaha,
38 “israeliyon se kehna ki woh apni poshak ke neeche ke ghere mein jhaalar lagayen aur us jhaalar ke oopar ek neela feeta lagayen.+ sabhi israeliyon ko peedhi-dar-peedhi is niyam ka paalan karna hai.
39 ‘tumhein yah jhaalar aur feeta isliye lagana chahiye taaki unhein dekhne se tumhein yahova ki sabhi aagyayen yaad rahein aur tum unka paalan kar sako.+ tum apne dil ya apni aankhon ke behkave mein aakaar koi kaam na karna, kyonki yah tumhein mere saath vishvasghat karne* ke liye behka sakti hain.+
40 is niyam se tumhein meri sabhi aagyayen yaad raheingi aur tum unka paalan karoge aur apne parmeshvar ke liye pavitra bane rahoge.+
41 main tumhara parmeshvar yahova hoon. main hi tumhein misra se nikaalkar baahar le aaya tha taaki main khud ko tumhara parmeshvar saabit karoon.+ main yahova hoon, tumhara parmeshvar.’”+
